ਲੁਧਿਆਣਾ, 9 ਅਕਤੂਬਰ 2022 – ਥਾਣਾ ਡਿਵੀਜ਼ਨ ਨੰਬਰ 2 ਦੀ ਪੁਲੀਸ ਨੇ ਲੁਧਿਆਣਾ ਦੇ ਸੁਭਾਨੀ ਬਿਲਡਿੰਗ ਰੋਡ ’ਤੇ ਸਥਿਤ ਇੱਕ ਹੋਟਲ ਵਿੱਚ ਛਾਪਾ ਮਾਰਿਆ। ਦੱਸਿਆ ਜਾ ਰਿਹਾ ਹੈ ਕਿ ਪੁਲਸ ਨੂੰ ਸੂਚਨਾ ਮਿਲੀ ਸੀ ਕਿ ਹੋਟਲ ‘ਚ ਕੁਝ ਬਾਹਰੀ ਸੂਬਿਆਂ ਤੋਂ ਕਾਰੋਬਾਰੀ ਆਏ ਹਨ। ਕਾਰੋਬਾਰੀਆਂ ਨੇ ਦਿੱਲੀ, ਹਰਿਆਣਾ ਅਤੇ ਮੁੰਬਈ ਤੋਂ ਕੁੜੀਆਂ ਨੂੰ ਮਨੋਰੰਜਨ ਲਈ ਬੁਲਾਇਆ ਹੈ। ਪੁਲਿਸ ਨੇ ਹੋਟਲ ‘ਤੇ ਛਾਪਾ ਮਾਰਿਆ ਅਤੇ ਰੰਗ-ਰਲੀਆਂ ਮਨਾ ਰਹੇ ਕਾਰੋਬਾਰੀਆਂ ਨੂੰ ਮੌਕੇ ‘ਤੇ ਹੀ ਕਾਬੂ ਕਰ ਲਿਆ। ਪੁਲੀਸ ਨੇ ਕਾਰੋਬਾਰੀਆਂ ਅਤੇ ਫੜੀਆਂ ਲੜਕੀਆਂ ਦਾ ਸਿਵਲ ਹਸਪਤਾਲ ਵਿੱਚ ਮੈਡੀਕਲ ਕਰਵਾਇਆ।
ਪੁਲਸ ਨੇ ਉਕਤ ਮਾਮਲੇ ‘ਚ ਹੋਟਲ ਪੁਖਰਾਜ ਦੇ ਮਾਲਕ ਅਤੇ ਮੈਨੇਜਰ ਖਿਲਾਫ ਮਾਮਲਾ ਦਰਜ ਕਰ ਲਿਆ ਹੈ। ਹੋਟਲ ‘ਚ ਫੜੀਆਂ ਗਈਆਂ ਲੜਕੀਆਂ ‘ਚੋਂ 5 ਦਿੱਲੀ ਅਤੇ 2 ਮੁੰਬਈ ਅਤੇ ਹਰਿਆਣਾ ਦੀਆਂ ਹਨ। ਇਸ ਦੇ ਨਾਲ ਹੀ ਕਾਰੋਬਾਰੀਆਂ ਦੀ ਗਿਣਤੀ 25 ਤੋਂ ਵੱਧ ਦੱਸੀ ਜਾ ਰਹੀ ਹੈ। ਪੁਲੀਸ ਨੂੰ ਸੂਚਨਾ ਮਿਲੀ ਤਾਂ ਪੁਲੀਸ ਨੇ ਛਾਪਾ ਮਾਰ ਕੇ 25 ਵਿਅਕਤੀਆਂ ਨੂੰ ਨਾਮਜ਼ਦ ਕੀਤਾ। ਇਸ ਦੇ ਨਾਲ ਹੀ ਦੋ ਤੋਂ ਤਿੰਨ ਅਣਪਛਾਤੇ ਵਿਅਕਤੀਆਂ ਖਿਲਾਫ ਵੀ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਫੜੇ ਗਏ ਵਿਅਕਤੀਆਂ ਵਿੱਚ ਲੁਧਿਆਣਾ ਤੋਂ ਇਲਾਵਾ ਅੰਮ੍ਰਿਤਸਰ, ਪਟਨਾ ਅਤੇ ਇਲਾਹਾਬਾਦ ਅਤੇ ਦਿੱਲੀ ਦੇ ਕਾਰੋਬਾਰੀ ਸ਼ਾਮਲ ਹਨ।
ਐਫਆਈਆਰ ਮੁਤਾਬਕ ਪੁਲਿਸ ਸੁਭਾਨੀ ਬਿਲਡਿੰਗ ਨੇੜੇ ਨਾਕਾਬੰਦੀ ਕਰਕੇ ਵਾਹਨਾਂ ਦੀ ਚੈਕਿੰਗ ਕਰ ਰਹੀ ਸੀ। ਇਸ ਦੌਰਾਨ ਸੂਚਨਾ ਮਿਲੀ ਸੀ ਕਿ ਹੋਟਲ ‘ਚ ਦੂਜੇ ਰਾਜਾਂ ਦੇ ਕਾਰੋਬਾਰੀਆਂ ਵੱਲੋਂ ਕੁੜੀਆਂ ਨੂੰ ਅਸ਼ਲੀਲ ਡਾਂਸ ਕਰਨ ਲਈ ਲਿਆਇਆ ਜਾ ਰਿਹਾ ਹੈ। ਕਾਰੋਬਾਰੀ ਸ਼ਰਾਬੀ ਹੋ ਕੇ ਕੁੜੀਆਂ ਨਾਲ ਅਸ਼ਲੀਲ ਡਾਂਸ ਕਰ ਰਹੇ ਸਨ। ਮਾਮਲੇ ਨੂੰ ਠੰਢਾ ਕਰਨ ਲਈ ਕਈ ਸਿਆਸੀ ਲੋਕਾਂ ਨੇ ਪੁਲੀਸ ਨੂੰ ਫੋਨ ਵੀ ਕੀਤੇ ਪਰ ਪੁਲੀਸ ਨੇ ਕਿਸੇ ਦੀ ਨਾ ਸੁਣੀ ਗਈ ਤੇ ਕੇਸ ਦਰਜ ਕਰ ਲਿਆ।
