ਚੰਡੀਗੜ੍ਹ, 5 ਅਗਸਤ 2022 – ਸ਼ਾਹਬਾਦ ‘ਚ ਨੈਸ਼ਨਲ ਹਾਈਵੇ ‘ਤੇ ਆਰਡੀਐਕਸ ਮਿਲਣ ਦੀ ਸੂਚਨਾ ‘ਤੇ ਸ਼ਾਹਬਾਦ ‘ਚ ਸਨਸਨੀ ਫੈਲ ਗਈ। ਉਕਤ ਐੱਸ.ਟੀ.ਐੱਫ. ਦੀ ਟੀਮ ਅਤੇ ਪੁਲਸ ਪ੍ਰਸ਼ਾਸਨ ਨੇ ਮੌਕੇ ‘ਤੇ ਪਹੁੰਚ ਕੇ ਦੇਸੀ ਬੰਬ ਨੂੰ ਨਕਾਰਾ ਕਰ ਦਿੱਤਾ ਅਤੇ ਮੁਲਜ਼ਮ ਨੂੰ ਵੀ ਮੌਕੇ ‘ਤੇ ਗ੍ਰਿਫਤਾਰ ਕਰ ਲਿਆ ਗਿਆ।
ਕੁਰੂਕਸ਼ੇਤਰ ਦੇ ਅੰਬਾਲਾ-ਸ਼ਾਹਾਬਾਦ ਹਾਈਵੇਅ ਤੋਂ ਮਿਲੇ ਵਿਸਫੋਟਕ (ਆਈਈਡੀ) ਡਰੋਨ ਰਾਹੀਂ ਆਏ ਸਨ। ਵਿਸਫੋਟਕ ਵਿੱਚ ਕਰੀਬ 1.30 ਕਿਲੋ ਆਰਡੀਐਕਸ, ਟਾਈਮਰ, ਬੈਟਰੀ, ਡੈਟੋਨੇਟਰ ਅਤੇ ਇਨਵਰਟਰ ਸੀ। ਇਸ ਵਿੱਚ 9 ਘੰਟੇ ਦਾ ਟਾਈਮਰ ਸੀ। ਇਸ ਕਾਰਨ ਇਹ ਧਮਾਕਾ ਸੁਤੰਤਰਤਾ ਦਿਵਸ ਯਾਨੀ 15 ਅਗਸਤ ਤੋਂ ਪਹਿਲਾਂ ਕੀਤਾ ਜਾਣਾ ਸੀ। ਇਸ ਦੀਆਂ ਤਾਰਾਂ ਪਾਕਿਸਤਾਨ ਅਤੇ ਉਥੇ ਬੈਠੇ ਖੌਫਨਾਕ ਗੈਂਗਸਟਰ ਅੱਤਵਾਦੀ ਹਰਵਿੰਦਰ ਰਿੰਦਾ ਨਾਲ ਜੁੜ ਰਹੀਆਂ ਹਨ।
ਫੜੇ ਗਏ ਮੁਲਜ਼ਮ ਸ਼ਮਸ਼ੇਰ ਸਿੰਘ ਤੋਂ ਮੁੱਢਲੀ ਪੁੱਛਗਿੱਛ ਦੌਰਾਨ ਪਤਾ ਲੱਗਾ ਕਿ ਉਸ ਨੂੰ ਇਹ ਵਿਸਫੋਟਕ ਸ਼ਾਹਾਬਾਦ ਵਿੱਚ ਰੱਖਣ ਲਈ ਕਿਹਾ ਗਿਆ ਸੀ। ਜੂਨ ਦੇ ਮਹੀਨੇ ਉਸ ਨੇ ਇਸ ਨੂੰ ਜੰਗਲ ਦੇ ਕਿਨਾਰੇ ਇਕ ਦਰੱਖਤ ਹੇਠਾਂ ਲਿਫਾਫੇ ਵਿਚ ਪਾ ਕੇ ਰੱਖਿਆ। ਉਥੋਂ ਕਿਸੇ ਹੋਰ ਨੇ ਲੈਣਾ ਸੀ। ਇਸ ਪੂਰੇ ਕੰਮ ਵਿੱਚ 4-5 ਹੋਰ ਲੋਕ ਸ਼ਾਮਲ ਹਨ।
ਮੁੱਢਲੀ ਪੁਲਿਸ ਜਾਂਚ ਅਨੁਸਾਰ ਪੰਜਾਬ ਦੇ ਤਰਨਤਾਰਨ ਦਾ ਰਹਿਣ ਵਾਲਾ 25 ਸਾਲਾ ਮੁਲਜ਼ਮ ਸ਼ਮਸ਼ੇਰ ਸਿੰਘ ਦਹਿਸ਼ਤੀ ਮਾਡਿਊਲ ਦਾ ਹਿੱਸਾ ਹੈ। ਉਸ ਨੇ ਇਹ ਵਿਸਫੋਟਕ, ਥਾਂ ਦੀ ਫੋਟੋ ਅਤੇ ਲੋਕੇਸ਼ਨ ਵਿਦੇਸ਼ ਬੈਠੇ ਹੈਂਡਲਰ ਨੂੰ ਭੇਜਣੀ ਸੀ। ਫਿਰ ਉਸਦੇ ਦੂਜੇ ਗੁਰਗੇ ਨੇ ਉਸਨੂੰ ਅੱਗੇ ਲਿਜਾਣਾ ਸੀ। ਇਸ ਤੋਂ ਪਹਿਲਾਂ ਵੀ ਪੁਲਿਸ ਨੇ ਸ਼ਮਸ਼ੇਰ ਨੂੰ ਫੜ ਲਿਆ ਸੀ। ਉਸ ਕੋਲੋਂ ਮੌਕੇ ਤੋਂ ਵਿਸਫੋਟਕ ਬਰਾਮਦ ਹੋਇਆ।
