ਚੰਡੀਗੜ੍ਹ, 28 ਦਸੰਬਰ 2022 – ਫਰਜ਼ੀ ਹਿੱਟ ਐਂਡ ਰਨ ਕੇਸ ਵਿੱਚ ਵਕੀਲ ਨੂੰ ਫਸਾਉਣ ਵਾਲੇ ਦੋ ਪੁਲੀਸ ਮੁਲਾਜ਼ਮਾਂ ਨੂੰ ਜ਼ਿਲ੍ਹਾ ਅਦਾਲਤ ਨੇ 16 ਸਾਲਾਂ ਬਾਅਦ ਸਜ਼ਾ ਸੁਣਾਈ ਹੈ। ਫਰਜ਼ੀ ਹਿੱਟ ਐਂਡ ਰਨ ਕੇਸ ਦੇ ਜਾਂਚ ਅਧਿਕਾਰੀ (ਆਈ.ਓ.) ਹਰਭਜਨ ਸਿੰਘ ਨੂੰ ਦੋ ਸਾਲ ਦੀ ਸਜ਼ਾ ਸੁਣਾਈ ਗਈ ਹੈ ਜਦਕਿ ਕਾਂਸਟੇਬਲ ਵਿਜੇ ਕੁਮਾਰ ਨੂੰ ਇਕ ਸਾਲ ਦੀ ਸਜ਼ਾ ਸੁਣਾਈ ਗਈ ਹੈ। ਐਡਵੋਕੇਟ ਗੁਰਪਾਲ ਸਿੰਘ ਬੈਂਸ ਨੇ ਦੋਵਾਂ ਖ਼ਿਲਾਫ਼ ਕੇਸ ਦਾਇਰ ਕੀਤਾ ਸੀ।
16 ਸਾਲ ਪਹਿਲਾਂ 3 ਜੂਨ 2006 ਨੂੰ ਸੈਕਟਰ-26 ਥਾਣੇ ਦੀ ਪੁਲੀਸ ਨੇ ਐਡਵੋਕੇਟ ਬੈਂਸ ਖ਼ਿਲਾਫ਼ ਹਾਦਸੇ ਦਾ ਕੇਸ ਦਰਜ ਕੀਤਾ ਸੀ। ਦੋਸ਼ ਸਨ ਕਿ ਵਕੀਲ ਨੇ ਬਾਪੂਧਾਮ ਵਿੱਚ ਇੱਕ ਵਿਅਕਤੀ ਨੂੰ ਆਪਣੀ ਮਾਰੂਤੀ ਕਾਰ ਨਾਲ ਟੱਕਰ ਮਾਰ ਦਿੱਤੀ ਅਤੇ ਫਰਾਰ ਹੋ ਗਏ। ਪੁਲਸ ਨੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ, ਇੰਨਾ ਹੀ ਨਹੀਂ ਉਸ ਖਿਲਾਫ ਅਦਾਲਤ ਵਿਚ ਚਾਰਜਸ਼ੀਟ ਵੀ ਦਾਇਰ ਕੀਤੀ ਗਈ। ਜਦਕਿ ਉਸ ਦੀ ਕਾਰ ਨਾਲ ਅਜਿਹਾ ਕੋਈ ਹਾਦਸਾ ਨਹੀਂ ਹੋਇਆ ਸੀ।
ਸੈਕਟਰ-26 ਥਾਣੇ ਦੀ ਪੁਲੀਸ ਨੇ ਚਾਰਜਸ਼ੀਟ ਵਿੱਚ ਹਾਦਸੇ ਦੀ ਤਰੀਕ ਅਤੇ ਸਮੇਂ ਦਾ ਜ਼ਿਕਰ ਕੀਤਾ ਹੈ, ਉਸ ਸਮੇਂ ਉਸ ਦੀ ਕਾਰ ਮਲੋਆ ਥਾਣੇ ਦੀ ਹਿਰਾਸਤ ਵਿੱਚ ਸੀ। ਦਰਅਸਲ ਉਸ ਦੀ ਕਾਰ ਟੁੱਟ ਗਈ ਸੀ ਜਿਸ ਨੂੰ ਉਹ ਮਲੋਆ ਛੱਡ ਕੇ ਗਿਆ ਸੀ। ਉਥੋਂ ਦੇ ਇਕ ਸਥਾਨਕ ਨਿਵਾਸੀ ਦੀ ਸ਼ਿਕਾਇਤ ‘ਤੇ ਪੁਲਸ ਨੇ ਉਸ ਦੀ ਕਾਰ ਨੂੰ ਲਾਵਾਰਿਸ ਮੰਨਦੇ ਹੋਏ ਆਪਣੇ ਕਬਜ਼ੇ ‘ਚ ਲੈ ਲਿਆ। ਇਕ ਦਿਨ ਬਾਅਦ 26 ਥਾਣਾ ਪੁਲਸ ਨੇ ਉਸੇ ਵਾਹਨ ਨਾਲ ਐਕਸੀਡੈਂਟ ਦਿਖਾਇਆ।
ਇਸ FIR ਖਿਲਾਫ ਬੈਂਸ ਨੇ SSP ਨੂੰ ਦਿੱਤੀ ਸ਼ਿਕਾਇਤ, ਫਿਰ ਹਾਈਕੋਰਟ ਵੀ ਗਏ। ਹਾਈਕੋਰਟ ਦੀਆਂ ਹਦਾਇਤਾਂ ‘ਤੇ ਵਿਸ਼ੇਸ਼ ਜਾਂਚ ਟੀਮ (SIT) ਦਾ ਗਠਨ ਕੀਤਾ ਗਿਆ ਸੀ। ਆਖ਼ਰਕਾਰ ਸੱਚਾਈ ਸਾਹਮਣੇ ਆ ਗਈ ਅਤੇ ਅਦਾਲਤ ਨੇ 2008 ਵਿੱਚ ਉਸ ਨੂੰ ਕੇਸ ਵਿੱਚੋਂ ਰਿਹਾਅ ਕਰ ਦਿੱਤਾ। ਪਰ, ਉਸਨੇ ਦੋਸ਼ੀ ਪੁਲਿਸ ਵਾਲਿਆਂ ਨੂੰ ਸਬਕ ਸਿਖਾਉਣ ਲਈ ਅਦਾਲਤ ਵਿੱਚ ਕੇਸ ਦਾਇਰ ਕੀਤਾ। 2016 ‘ਚ ਅਦਾਲਤ ਨੇ ਦੋਸ਼ੀ ਪੁਲਿਸ ਮੁਲਾਜ਼ਮਾਂ ‘ਤੇ 10 ਲੱਖ ਰੁਪਏ ਦਾ ਜੁਰਮਾਨਾ ਵੀ ਲਗਾਇਆ ਸੀ।
