ਮੁਕੇਰੀਆਂ, 10 ਅਗਸਤ 2022 – ਪੰਜਾਬ ਦੇ ਮੁਕੇਰੀਆਂ ‘ਚ ਸ਼ਰਾਬ ਦੇ ਠੇਕਿਆਂ ਖਿਲਾਫ ਔਰਤਾਂ ਦਾ ਗੁੱਸਾ ਫੁੱਟ ਕੇ ਸਾਹਮਣੇ ਆਇਆ ਹੈ। ਮੁਕੇਰੀਆਂ ਦੇ ਪਿੰਡ ਸਿੰਗੋਵਾਲ ਅਤੇ ਬੰਬੇਵਾਲ ਦੀਆਂ ਔਰਤਾਂ ਨੇ ਠੇਕੇ ’ਤੇ ਪੁੱਜ ਅੰਦਰ ਪਈਆਂ ਬੋਤਲਾਂ ਨੂੰ ਚੁੱਕ ਕੇ ਬਾਹਰ ਸੁੱਟ ਦਿੱਤਾ ਅਤੇ ਬੋਤਲਾਂ ਖੋਲ੍ਹ ਕੇ ਸ਼ਰਾਬ ਡੋਲ ਦਿੱਤੀ। ਇਸ ਤੋਂ ਬਾਅਦ ਸਾਮਾਨ ਚੁੱਕ ਕੇ ਠੇਕੇ ਨੂੰ ਤਾਲਾ ਲਗਾ ਦਿੱਤਾ। ਉਨ੍ਹਾਂ ਕਿਹਾ ਕਿ ਆਮ ਆਦਮੀ ਪਾਰਟੀ ਦੀ ਸਰਕਾਰ ਤੋਂ ਬਦਲਾਅ ਦੀ ਉਮੀਦ ਸੀ ਪਰ ਠੇਕਿਆਂ ਦੀ ਗਿਣਤੀ ਹੀ ਵਧੀ ਹੈ। ਉਹ ਪਿੰਡ ਨੂੰ ਬਰਬਾਦ ਕਰਨ ਲਈ ਸ਼ਰਾਬ ਦੇ ਠੇਕੇ ਨਹੀਂ ਖੋਲ੍ਹਣ ਦੇਣਗੇ।
ਔਰਤਾਂ ਨੇ ਕਿਹਾ ਕਿ ਭੈਣ-ਭਰਾ ਦੁੱਧ ਲੈਣ ਜਾਂ ਸੈਰ ਕਰਨ ਜਾਣ ਤਾਂ ਬਹੁਤ ਔਖਾ ਹੈ। ਅਸੀਂ ਇੱਥੇ ਠੇਕੇ ਨਹੀਂ ਖੋਲ੍ਹਣ ਦੇਵਾਂਗੇ। ਸਾਡਾ ਪਿੰਡ ਤਾਂ ਪਹਿਲਾਂ ਹੀ ਸ਼ਰਾਬ ਨੇ ਬਰਬਾਦ ਕਰ ਦਿੱਤਾ ਹੈ। ਹੋਰ ਤਾਂ ਹੋਰ ਅੱਗੇ ਕਿਹੜਾ ਨਸ਼ਾ ਘੱਟ ਵਿਕਦਾ ਹੈ, ਜਿਸ ਕਾਰਨ ਇੱਥੇ ਠੇਕਾ ਖੁੱਲ੍ਹ ਗਿਆ। ਜਦੋਂ ਸਾਡੀਆਂ ਧੀਆਂ ਜਾਂਦੀਆਂ ਹਨ ਤਾਂ ਸ਼ਰਾਬੀ ਉਨ੍ਹਾਂ ਨੂੰ ਛੇੜਦੇ ਹਨ। ਇੱਥੋਂ ਤੱਕ ਕਿ ਪਿੰਡ ਦੇ ਸਰਪੰਚ ਨੂੰ ਵੀ ਇਸ ਦੀ ਸੂਚਨਾ ਨਹੀਂ ਦਿੱਤੀ ਗਈ।
ਔਰਤਾਂ ਨੇ ਕਿਹਾ ਕਿ ਜੇਕਰ ਆਮ ਆਦਮੀ ਪਾਰਟੀ (ਆਪ) ਦੀ ਸਰਕਾਰ ਇੱਥੇ ਲਾਇਬ੍ਰੇਰੀ ਖੋਲ੍ਹਦੀ ਹੈ ਤਾਂ ਬੱਚੇ ਕੁਝ ਨਾ ਕੁਝ ਪੜ੍ਹਨਗੇ। ਜੇਕਰ ਡਿਸਪੈਂਸਰੀ ਖੁੱਲ੍ਹ ਜਾਂਦੀ ਹੈ ਤਾਂ ਲੋਕਾਂ ਦਾ ਇਲਾਜ ਹੋਵੇਗਾ। ਰੁਜ਼ਗਾਰ ਦੇ ਕੁਝ ਸਰੋਤ ਖੋਲ੍ਹੋ, ਇੱਥੇ ਇੱਕ ਜਿੰਮ ਖੋਲ੍ਹਿਆ ਜਾਵੇ ਤਾਂ ਜੋ ਨੌਜਵਾਨ ਕਸਰਤ ਕਰ ਸਕਣ। ਸ਼ਰਾਬ ਦੇ ਠੇਕੇ ਖੋਲ੍ਹ ਕੇ ਲੋਕਾਂ ਨੂੰ ਕਿਉਂ ਬਰਬਾਦ ਕੀਤਾ ਜਾ ਰਿਹਾ ਹੈ ? ਉਨ੍ਹਾਂ ਸੀਐਮ ਭਗਵੰਤ ਮਾਨ ਤੋਂ ਮੰਗ ਕੀਤੀ ਕਿ ਉਨ੍ਹਾਂ ਨੇ ਬਦਲਾਅ ਲਈ ਵੋਟ ਪਾਈ ਸੀ ਪਰ ਠੇਕਿਆਂ ਦੀ ਗਿਣਤੀ ਵਧਾਈ ਜਾ ਰਹੀ ਹੈ। ਉਸ ਨੂੰ ਇਹ ਠੇਕਾ ਤੁਰੰਤ ਬੰਦ ਕਰਨਾ ਚਾਹੀਦਾ ਹੈ।