ਵਿਦੇਸ਼ ਵਿੱਚ ਬੈਠੇ ਹੈਂਡਲਰ ਨੇ ਇਹ ਕੰਮ ਸ਼ਮਸ਼ੇਰ ਤੋਂ ਮੋਬਾਈਲ ਰਾਹੀਂ ਕਰਵਾਇਆ। ਪੁਲੀਸ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਇਸ ਕੰਮ ਲਈ ਸ਼ਮਸ਼ੇਰ ਨੂੰ ਪੈਸੇ ਅਤੇ ਨਸ਼ੇ ਦੀ ਪੇਸ਼ਕਸ਼ ਕੀਤੀ ਗਈ ਸੀ। ਇੱਥੇ ਵਿਸਫੋਟਕ ਰੱਖ ਕੇ ਸ਼ਮਸ਼ੇਰ ਦੀ ਭੂਮਿਕਾ ਖਤਮ ਹੋ ਗਈ ਸੀ। ਉਸ ਦੇ ਮੋਬਾਈਲ ਤੋਂ ਕਾਲ ਕਿਸ ਨੇ ਕੀਤੀ ਅਤੇ ਉਸ ਨੇ ਬੰਬ ਦੀ ਲੋਕੇਸ਼ਨ ਅਤੇ ਫੋਟੋ ਕਿਸ ਨੂੰ ਭੇਜੀ, ਇਸ ਲਈ ਉਸ ਦੇ ਮੋਬਾਈਲ ਦੀ ਫੋਰੈਂਸਿਕ ਜਾਂਚ ਕੀਤੀ ਜਾ ਰਹੀ ਹੈ। ਪੁਲਿਸ ਬੰਬ ਦੀ ਫੋਰੈਂਸਿਕ ਜਾਂਚ ਵੀ ਕਰ ਰਹੀ ਹੈ ਕਿ ਇਹ ਕਿੰਨਾ ਸ਼ਕਤੀਸ਼ਾਲੀ ਸੀ।
ਹਰਿਆਣਾ ਪੁਲੀਸ ਨੇ ਇਸ ਮਾਮਲੇ ਵਿੱਚ ਗ੍ਰਿਫ਼ਤਾਰ ਕੀਤੇ ਗਏ ਅਤਿਵਾਦੀ ਗਰੁੱਪ ਵਿੱਚ ਸ਼ਾਮਲ ਸ਼ਮਸ਼ੇਰ ਸਿੰਘ ਦੇ ਰਿਕਾਰਡ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਇਸ ਸਬੰਧੀ ਪੰਜਾਬ ਪੁਲਿਸ ਨਾਲ ਸੰਪਰਕ ਕਰਕੇ ਜਾਣਕਾਰੀ ਹਾਸਲ ਕੀਤੀ ਜਾ ਰਹੀ ਹੈ। ਉਸ ਦੇ ਪੁਰਾਣੇ ਅਪਰਾਧਿਕ ਰਿਕਾਰਡ, ਦਰਜ ਕੇਸ ਬਾਰੇ ਵੇਰਵੇ ਇਕੱਠੇ ਕੀਤੇ ਜਾ ਰਹੇ ਹਨ। ਪੰਜਾਬ ਪੁਲਿਸ ਵੀ ਆਪਣੇ ਪੱਧਰ ‘ਤੇ ਸ਼ਮਸ਼ੇਰ ਦੇ ਵੇਰਵੇ ਦੀ ਜਾਂਚ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ। ਪੰਜਾਬ ਪੁਲਿਸ ਨੂੰ ਸ਼ੱਕ ਹੈ ਕਿ ਉਹ ਬੰਬ ਨੂੰ ਡਰੋਨ ਰਾਹੀਂ ਹਰਿਆਣਾ ਲੈ ਕੇ ਗਏ ਸਨ। ਸ਼ਮਸ਼ੇਰ ਪੰਜਾਬ ਵਿੱਚ ਕਰਿਆਨੇ ਦੀ ਦੁਕਾਨ ਚਲਾਉਂਦਾ ਹੈ।
