ਬਠਿੰਡਾ, 14 ਦਸੰਬਰ 2022 – ਬਠਿੰਡਾ ਦੀ ਗੋਨਿਆਣਾ ਮੰਡੀ ਵਿੱਚ ਸੋਮਵਾਰ ਸਵੇਰੇ ਸੁਖਮਨੀ ਵਾਲੀ ਗਲੀ ਵਿੱਚ ਕਿਰਾਏਦਾਰ ਔਰਤ ਆਰਤੀ ਦੇ ਕਤਲ ਦਾ ਕਾਤਲ ਉਸ ਦਾ ਪਤੀ ਹੀ ਨਿਕਲਿਆ। ਇਸ ਦੌਰਾਨ ਸ਼ੱਕ ਹੋਰ ਡੂੰਘਾ ਹੋਣ ‘ਤੇ ਆਰਤੀ ਦੇ ਪਤੀ ਸੰਦੀਪ ਤੋਂ ਸਖ਼ਤੀ ਨਾਲ ਪੁੱਛਗਿੱਛ ਕੀਤੀ ਗਈ। ਪੁਲਸ ਪੁੱਛਗਿੱਛ ‘ਚ ਸੰਦੀਪ ਨੇ ਕਬੂਲ ਕੀਤਾ ਕਿ ਉਸ ਨੇ ਆਪਣੀ ਪਤਨੀ ਆਰਤੀ ਦਾ ਕਤਲ ਕੀਤਾ ਹੈ।
ਸੰਦੀਪ ਨੇ ਦੱਸਿਆ ਕਿ ਉਹ ਆਰਤੀ ਦੇ ਚਰਿੱਤਰ ‘ਤੇ ਸ਼ੱਕ ਕਰਦਾ ਸੀ। ਇਸ ਗੱਲ ਨੂੰ ਲੈ ਕੇ ਉਨ੍ਹਾਂ ਵਿਚਕਾਰ ਲੜਾਈ ਹੁੰਦੀ ਰਹਿੰਦੀ ਸੀ। ਪੁਲੀਸ ਨੇ ਮੁਲਜ਼ਮ ਸੰਦੀਪ ਨੂੰ ਗ੍ਰਿਫ਼ਤਾਰ ਕਰਕੇ ਅਦਾਲਤ ਵਿੱਚ ਪੇਸ਼ ਕੀਤਾ। ਪੁਲੀਸ ਨੇ ਮੁਲਜ਼ਮਾਂ ਦਾ ਅਦਾਲਤ ਤੋਂ ਰਿਮਾਂਡ ਹਾਸਲ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਦਰਅਸਲ ਗੋਨਿਆਣਾ ਮੰਡੀ ਡਾ: ਸੁਖਮਨੀ ਵਾਲੀ ਗਲੀ ‘ਚ ਕਿਰਾਏ ‘ਤੇ ਰਹਿ ਰਹੀ ਆਰਤੀ ਦਾ ਸੋਮਵਾਰ ਸਵੇਰੇ ਕਤਲ ਕਰ ਦਿੱਤਾ ਗਿਆ। ਘਟਨਾ ਸਮੇਂ ਮ੍ਰਿਤਕ ਦਾ 4 ਸਾਲਾ ਲੜਕਾ ਸਕੂਲ ਗਿਆ ਹੋਇਆ ਸੀ ਪਰ ਪੁਲਸ ਦੀ ਜਾਂਚ ਨੂੰ ਮੋੜਾ ਦੇਣ ਲਈ ਦੋਸ਼ੀ ਸੰਦੀਪ ਨੇ ਆਰਤੀ ਨੂੰ ਘਟਨਾ ਦੇ ਸਮੇਂ ਘਰ ‘ਚ ਇਕੱਲੀ ਦੱਸਿਆ। ਜਦਕਿ ਸੰਦੀਪ ਨੇ ਕਤਲ ਤੋਂ ਬਾਅਦ ਆਰਤੀ ਦੀ ਲਾਸ਼ ਨੂੰ ਬੈੱਡ ‘ਤੇ ਸੁੱਟ ਕੇ ਰੌਲਾ ਪਾਇਆ। ਜਦੋਂ ਲੋਕ ਇਕੱਠੇ ਹੋ ਗਏ ਤਾਂ ਉਸ ਨੇ ਦੱਸਿਆ ਕਿ ਉਹ ਸੰਤ ਫਿਲਿੰਗ ਸਟੇਸ਼ਨ ਭੋਖੜਾ ਵਿਖੇ ਕਿਸੇ ਕੰਮ ਲਈ ਗਿਆ ਹੋਇਆ ਸੀ। ਪਰ ਜਦੋਂ ਉਹ ਸੋਮਵਾਰ ਦੁਪਹਿਰ ਨੂੰ ਖਾਣਾ ਖਾਣ ਲਈ ਘਰ ਪਹੁੰਚਿਆ ਤਾਂ ਪਤਨੀ ਆਰਤੀ ਦੀ ਲਾਸ਼ ਬੈੱਡ ‘ਤੇ ਪਈ ਸੀ।
ਘਟਨਾ ਦੀ ਸੂਚਨਾ ਮਿਲਣ ’ਤੇ ਥਾਣਾ ਨੇਹੀਆਂਵਾਲਾ ਤੋਂ ਡੀਐਸਪੀ ਦਵਿੰਦਰ ਸਿੰਘ, ਡੀਐਸਪੀ ਰਛਪਾਲ ਸਿੰਘ ਅਤੇ ਮੁੱਖ ਅਫਸਰ ਤਰੁਣਦੀਪ ਸਿੰਘ ਪੁਲੀਸ ਟੀਮ ਸਮੇਤ ਮੌਕੇ ’ਤੇ ਪੁੱਜੇ। ਪੁਲੀਸ ਅਧਿਕਾਰੀਆਂ ਨੂੰ ਮੁੱਢਲੀ ਜਾਂਚ ਵਿੱਚ ਹੀ ਮਾਮਲਾ ਸ਼ੱਕੀ ਲੱਗਿਆ। ਇਸ ਤੋਂ ਬਾਅਦ ਹਰ ਪਹਿਲੂ ਨੂੰ ਬਾਰੀਕੀ ਨਾਲ ਘੋਖਣ ਤੋਂ ਬਾਅਦ ਜਦੋਂ ਸ਼ੱਕ ਹੋਰ ਡੂੰਘਾ ਹੋਇਆ ਤਾਂ ਸੰਦੀਪ ਤੋਂ ਸਖ਼ਤੀ ਨਾਲ ਪੁੱਛਗਿੱਛ ਕੀਤੀ ਗਈ ਤਾਂ ਉਸ ਨੇ ਕਤਲ ਦਾ ਜੁਰਮ ਕਬੂਲ ਕਰ ਲਿਆ। ਪੁਲੀਸ ਨੇ ਆਰਤੀ ਦਾ ਸਿਵਲ ਹਸਪਤਾਲ ਤੋਂ ਪੋਸਟਮਾਰਟਮ ਕਰਵਾ ਕੇ ਲਾਸ਼ ਪਰਿਵਾਰਕ ਮੈਂਬਰਾਂ ਨੂੰ ਸੌਂਪ ਦਿੱਤੀ। ਉਧਰ, ਇਸ ਤੋਂ ਪਹਿਲਾਂ ਪੁਲੀਸ ਨੇ ਸੰਦੀਪ ਸਿੰਘ ਦੇ ਬਿਆਨਾਂ ’ਤੇ ਅਣਪਛਾਤੇ ਮੁਲਜ਼ਮਾਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਸੀ।
