- ਜਾਅਲੀ ਦਸਤਾਵੇਜ਼ਾਂ ਨਾਲ ਖੋਲ੍ਹਿਆ ਹੋਇਆ ਸੀ ਬੈਂਕ ‘ਚ ਖਾਤਾ
- ਜਲੰਧਰ ਹਾਈਟਸ ਫਲੈਟ ਤੋਂ ਗ੍ਰਿਫਤਾਰ
ਜਲੰਧਰ, 30 ਅਕਤੂਬਰ 2022 – ਜਲੰਧਰ ਸ਼ਹਿਰ ਦੀ ਪੁਲਿਸ ਨੇ ਇੱਕ ਵਿਦੇਸ਼ੀ ਲੜਕੀ ਨੂੰ ਕਾਬੂ ਕੀਤਾ ਹੈ। ਫੜੀ ਗਈ ਲੜਕੀ ਮੂਲ ਰੂਪ ਤੋਂ ਰੂਸ ਦੀ ਹੈ। ਉਸ ਦੇ ਵੀਜ਼ੇ ਦੀ ਮਿਆਦ ਪੰਜ ਸਾਲ ਪਹਿਲਾਂ ਖਤਮ ਹੋ ਗਈ ਸੀ ਅਤੇ ਉਹ ਇਸ ਤੋਂ ਪਹਿਲਾਂ ਗੈਰ-ਕਾਨੂੰਨੀ ਤੌਰ ‘ਤੇ ਦਿੱਲੀ ਵਿਚ ਰਹਿ ਰਹੀ ਸੀ ਅਤੇ ਪਿਛਲੇ ਸਾਲ ਉਹ ਜਲੰਧਰ ਸ਼ਿਫਟ ਹੋ ਗਈ ਸੀ। ਜਲੰਧਰ ਦੀ ਮਸ਼ਹੂਰ ਹਾਊਸਿੰਗ ਸੁਸਾਇਟੀ ਜਲੰਧਰ ਹਾਈਟਸ ਵਿੱਚ ਪੇਇੰਗ ਗੈਸਟ ਸੀ।
ਗ੍ਰਿਫਤਾਰ ਰੂਸੀ ਲੜਕੀ ਦੀਆਂ ਗਤੀਵਿਧੀਆਂ ਵੀ ਸ਼ੱਕੀ ਪਾਈਆਂ ਗਈਆਂ ਹਨ। ਉਸ ਦਾ ਇਕ ਬੈਂਕ ਖਾਤਾ ਵੀ ਪੁਲਿਸ ਨੇ ਫੜਿਆ ਹੈ, ਜੋ ਉਸ ਨੇ ਭਾਰਤ ਦੇਸ਼ ਦੇ ਜਾਅਲੀ ਦਸਤਾਵੇਜ਼ ਬਣਾ ਕੇ ਖੋਲ੍ਹਿਆ ਸੀ। ਪੁਲਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਸ਼ਹਿਰ ‘ਚ ਵੀ ਕੁਝ ਲੋਕ ਉਸ ਦੇ ਸੰਪਰਕ ‘ਚ ਸਨ ਅਤੇ ਇਹ ਰੂਸੀ ਲੜਕੀ ਅਕਸਰ ਜੰਮੂ-ਕਸ਼ਮੀਰ ਆਉਂਦੀ-ਜਾਂਦੀ ਰਹਿੰਦੀ ਸੀ।
ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਗ੍ਰਿਫਤਾਰ ਰੂਸੀ ਲੜਕੀ ਦਾ ਨਾਂਅ ਇਨੈਲੋ ਹੈ ਅਤੇ ਉਸ ਦੇ ਵੀਜ਼ੇ ਦੀ ਮਿਆਦ 2017 ਵਿੱਚ ਖਤਮ ਹੋ ਗਈ ਸੀ। ਵੀਜ਼ੇ ਦੀ ਮਿਆਦ ਪੁੱਗਣ ਤੋਂ ਬਾਅਦ ਇਨੈਲੋ ਨੇ ਨਾ ਤਾਂ ਆਪਣੇ ਰੂਸੀ ਦੂਤਘਰ ਨਾਲ ਸੰਪਰਕ ਕੀਤਾ ਅਤੇ ਨਾ ਹੀ ਕਿਸੇ ਪੁਲਿਸ ਸਟੇਸ਼ਨ ਨੂੰ ਆਪਣੇ ਬਾਰੇ ਕੋਈ ਜਾਣਕਾਰੀ ਦਿੱਤੀ। ਭਾਰਤ ਦੇਸ਼ ਵਿੱਚ ਰਹਿ ਕੇ, ਆਪਣੇ ਬਾਰੇ ਜਾਣਕਾਰੀ ਛੁਪਾ ਕੇ, ਥਾਂ-ਥਾਂ ਰਹਿ ਰਹੀ ਸੀ।
ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਜਲੰਧਰ ਹਾਈਟਸ ਸਥਿਤ ਫਲੈਟ ਦੇ ਮਾਲਕ ਤੋਂ ਵੀ ਪੁੱਛਗਿੱਛ ਕੀਤੀ ਜਾਵੇਗੀ। ਫਲੈਟ ਦੇ ਮਾਲਕ ਤੋਂ ਵੀ ਦਸਤਾਵੇਜ਼ ਮੰਗੇ ਜਾਣਗੇ ਜਿਸ ਦੇ ਆਧਾਰ ‘ਤੇ ਉਸ ਨੇ ਆਪਣਾ ਫਲੈਟ ਵਿਦੇਸ਼ੀ ਮੂਲ ਦੀ ਲੜਕੀ ਨੂੰ ਕਿਰਾਏ ‘ਤੇ ਦਿੱਤਾ ਸੀ। ਪੁਲਸ ਨੂੰ ਉਸ ਏਜੰਟ ਬਾਰੇ ਵੀ ਪਤਾ ਲੱਗਾ ਹੈ, ਜਿਸ ਨੇ ਵਿਦੇਸ਼ੀ ਲੜਕੀ ਨੂੰ ਜਲੰਧਰ ਹਾਈਟਸ ‘ਚ ਪੁਆਇੰਟ ਗੈਸਟ ਵਜੋਂ ਕਿਰਾਏ ‘ਤੇ ਫਲੈਟ ਦਿੱਤਾ ਸੀ।
