ਲੁਧਿਆਣਾ, 21 ਅਕਤੂਬਰ 2022 – ਲੁਧਿਆਣਾ ‘ਚ ਲੁੱਟ-ਖੋਹ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇਣ ਵਾਲੇ ਬਦਮਾਸ਼ਾਂ ਨੂੰ ਲੋਕਾਂ ਨੇ ਫੜ ਕੇ ਕੁੱਟਿਆ। ਲੋਕਾਂ ਨੇ 3 ਦੋਸ਼ੀਆਂ ਨੂੰ ਫੜ ਕੇ ਪਹਿਲਾਂ ਖੰਭੇ ਨਾਲ ਬੰਨ੍ਹ ਦਿੱਤਾ ਅਤੇ ਫਿਰ ਕੁੱਟਮਾਰ ਕੀਤੀ। ਸ਼ਰਾਰਤੀ ਅਨਸਰਾਂ ਤੋਂ ਟੀਕੇ ਵੀ ਮਿਲੇ ਹਨ। ਮੁਲਜ਼ਮ ਚਿੱਟੇ ਦੇ ਆਦੀ ਹਨ। ਘਟਨਾ ਲੋਹਾਰਾ ਦੇ ਈਸਟਮੈਨ ਚੌਕ ਦੀ ਹੈ।
ਇਲਾਕਾ ਨਿਵਾਸੀ ਰਾਜੂ ਕੁਮਾਰ ਨੇ ਦੱਸਿਆ ਕਿ ਐਤਵਾਰ ਨੂੰ ਉਹ ਸ਼ਰਾਬ ਦੀ ਬੋਤਲ ਲੈਣ ਲਈ ਠੇਕੇ ‘ਤੇ ਗਿਆ ਸੀ। ਉਸ ਦੇ ਕੋਲ ਦੋ ਨੌਜਵਾਨ ਖੜ੍ਹੇ ਸਨ। ਕੁਝ ਦੇਰ ਬਾਅਦ ਨੌਜਵਾਨ ਬਿਨਾਂ ਕੁਝ ਲਏ ਉਥੋਂ ਚਲੇ ਗਏ। ਜਦੋਂ ਨੌਜਵਾਨ ਉੱਥੋਂ ਚਲੇ ਗਏ ਤਾਂ ਉਸ ਨੇ ਆਪਣੀ ਜੇਬ ਵਿਚ ਦੇਖਿਆ ਤਾਂ ਮੋਬਾਈਲ ਗਾਇਬ ਸੀ।
ਇਸ ਦੌਰਾਨ ਜਦੋਂ ਅਸੀਂ ਠੇਕੇ ਦੇ ਨੇੜੇ ਲੱਗੇ ਸੀ.ਸੀ.ਟੀ.ਵੀ ਕੈਮਰੇ ਦੀ ਜਾਂਚ ਕੀਤੀ ਤਾਂ ਪਤਾ ਲੱਗਾ ਕਿ ਉਕਤ ਮੋਬਾਇਲ ਬਦਮਾਸ਼ਾਂ ਨੇ ਜੇਬ ‘ਚੋਂ ਕੱਢ ਲਿਆ। ਕਰੀਬ 1 ਘੰਟੇ ਬਾਅਦ ਉਕਤ ਨੌਜਵਾਨ ਉਸ ਨੂੰ ਲੋਹਾਰਾ ਰੋਡ ‘ਤੇ ਦਿਖ ਗਏ।
ਉਸ ਨੇ ਲੋਕਾਂ ਦੀ ਮਦਦ ਨਾਲ ਤਿੰਨ ਚੋਰਾਂ ਨੂੰ ਫੜ ਲਿਆ। ਲੋਕਾਂ ਨੇ ਸਖ਼ਤੀ ਨਾਲ ਪੁੱਛਿਆ ਤਾਂ ਉਹ ਮੰਨ ਗਿਆ ਕਿ ਉਸ ਨੇ ਚੋਰੀ ਕੀਤੀ ਹੈ। ਚੋਰਾਂ ਨੇ ਭੱਜਣ ਦੀ ਕੋਸ਼ਿਸ਼ ਕੀਤੀ ਪਰ ਲੋਕਾਂ ਨੇ ਉਨ੍ਹਾਂ ਨੂੰ ਦਬੋਚ ਲਿਆ। ਇਸ ਤੋਂ ਬਾਅਦ ਉਨ੍ਹਾਂ ਦੀ ਲੋਕਾਂ ਨੇ ਚੰਗੀ ਤਰ੍ਹਾਂ ਕੁੱਟਮਾਰ ਕੀਤੀ। ਲੋਕਾਂ ਨੇ ਪੁਲੀਸ ਕੰਟਰੋਲ ਰੂਮ ’ਤੇ ਫੋਨ ਕਰਕੇ ਪੀਸੀਆਰ ਦਸਤੇ ਨੂੰ ਮੌਕੇ ’ਤੇ ਬੁਲਾਇਆ। ਮੁਲਜ਼ਮਾਂ ਨੂੰ ਕੰਗਣਵਾਲ ਚੌਕੀ ਲਿਜਾਇਆ ਗਿਆ। ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ
ਦੱਸਿਆ ਜਾ ਰਿਹਾ ਹੈ ਕਿ ਫੜੇ ਗਏ ਮੁਲਜ਼ਮਾਂ ਕੋਲੋਂ ਇਕ ਬੈਗ ਵੀ ਮਿਲਿਆ ਹੈ। ਉਸ ਬੈਗ ਵਿੱਚੋਂ ਕੱਪੜੇ ਮਿਲੇ ਹਨ। ਮੁਲਜ਼ਮ ਨੇ ਪੁੱਛਗਿੱਛ ਦੌਰਾਨ ਦੱਸਿਆ ਕਿ ਉਹ ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਬਾਅਦ ਕੱਪੜੇ ਬਦਲਦੇ ਸੀ ਤਾਂ ਜੋ ਲੋਕ ਉਸ ਦੀ ਪਛਾਣ ਨਾ ਕਰ ਸਕਣ। ਬਦਮਾਸ਼ ਚੋਰਾਂ ਨੇ ਖੁਦ ਕਬੂਲ ਕੀਤਾ ਕਿ ਮੋਬਾਈਲ ਉਨ੍ਹਾਂ ਨੇ ਚੋਰੀ ਕੀਤਾ ਹੈ ਅਤੇ ਉਹ ਚਿੱਟੇ ਦਾ ਨਸ਼ਾ ਲੈਂਦੇ ਹਨ। ਨਸ਼ੇ ਦੀ ਪੂਰਤੀ ਲਈ ਜੁਰਮ ਕਰਦੇ ਸਨ।
