- ਟਿਊਬਵੈੱਲ ਦੇ ਟੋਏ ‘ਚ ਨਹਾਉਂਦੇ ਸਮੇਂ ਹੋਇਆ ਹਾਦਸਾ
ਕਪੂਰਥਲਾ, 26 ਜੂਨ 2022 – ਪੰਜਾਬ ਦੇ ਕਪੂਰਥਲਾ ਜ਼ਿਲੇ ਦੇ ਪਿੰਡ ਕਬੀਰਪੁਰ (ਸੁਲਤਾਨਪੁਰ ਲੋਧੀ) ‘ਚ ਸ਼ਨੀਵਾਰ ਦੁਪਹਿਰ ਨੂੰ ਟਿਊਬਵੈੱਲ ਨਾਲ ਬਣੇ ਟੋਏ ‘ਚ ਨਹਾਉਂਦੇ ਸਮੇਂ ਪਾਣੀ ਦੀ ਸਪਲਾਈ ਲਈ ਵਿਛਾਈ ਪਾਈਪ ‘ਚ ਤਿੰਨ ਸਾਲ ਦਾ ਬੱਚਾ ਫਸ ਗਿਆ। ਪਿੰਡ ਵਾਸੀਆਂ ਨੇ ਬਚਾਅ ਕਾਰਜ ਚਲਾ ਕੇ ਕਰੀਬ ਡੇਢ ਘੰਟੇ ਬਾਅਦ ਬੱਚੇ ਨੂੰ ਜ਼ਿੰਦਾ ਬਾਹਰ ਕੱਢ ਲਿਆ।
ਬੱਚੇ ਨੂੰ ਬਾਹਰ ਕੱਢਣ ਲਈ ਪਿੰਡ ਦੇ ਲੋਕਾਂ ਨੇ ਪਹਿਲਾਂ ਖੇਤ ਵਿੱਚ ਦੱਬੀ ਸੀਮਿੰਟ ਦੀ ਵੱਡੀ ਪਾਈਪ ਨੂੰ ਪੁੱਟਿਆ, ਫਿਰ ਬੱਚੇ ਨੂੰ ਬਾਹਰ ਕੱਢਿਆ। ਘਟਨਾ ਉਸ ਸਮੇਂ ਵਾਪਰੀ ਜਦੋਂ ਬੱਚੇ ਦੀ ਮਾਂ ਟਿਊਬਵੈੱਲ ਨੇੜੇ ਖੇਤ ਵਿੱਚ ਕੰਮ ਕਰ ਰਹੀ ਸੀ। ਬੱਚਾ ਖੇਡਦਾ ਖੇਡਦਾ ਟਿਊਬਵੈੱਲ ਵੱਲ ਚਲਾ ਗਿਆ ਅਤੇ ਨਹਾਉਣ ਲੱਗਾ।
ਵੱਡੇ ਟੋਏ ਦੇ ਹੇਠਾਂ ਬਣੇ ਛੋਟੇ ਟੋਏ, ਜਿਸ ਨਾਲ ਖੇਤਾਂ ਨੂੰ ਪਾਣੀ ਦੇਣ ਲਈ ਸੀਮਿੰਟ ਦੀ ਪਾਈਪ ਲੱਗੀ ਹੋਈ ਸੀ, ਉਸ ਵਿੱਚ ਬੱਚਾ ਨਹਾ ਰਿਹਾ ਸੀ। ਨਹਾਉਂਦੇ ਸਮੇਂ ਉਹ ਪਾਣੀ ਦੇ ਤੇਜ਼ ਵਹਾਅ ਨਾਲ ਪਾਈਪ ਵਿੱਚ ਫਸ ਗਿਆ। ਜਦੋਂ ਬੱਚਾ ਪਾਈਪ ‘ਚ ਫਸ ਕੇ ਰੋਣ ਲੱਗਾ ਤਾਂ ਮਾਂ ਨੂੰ ਉਸ ਦੀ ਆਵਾਜ਼ ਸੁਣੀ। ਮਾਂ ਨੇ ਜਦੋਂ ਦੇਖਿਆ ਕਿ ਬੱਚਾ ਪਾਈਪ ‘ਚ ਫਸਿਆ ਹੋਇਆ ਹੈ ਤਾਂ ਉਸ ਨੇ ਨੇੜੇ ਹੀ ਬਣੇ ਮਕਾਨ ‘ਚ ਕੰਮ ਕਰਦੇ ਲੋਕਾਂ ਨੂੰ ਦੱਸਿਆ। ਉਹ ਮੌਕੇ ‘ਤੇ ਦੌੜ ਕੇ ਆਏ। ਪਿੰਡ ਵਾਸੀਆਂ ਨੇ ਖੁਦ ਬੱਚੇ ਨੂੰ ਬਚਾਉਣ ਲਈ ਬਚਾਅ ਮੁਹਿੰਮ ਚਲਾਈ ਅਤੇ ਡੇਢ ਘੰਟੇ ਬਾਅਦ ਪਾਈਪ ਲਾਈਨ ਤੋੜ ਕੇ ਬੱਚੇ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ।
ਬੱਚੇ ਦੇ ਪਾਈਪ ‘ਚ ਫਸਣ ਤੋਂ ਬਾਅਦ ਪੂਰੇ ਇਲਾਕੇ ‘ਚ ਅਫਵਾਹ ਫੈਲ ਗਈ ਕਿ ਬੱਚਾ ਬੋਰਵੈੱਲ ‘ਚ ਫਸ ਗਿਆ ਹੈ ਤਾਂ ਆਸ-ਪਾਸ ਦੇ ਲੋਕ ਮੌਕੇ ‘ਤੇ ਪਹੁੰਚੇ। ਬੱਚੇ ਦੇ ਮਾਤਾ-ਪਿਤਾ ਪਰਵਾਸੀ ਹਨ ਅਤੇ ਦੋਵੇਂ ਖੇਤਾਂ ਵਿੱਚ ਮਜ਼ਦੂਰ ਵਜੋਂ ਕੰਮ ਕਰਦੇ ਹਨ। ਬੱਚੇ ਨੂੰ ਬਾਹਰ ਕੱਢਣ ਤੋਂ ਬਾਅਦ ਉਸ ਨੂੰ ਸੁਲਤਾਨਪੁਰ ਲੋਧੀ ਦੇ ਸਿਵਲ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ।
ਐਸਐਮਓ ਡਾਕਟਰ ਰਵਿੰਦਰ ਪਾਲ ਨੇ ਬੱਚੇ ਦੀ ਹਾਲਤ ਖਤਰੇ ਤੋਂ ਬਾਹਰ ਦੱਸੀ ਹੈ। ਬੱਚੇ ਨੂੰ ਸਿਵਲ ਹਸਪਤਾਲ ਕਪੂਰਥਲਾ ਰੈਫਰ ਕਰ ਦਿੱਤਾ ਗਿਆ ਹੈ। ਇਸ ਸਬੰਧੀ ਸੁਲਤਾਨਪੁਰ ਲੋਧੀ ਦੇ ਐਸਡੀਐਮ ਰਣਦੀਪ ਸਿੰਘ ਗਿੱਲ ਨੇ ਦੱਸਿਆ ਕਿ ਬੱਚਾ ਬੋਰਵੈੱਲ ਵਿੱਚ ਨਹੀਂ ਡਿੱਗਿਆ, ਸਗੋਂ ਖੇਤਾਂ ਵਿੱਚ ਪਾਣੀ ਸਪਲਾਈ ਕਰਨ ਲਈ ਪਾਈ ਪਾਈਪ ਵਿੱਚ ਫਸ ਗਿਆ ਸੀ, ਜਿਸ ਨੂੰ ਪਿੰਡ ਵਾਸੀਆਂ ਨੇ ਤੋੜ ਕੇ ਸੁਰੱਖਿਅਤ ਬਾਹਰ ਕੱਢ ਲਿਆ।
