- ਇਨ੍ਹਾਂ ਵਿੱਚ ਗਰੁੱਪ ਕੈਪਟਨ, ਵਿੰਗ ਕਮਾਂਡਰ ਅਤੇ ਸਕੁਐਡਰਨ ਲੀਡਰ ਸ਼ਾਮਲ ਸਨ।
ਨਵੀਂ ਦਿੱਲੀ, 24 ਅਗਸਤ 2022 – 9 ਮਾਰਚ ਨੂੰ ਭਾਰਤ ਦੀ ਇੱਕ ਬ੍ਰਹਮੋਸ ਮਿਜ਼ਾਈਲ (ਇਸ ਵਿੱਚ ਵਾਰ ਹੈਡ ਭਾਵ ਹਥਿਆਰ ਨਹੀਂ ਸਨ) ਪਾਕਿਸਤਾਨ ਦੇ ਮੀਆਂ ਚੰਨੂ ਸ਼ਹਿਰ ਵਿੱਚ ਡਿੱਗੀ ਸੀ। ਗਲਤੀ ਨਾਲ ਦਾਗੀ ਗਈ ਇਸ ਮਿਜ਼ਾਈਲ ‘ਤੇ ਅਫਸੋਸ ਪ੍ਰਗਟ ਕਰਦੇ ਹੋਏ ਭਾਰਤ ਨੇ ਜਾਂਚ ਦਾ ਭਰੋਸਾ ਦਿੱਤਾ ਸੀ। ਹੁਣ ਇਸ ਮਾਮਲੇ ਵਿੱਚ ਭਾਰਤੀ ਹਵਾਈ ਸੈਨਾ ਦੇ ਤਿੰਨ ਅਧਿਕਾਰੀਆਂ ਨੂੰ ਬਰਖਾਸਤ ਕਰ ਦਿੱਤਾ ਹੈ।
ਭਾਰਤੀ ਹਵਾਈ ਸੈਨਾ (ਆਈਏਐਫ) ਦੇ ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਜਿਨ੍ਹਾਂ ਅਧਿਕਾਰੀਆਂ ਨੂੰ ਨੌਕਰੀ ਤੋਂ ਬਰਖਾਸਤ ਕੀਤਾ ਗਿਆ ਹੈ, ਉਨ੍ਹਾਂ ਵਿੱਚ ਇੱਕ ਗਰੁੱਪ ਕੈਪਟਨ, ਇੱਕ ਵਿੰਗ ਕਮਾਂਡਰ ਅਤੇ ਇੱਕ ਸਕੁਐਡਰਨ ਲੀਡਰ ਸ਼ਾਮਲ ਹੈ।
ਕੇਂਦਰ ਸਰਕਾਰ ਦੇ ਇਸ ਹੁਕਮ ਨੂੰ ਵੀ ਤੁਰੰਤ ਲਾਗੂ ਕਰ ਦਿੱਤਾ ਗਿਆ ਹੈ। 23 ਅਗਸਤ ਨੂੰ ਸਬੰਧਤ ਹਵਾਈ ਸੈਨਾ ਦੇ ਅਧਿਕਾਰੀਆਂ ਨੂੰ ਇਸ ਹੁਕਮ ਦੀ ਜਾਣਕਾਰੀ ਦਿੱਤੀ ਗਈ ਸੀ। ਇਹ ਜਾਣਕਾਰੀ ਭਾਰਤੀ ਹਵਾਈ ਸੈਨਾ ਨੇ ਦਿੱਤੀ ਹੈ। ਪਾਕਿਸਤਾਨ ਦੇ ਤਤਕਾਲੀ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਨੇ ਇਸ ‘ਤੇ ਉਦੋਂ ਕਿਹਾ ਸੀ ਕਿ ਭਾਰਤੀ ਮਿਜ਼ਾਈਲ ਪਾਕਿਸਤਾਨ ‘ਚ ਡਿੱਗਣ ਤੋਂ ਬਾਅਦ ਅਸੀਂ ਜਵਾਬੀ ਕਾਰਵਾਈ ਕਰ ਸਕਦੇ ਸੀ ਪਰ ਅਸੀਂ ਸੰਜਮ ਰੱਖਿਆ।
