ਰੂਪਨਗਰ, 15 ਦਸੰਬਰ 2022 – ਰੂਪਨਗਰ ਦੇ ਪਿੰਡ ਖੇੜਾ ਕਲਮੋਟ ਨਾਂਗਰਾਂ ਦੇ ਸੰਤ ਬੋਰੀ ਵਾਲੇ ਰੋਸ਼ਨ ਮੁਨੀ ਨੂੰ ਧਮਕੀ ਪੱਤਰ ਮਿਲਿਆ ਹੈ। ਪੱਤਰ ਦੇ ਉੱਪਰ ਲਿਖਿਆ ਪਤਾ ਕਪੂਰਥਲਾ ਦਾ ਦੱਸਿਆ ਜਾ ਰਿਹਾ ਹੈ। ਯੂਥ ਕਾਂਗਰਸ ਆਗੂ ਦੀਪਕ ਠਾਕੁਰ ਨੇ ਟਵੀਟ ਕਰਕੇ ਡੀਜੀਪੀ ਨੂੰ ਇਹ ਪੱਤਰ ਲਿਖਿਆ ਹੈ। ਜਿਸ ਤੋਂ ਬਾਅਦ ਹੁਣ ਸ਼ਿਕਾਇਤ ਰੂਪਨਗਰ ਨੂੰ ਭੇਜ ਦਿੱਤੀ ਗਈ ਹੈ।
ਦੀਪਕ ਨੇ ਡੀਜੀਪੀ ਨੂੰ ਲਿਖਿਆ ਕਿ ਪੰਜਾਬ ਵਿੱਚ ਹੁਣ ਸੰਤ ਸਮਾਜ ਵੀ ਸੁਰੱਖਿਅਤ ਨਹੀਂ ਹੈ। ਸ੍ਰੀ ਰੋਸ਼ਨ ਮੁਨੀ ਪੁੱਤਰ ਸੰਤ ਬੋਰੀ ਵਾਲੇ ਸ੍ਰੀ ਸੁੰਦਰ ਮੁਨੀ ਵਾਸੀ ਡੇਰਾ ਬਰਨੇ ਵਾਲਾ ਧਾਮ ਪਿੰਡ ਖੇੜਾ ਕਲਮੋਟ, ਨਾਂਗਰਾਂ ਨੂੰ ਵੀਰਵਾਰ ਨੂੰ ਧਮਕੀ ਭਰਿਆ ਪੱਤਰ ਭੇਜਿਆ ਗਿਆ ਹੈ। ਜਿਸ ਵਿੱਚ ਲਿਖਿਆ ਹੈ ਕਿ ਤੇਰੀ ਹਾਲਤ ਮੂਸੇਵਾਲੇ ਤੋਂ ਵੀ ਮਾੜੀ ਹੋਵੇਗੀ। ਇਹ ਪੱਤਰ ਸਪੀਡ ਪੋਸਟ ਰਾਹੀਂ ਭੇਜਿਆ ਗਿਆ ਹੈ ਅਤੇ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਇਹ ਕਪੂਰਥਲਾ ਤੋਂ ਹੀ ਅੱਗੇ ਭੇਜਿਆ ਗਿਆ ਹੈ। ਪੁਲਿਸ ਚਿੱਠੀ ‘ਤੇ ਲਿਖੇ ਪਤੇ ਦੀ ਵੀ ਪੁਸ਼ਟੀ ਕਰ ਰਹੀ ਹੈ।
ਪੱਤਰ ਵਿੱਚ ਤਿੱਖੀ ਸ਼ਬਦਾਵਲੀ ਦੀ ਵਰਤੋਂ ਕੀਤੀ ਗਈ ਹੈ। ਇਸ ਦੇ ਨਾਲ ਹੀ ਡੇਰੇ ਵਿੱਚ ਲਗਾਏ ਗਏ ਬੋਰਡਾਂ ਨੂੰ ਹਟਾਉਣ ਦੇ ਲਈ ਕਿਹਾ ਗਿਆ ਹੈ। ਨਾਲ ਹੀ ਸਪੱਸ਼ਟ ਕਿਹਾ ਗਿਆ ਹੈ ਕਿ ਮਾਈ 1 ਜਨਵਰੀ 2023 ਨੂੰ ਭੰਡਾਰਾ ਕਰਨਾ ਚਾਹੁੰਦੀ ਹੈ। ਤੁਹਾਡੇ ਨਾਲ ਕੋਈ ਝਗੜਾ ਨਹੀਂ ਹੈ। ਚੰਗਾ ਹੋਵੇਗਾ ਜੇ ਤੁਸੀਂ ਮਾਈ ਨਾਲ ਸਮਝੌਤਾ ਕਰ ਲਓ।
ਜੇਕਰ ਕੋਰੇ ਕਾਗਜ਼ ‘ਤੇ ਦਸਤਖਤ ਕਰ ਦਿੱਤੇ ਹੁੰਦੇ ਤਾਂ ਅੱਜ ਪ੍ਰਿੰਸੀਪਲ ਬਖਸ਼ੋ ਜੇਲ੍ਹ ‘ਚ ਹੁੰਦੀ ਤੇ ਮਾਈ ਨੇ ਤੈਨੂੰ ਡੇਰੇ ਦਾ ਮਾਲਕ ਬਣਾ ਦੇਣਾ ਸੀ। ਮਾਈ ਬਕਸ਼ੋਂ ਦੇ ਸਕੂਲ ਨੂੰ ਸੰਭਾਲਣਾ ਚਾਹੁੰਦੀ ਹੈ। ਜੇਕਰ ਤੁਸੀਂ ਫਿਰ ਵੀ ਨਾ ਮੰਨੇ ਤਾਂ ਤੇਰੀ ਹਾਲਤ ਸਿੱਧੂ ਮੂਸੇਵਾਲਾ ਤੋਂ ਵੀ ਮਾੜੀ ਹੋਵੇਗੀ।
