ਕਰਾਚੀ, 28 ਅਪ੍ਰੈਲ 2022 – ਪਾਕਿਸਤਾਨ ਦੇ ਕਰਾਚੀ ‘ਚ ਮੰਗਲਵਾਰ 26 ਅਪ੍ਰੈਲ ਨੂੰ ਇਕ ਮਹਿਲਾ ਆਤਮਘਾਤੀ ਹਮਲਾਵਰ ਨੇ ਖੁਦ ਨੂੰ ਉਡਾ ਲਿਆ। ਇਸ ਆਤਮਘਾਤੀ ਹਮਲੇ ਵਿੱਚ ਚੀਨੀ ਨਾਗਰਿਕਾਂ ਸਮੇਤ ਕਈ ਲੋਕਾਂ ਦੀ ਮੌਤ ਹੋ ਗਈ ਸੀ। ਇਹ ਹਮਲਾ ਕਰਾਚੀ ਯੂਨੀਵਰਸਿਟੀ ਦੇ ਅੰਦਰ ਉਸ ਸਮੇਂ ਹੋਇਆ ਜਦੋਂ ਇੱਕ ਵੈਨ ਘਟਨਾ ਵਾਲੀ ਥਾਂ ਤੋਂ ਲੰਘ ਰਹੀ ਸੀ। ਮਰਨ ਵਾਲਿਆਂ ਵਿੱਚ 3 ਚੀਨੀ ਅਤੇ 1 ਪਾਕਿਸਤਾਨੀ ਨਾਗਰਿਕ ਸ਼ਾਮਲ ਹੈ।
ਯੂਨੀਵਰਸਿਟੀ ‘ਤੇ ਇਹ ਹਮਲਾ ਬਲੋਚਿਸਤਾਨ ਲਿਬਰੇਸ਼ਨ ਆਰਮੀ (ਬੀਐੱਲਏ) ਦੀ ਪਹਿਲੀ ਮਹਿਲਾ ਫਿਦਾਈ ਸ਼ੈਰੀ ਬਲੋਚ ਨੇ ਕੀਤਾ ਸੀ। ਅੱਤਵਾਦੀ ਸਮੂਹ ਨੇ ਇੱਕ ਲਿਖਤੀ ਬਿਆਨ ਵਿੱਚ ਹਮਲੇ ਦੀ ਜ਼ਿੰਮੇਵਾਰੀ ਲਈ ਹੈ। ਮਜੀਦ ਬ੍ਰਿਗੇਡ ਦੀ ਪਹਿਲੀ ਮਹਿਲਾ ਫਿਦਾਈ ਸ਼ੈਰੀ ਬਲੋਚ ਦਾ ਇਹ ਵੀਡੀਓ ਵੀ ਸੋਸ਼ਲ ਮੀਡੀਆ ‘ਤੇ ਮੌਜੂਦ ਹੈ, ਜਿਸ ‘ਚ ਸ਼ੈਰੀ ਬਲੋਚ ਕਰਾਚੀ ਯੂਨੀਵਰਸਿਟੀ ਦੇ ਅੰਦਰ ਖੁਦ ਨੂੰ ਉਡਾਉਂਦੀ ਨਜ਼ਰ ਆ ਰਹੀ ਹੈ।
ਸ਼ੈਰੀ ਬਲੋਚ, ਇੱਕ ਡਾਕਟਰ ਪਤੀ ਅਤੇ ਦੋ ਬੱਚਿਆਂ ਦੀ ਮਾਂ, ਕਰਾਚੀ ਯੂਨੀਵਰਸਿਟੀ ਦੀ ਵਿਦਿਆਰਥਣ ਸੀ ਜਿਸ ਨੇ ਚੀਨੀ ਨਾਗਰਿਕਾਂ ਨੂੰ ਨਿਸ਼ਾਨਾ ਬਣਾਉਣ ਲਈ ਆਪਣੇ ਆਪ ਨੂੰ ਉਡਾ ਲਿਆ ਸੀ। ਸ਼ੈਰੀ ਨੇ ਜ਼ੂਲੋਜੀ ਵਿੱਚ ਐਮਐਸਸੀ ਅਤੇ ਫਿਰ ਐਮਫਿਲ ਕੀਤੀ। ਦੱਸ ਦੇਈਏ ਕਿ ਕਰਾਚੀ ਯੂਨੀਵਰਸਿਟੀ ‘ਤੇ ਹਮਲਾ ਕਰਨ ਵਾਲੀ ਸ਼ੈਰੀ ਬਲੋਚ ਪਾਕਿਸਤਾਨੀ ਇਤਿਹਾਸ ‘ਚ ਖੁਦਕੁਸ਼ੀ ਕਰਨ ਵਾਲੀ ਦੂਜੀ ਔਰਤ ਸੀ।
ਇਹ ਹਮਲਾ ਪਾਕਿਸਤਾਨ ਵਿੱਚ ਚੀਨੀ ਪ੍ਰੋਜੈਕਟਾਂ ਵਿਰੁੱਧ ਬਲੋਚ ਬਾਗੀਆਂ ਦੇ ਗੁੱਸੇ ਨੂੰ ਦਰਸਾਉਂਦਾ ਹੈ ਜੋ ਲੰਬੇ ਸਮੇਂ ਤੋਂ ਚੀਨ ਪਾਕਿਸਤਾਨ ਆਰਥਿਕ ਗਲਿਆਰੇ ਦਾ ਵਿਰੋਧ ਕਰ ਰਹੇ ਹਨ ਕਿਉਂਕਿ ਸੀਪੀਈਸੀ ਰੂਟ ਬਲੋਚਿਸਤਾਨ ਵਿੱਚੋਂ ਲੰਘਦਾ ਹੈ। ਬੀਐਲਏ ਦਾ ਕਹਿਣਾ ਹੈ ਕਿ ਚੀਨ ਉਨ੍ਹਾਂ ਦੇ ਸਰੋਤਾਂ ਦੀ ਚੋਰੀ ਕਰ ਰਿਹਾ ਹੈ। ਇਸ ਕਾਰਨ ਉਹ ਚੀਨੀ ਨਾਗਰਿਕਾਂ ਅਤੇ ਉਨ੍ਹਾਂ ਦੀ ਸੁਰੱਖਿਆ ਕਰਨ ਵਾਲੇ ਪਾਕਿਸਤਾਨੀ ਸੁਰੱਖਿਆ ਬਲਾਂ ਨੂੰ ਨਿਸ਼ਾਨਾ ਬਣਾ ਰਹੇ ਹਨ।
ਸ਼ੈਰੀ ਬਲੋਚ ਵੀ ਇਸ ਵਿਦਰੋਹ ਦਾ ਹਿੱਸਾ ਸੀ ਜਿਸ ਨੇ ਚੀਨੀ ਅਧਿਆਪਕਾਂ ਨੂੰ ਮਾਰਿਆ ਸੀ। ਬੀਐਲਏ ਦੇ ਅਨੁਸਾਰ, ਸ਼ੈਰੀ ਸਮੂਹ ਦੀ ਪਹਿਲੀ ਮਹਿਲਾ ਬੰਬਾਰ ਸੀ। ਬੀਐਲਏ ਨੇ ਇੱਕ ਲਿਖਤੀ ਬਿਆਨ ਵਿੱਚ ਕਿਹਾ, “ਸ਼ੈਰੀ ਬਲੋਚ ਨੇ ਬਲੋਚ ਵਿਦਰੋਹ ਦੇ ਇਤਿਹਾਸ ਵਿੱਚ ਇੱਕ ਨਵਾਂ ਅਧਿਆਏ ਜੋੜਿਆ ਹੈ।”