ਇਹ ਖੁਲਾਸਾ ਪਾਕਿਸਤਾਨੀ ਫੌਜ ਦੇ ਮੀਡੀਆ ਵਿੰਗ ਇੰਟਰ-ਸਰਵਿਸਜ਼ ਪਬਲਿਕ ਰਿਲੇਸ਼ਨਜ਼ (ਆਈਐਸਪੀਆਰ) ਦੇ ਡੀਜੀ ਮੇਜਰ ਜਨਰਲ ਬਾਬਰ ਇਫ਼ਤਿਖਾਰ ਨੇ ਘਟਨਾ ਵਾਲੇ ਦਿਨ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਕੀਤਾ। ਬਾਬਰ ਨੇ ਕਿਹਾ ਸੀ – ਭਾਰਤ ਦੁਆਰਾ ਸਾਡੇ ਦੇਸ਼ ‘ਤੇ ਜੋ ਵੀ ਚੀਜ਼ ਦਾਗੀ ਗਈ ਹੈ, ਇਸ ਨੂੰ ਸੁਪਰਸੋਨਿਕ ਫਲਾਇੰਗ ਆਬਜੈਕਟ ਜਾਂ ਮਿਜ਼ਾਈਲ ਕਹਿ ਸਕਦੇ ਹੋ।
ਇਸ ਵਿੱਚ ਕੋਈ ਹਥਿਆਰ ਜਾਂ ਗੋਲਾ ਬਾਰੂਦ ਨਹੀਂ ਸੀ। ਇਸ ਲਈ, ਕੋਈ ਤਬਾਹੀ ਨਹੀਂ ਹੋਈ। ਬਾਬਰ ਦੀ ਪ੍ਰੈੱਸ ਕਾਨਫਰੰਸ ਤੋਂ ਪਹਿਲਾਂ ਪਾਕਿਸਤਾਨੀ ਮੀਡੀਆ ‘ਚ ਅਜਿਹੀਆਂ ਖਬਰਾਂ ਆਈਆਂ ਸਨ ਕਿ ਮੀਆਂ ਚੰਨੂ ਇਲਾਕੇ ‘ਚ ਇਕ ਭਾਰਤੀ ਨਿੱਜੀ ਜਹਾਜ਼ ਕਰੈਸ਼ ਹੋ ਗਿਆ ਸੀ। ਪਾਕਿਸਤਾਨੀ ਫ਼ੌਜ ਵੀ ਘਟਨਾ ਵਾਲੀ ਥਾਂ ਨੂੰ ਮੁਲਤਾਨ ਨੇੜੇ ਮੀਆਂ ਚੰਨੂ ਦੱਸ ਰਹੀ ਸੀ।
ਡੀਜੀ ਆਈਐਸਪੀਆਰ ਨੇ ਕਿਹਾ- 9 ਮਾਰਚ ਨੂੰ ਸ਼ਾਮ 6.43 ਵਜੇ ਭਾਰਤ ਤੋਂ ਪਾਕਿਸਤਾਨ ਵੱਲ ਬਹੁਤ ਤੇਜ਼ ਰਫ਼ਤਾਰ ਨਾਲ ਇੱਕ ਮਿਜ਼ਾਈਲ ਦਾਗੀ ਗਈ। ਸਾਡੀ ਹਵਾਈ ਰੱਖਿਆ ਪ੍ਰਣਾਲੀ ਨੇ ਇਸ ਨੂੰ ਰਡਾਰ ‘ਤੇ ਦੇਖਿਆ, ਪਰ ਇਹ ਜਲਦੀ ਹੀ ਮੀਆਂ ਚੰਨੂ ਖੇਤਰ ਵਿੱਚ ਡਿੱਗ ਗਈ । ਸਰਹੱਦ ਤੋਂ ਪਾਕਿਸਤਾਨ ਪਹੁੰਚਣ ਵਿੱਚ 3 ਮਿੰਟ ਲੱਗ ਗਏ। ਸਰਹੱਦ ਤੋਂ ਕੁੱਲ 124 ਕਿਲੋਮੀਟਰ ਦੀ ਦੂਰੀ ਕਵਰ ਕੀਤੀ ਗਈ ਸੀ। ਇਹ 6.50 ‘ਤੇ ਕ੍ਰੈਸ਼ ਹੋ ਗਈ। ਕੁਝ ਘਰਾਂ ਅਤੇ ਜਾਇਦਾਦਾਂ ਨੂੰ ਨੁਕਸਾਨ ਪਹੁੰਚਿਆ। ਇਹ ਮਿਜ਼ਾਈਲ ਭਾਰਤ ਦੇ ਸਿਰਸਾ ਤੋਂ ਦਾਗੀ ਗਈ ਸੀ। ਸਮੇਂ ਅਤੇ ਨਕਸ਼ੇ ਦੀ ਗੱਲ ਕਰੀਏ ਤਾਂ ਇਸ ਪ੍ਰੋਜੈਕਟਾਈਲ (ਹਥਿਆਰਾਂ ਤੋਂ ਬਿਨਾਂ ਮਿਜ਼ਾਈਲ) ਨੇ 261 ਕਿਲੋਮੀਟਰ ਦੀ ਦੂਰੀ 7 ਮਿੰਟ ਵਿੱਚ ਤੈਅ ਕੀਤੀ।
ਬਾਬਰ ਨੇ ਕਿਹਾ ਸੀ- ਸਾਡੀ ਟੀਮ ਨੇ ਇਸ ਮਿਜ਼ਾਈਲ ਦੇ ਉਡਾਣ ਦੇ ਰੂਟ ਦਾ ਪਤਾ ਲਗਾ ਲਿਆ ਹੈ। ਇਹ ਬਹੁਤ ਖਤਰਨਾਕ ਕਦਮ ਹੈ, ਕਿਉਂਕਿ ਜਿਸ ਸਮੇਂ ਇਹ ਮਿਜ਼ਾਈਲ ਦਾਗੀ ਗਈ ਸੀ, ਉਸ ਸਮੇਂ ਭਾਰਤ ਅਤੇ ਪਾਕਿਸਤਾਨ ਦੇ ਹਵਾਈ ਖੇਤਰ ਵਿੱਚ ਕਈ ਉਡਾਣਾਂ ਚੱਲ ਰਹੀਆਂ ਸਨ ਅਤੇ ਕੋਈ ਵੱਡਾ ਹਾਦਸਾ ਵਾਪਰ ਸਕਦਾ ਸੀ। ਭਾਰਤ ਨੂੰ ਇਸ ਮਾਮਲੇ ‘ਤੇ ਸਹੀ ਜਵਾਬ ਦੇਣਾ ਚਾਹੀਦਾ ਹੈ।
ਪਾਕਿਸਤਾਨੀ ਪੱਤਰਕਾਰ ਮੁਹੰਮਦ ਇਬਰਾਹਿਮ ਕਾਜ਼ੀ ਨੇ ਸੋਸ਼ਲ ਮੀਡੀਆ ‘ਤੇ ਦਾਅਵਾ ਕੀਤਾ ਕਿ ਭਾਰਤ ਤੋਂ ਲਾਂਚ ਕੀਤੀ ਗਈ ਮਿਜ਼ਾਈਲ ਦਾ ਨਾਂ ਬ੍ਰਹਮੋਸ ਹੈ। ਇਸ ਦੀ ਰੇਂਜ 290 ਕਿਲੋਮੀਟਰ ਹੈ। ਭਾਰਤੀ ਹਵਾਈ ਸੈਨਾ ਰਾਜਸਥਾਨ ਦੇ ਸ਼੍ਰੀਗੰਗਾਨਗਰ ਵਿੱਚ ਆਪਣਾ ਸਟਾਕ ਰੱਖਦੀ ਹੈ। ਹਾਲਾਂਕਿ ਪਾਕਿਸਤਾਨੀ ਫੌਜ ਦਾ ਦਾਅਵਾ ਹੈ ਕਿ ਇਹ ਮਿਜ਼ਾਈਲ ਹਰਿਆਣਾ ਦੇ ਸਿਰਸਾ ਤੋਂ ਦਾਗੀ ਗਈ ਸੀ।
