ਅੰਮ੍ਰਿਤਸਰ, 20 ਮਈ 2022 – ਪੰਜਾਬ ਪੁਲਿਸ ਦੇ ਸਟੇਟ ਸਪੈਸ਼ਲ ਆਪ੍ਰੇਸ਼ਨ ਸੈੱਲ (SSOC) ਵੱਲੋਂ ਫੜੇ ਗਏ ਮੁਹੰਮਦ ਜ਼ਫਰ ਰਿਆਜ਼ ਨੇ ਪਾਕਿਸਤਾਨ ਦੇ ਨਾਪਾਕ ਇਰਾਦਿਆਂ ਦੀ ਕਹਾਣੀ ਸੁਣਾਈ ਹੈ, ਜਿਸ ਨੂੰ ਸੁਣ ਕੇ ਭਾਰਤ ਦੀਆਂ ਖੁਫੀਆ ਏਜੰਸੀਆਂ ਵੀ ਚੌਕਸ ਹੋ ਗਈਆਂ ਹਨ। ਫਿਲਹਾਲ ਰਿਆਜ਼ ਅਤੇ ਸ਼ਮਸ਼ਾਦ ਦੋ ਦਿਨ ਦੇ ਪੁਲਿਸ ਰਿਮਾਂਡ ‘ਤੇ ਹਨ। ਪੰਜਾਬ ਹੀ ਨਹੀਂ ਦੇਸ਼ ਭਰ ਦੀਆਂ 11 ਏਜੰਸੀਆਂ ਉਸ ਤੋਂ ਪੁੱਛਗਿੱਛ ਕਰ ਰਹੀਆਂ ਹਨ।
ਅਦਾਲਤ ਵਿੱਚ ਪੇਸ਼ੀ ਦੌਰਾਨ ਰਿਆਜ਼ ਨੇ ਦੱਸਿਆ ਕਿ ਪਾਕਿਸਤਾਨ ਵਿੱਚ ਆਈਐਸਆਈ ਦੇ ਏਜੰਟ ਨੇ ਉਸ ਨੂੰ ਫਸਾਇਆ ਹੈ। ਉਸਦੇ ਦੋਵੇਂ ਬੱਚੇ ਅਤੇ ਪਤਨੀ ਪਾਕਿਸਤਾਨ ਵਿੱਚ ਕੈਦ ਹਨ। ਉਸ ਦਾ ਵੀਜ਼ਾ ਵਧਾਉਣ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾ ਰਹੀ ਹੈ। ਪਾਕਿਸਤਾਨੀ ਏਜੰਟਾਂ ਨੇ ਰਿਆਜ਼ ਨੂੰ ਸਪੱਸ਼ਟ ਕੀਤਾ ਕਿ ਪਹਿਲਾਂ ਉਹ ਭਾਰਤ ਜਾ ਕੇ ਫ਼ੌਜ ਦੀ ਜਾਣਕਾਰੀ ਅਤੇ ਤਸਵੀਰਾਂ ਭੇਜੇ। ਇਸ ਤੋਂ ਬਾਅਦ ਹੀ ਉਸ ਨੂੰ ਪਾਕਿਸਤਾਨ ਦਾ ਵੀਜ਼ਾ ਦਿੱਤਾ ਜਾਵੇਗਾ। ਉਹ ਆਪਣੀ ਪਤਨੀ ਅਤੇ ਬੱਚਿਆਂ ਨੂੰ ਮਿਲ ਸਕੇਗਾ। ਉਸ ਨੂੰ ਸਿਰਫ਼ ਬੱਚਿਆਂ ਅਤੇ ਪਤਨੀ ਦੀ ਖ਼ਾਤਰ ਆਪਣੇ ਦੇਸ਼ ਨਾਲ ਗੱਦਾਰੀ ਕਰਨੀ ਪਈ।
ਰਿਆਜ਼ ਪਹਿਲਾਂ ਹੀ ਪੁਲਿਸ ਨੂੰ ਦੱਸ ਚੁੱਕਾ ਹੈ ਕਿ ਉਹ 2005 ਵਿੱਚ ਪਾਕਿਸਤਾਨ ਗਿਆ ਸੀ, ਜਿੱਥੇ ਉਸਦੀ ਮੁਲਾਕਾਤ ਰਾਬੀਆ ਨਾਲ ਹੋਈ ਸੀ। ਦੋਹਾਂ ਨੂੰ ਪਿਆਰ ਹੋ ਗਿਆ ਅਤੇ ਦੋਹਾਂ ਨੇ ਵਿਆਹ ਕਰਵਾ ਲਿਆ। ਜਦੋਂ ਰਿਆਜ਼ ਦਾ ਉੱਥੇ ਐਕਸੀਡੈਂਟ ਹੋਇਆ ਤਾਂ ਉਹ ਉੱਥੇ ਹੀ ਟਿਕ ਗਿਆ। ਰਾਬੀਆ ਨੇ ਉਸ ਨੂੰ ਆਈਐਸਆਈ ਅਧਿਕਾਰੀ ਅਵੇਸ਼ ਨਾਲ ਮਿਲਾਇਆ। ਕਈ ਵਾਰ ਉਹ ਰਾਬੀਆ ਨੂੰ ਵੀ ਭਾਰਤ ਲੈ ਕੇ ਆਇਆ ਸੀ।
ਵੀਜ਼ਾ ਖਤਮ ਹੋਣ ਤੋਂ ਬਾਅਦ ਉਹ ਆਪਣੀ ਪਤਨੀ ਅਤੇ ਬੱਚੇ ਨਾਲ ਪਾਕਿਸਤਾਨ ਚਲਿਆ ਜਾਂਦਾ ਸੀ। ਪਰ ਇਸ ਵਾਰ ਰਿਆਜ਼ ਨੂੰ ਪਾਕਿਸਤਾਨ ‘ਚ ਰਹਿਣ ਲਈ ਪਾਕਿਸਤਾਨ ਦਾ ਵੀਜ਼ਾ ਚਾਹੀਦਾ ਸੀ। ਵੀਜ਼ੇ ਦੀ ਮਿਆਦ ਖਤਮ ਹੋਣ ਤੋਂ ਬਾਅਦ ਉਹ ਭਾਰਤ ਆ ਕੇ ਭਾਰਤੀ ਫੌਜ ਦੀ ਜਾਣਕਾਰੀ ਇਕੱਠੀ ਕਰਕੇ ਪਾਕਿਸਤਾਨ ਭੇਜਦਾ ਸੀ। ਪਿਛਲੇ 17 ਸਾਲਾਂ ਤੋਂ ਉਹ ਭਾਰਤੀ ਫੌਜ ਤੋਂ ਜਾਣਕਾਰੀ ਇਕੱਠੀ ਕਰਕੇ ਪਾਕਿਸਤਾਨ ਨੂੰ ਭੇਜ ਰਿਹਾ ਸੀ।
