- ਮੁਲਜ਼ਮ ਨੇ ਚਾਕੂ ਨਾਲ ਧਮਕਾਇਆ
ਲੁਧਿਆਣਾ, 22 ਜਨਵਰੀ 2023 – ਲੁਧਿਆਣਾ ਵਿੱਚ ਸਨੈਚਿੰਗ ਦੀਆਂ ਘਟਨਾਵਾਂ ਦਾ ਗ੍ਰਾਫ ਲਗਾਤਾਰ ਵੱਧਦਾ ਜਾ ਰਿਹਾ ਹੈ। ਕਿਦਵਈ ਨਗਰ ਦੀ ਵਾਲਬਰੋ ਗਲੀ ਵਿੱਚ ਬਾਈਕ ਸਵਾਰ ਬਦਮਾਸ਼ਾਂ ਨੇ ਸਬਜ਼ੀ ਖਰੀਦ ਕੇ ਘਰ ਜਾ ਰਹੀ ਬਜ਼ੁਰਗ ਔਰਤ ਦੇ ਕੰਨਾਂ ਦੀਆਂ ਵਾਲੀਆਂ ਖੋਹ ਲਈਆਂ। ਬਦਮਾਸ਼ ਨੇ ਔਰਤ ਨੂੰ ਚਾਕੂ ਵੀ ਦਿਖਾਇਆ। ਇਸ ਤੋਂ ਬਾਅਦ ਬਦਮਾਸ਼ ਜਨਕਪੁਰੀ ਮੇਨ ਬਾਜ਼ਾਰ ਵੱਲ ਭੱਜ ਗਏ।
ਪੀੜਤ ਔਰਤ ਦਾ ਨਾਂ ਦਵਿੰਦਰ ਕੌਰ ਹੈ। ਔਰਤ ਦੇ ਗੋਡਿਆਂ ‘ਤੇ ਵੀ ਕਾਫੀ ਸੱਟ ਲੱਗੀ ਹੈ। ਇਲਾਕਾ ਵਾਸੀਆਂ ਨੇ ਦੱਸਿਆ ਕਿ ਕੁਝ ਦਿਨ ਪਹਿਲਾਂ ਹੀ ਲੁਟੇਰੇ ਇਲਾਕੇ ਦੀ ਇੱਕ ਹੋਰ ਔਰਤ ਦੇ ਗਲੇ ਤੋਂ ਚੇਨ ਝਪਟ ਕੇ ਫਰਾਰ ਹੋ ਗਏ ਸਨ। ਪੁਲਿਸ ਦੇ ਹੱਥ ਅਜੇ ਵੀ ਖਾਲੀ ਹਨ।
ਸਨੈਚਰਾਂ ਨੇ ਔਰਤ ਦੇ ਕੰਨਾਂ ਦੀਆਂ ਵਾਲੀਆਂ ਖੋਹ ਕੇ ਉਸ ਨੂੰ ਧੱਕਾ ਦੇ ਦਿੱਤਾ, ਜਿਸ ਕਾਰਨ ਉਹ ਗਲੀ ‘ਚ ਡਿੱਗ ਗਈ। ਔਰਤ ਦੇ ਗੋਡੇ ਦਾ ਆਪ੍ਰੇਸ਼ਨ 3 ਮਹੀਨੇ ਪਹਿਲਾਂ ਹੀ ਹੋਇਆ ਹੈ। ਜਿਸ ਔਰਤ ਨਾਲ ਇਹ ਘਟਨਾ ਵਾਪਰੀ ਹੈ, ਉਹ ਸਮਾਜ ਸੇਵੀ ਹੈ। ਉਸ ਨੇ ਕੈਂਸਰ ਦੇ ਕਈ ਮਰੀਜ਼ਾਂ ਦੀ ਮਦਦ ਕੀਤੀ ਹੈ।
ਮਹਿਲਾ ਦਵਿੰਦਰ ਕੌਰ ਆਪਣੇ ਘਰ ਕਣਕ ਦੀ ਪਨੀਰੀ ਤਿਆਰ ਕਰਕੇ ਕੈਂਸਰ ਪੀੜਤ ਲੋਕਾਂ ਦੀ ਸੇਵਾ ਕਰਦੀ ਸੀ। ਇਲਾਕੇ ਦੇ ਲੋਕਾਂ ਦਾ ਕਹਿਣਾ ਹੈ ਕਿ ਜੇਕਰ ਪੁਲੀਸ ਨੇ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਨਾ ਕੀਤਾ ਤਾਂ ਉਹ ਪੁਲੀਸ ਕਮਿਸ਼ਨਰ ਮਨਦੀਪ ਸਿੰਘ ਸਿੱਧੂ ਨੂੰ ਅਪੀਲ ਕਰਨਗੇ।
ਮਹਿਲਾ ਦਵਿੰਦਰ ਕੌਰ ਨੇ ਦੱਸਿਆ ਕਿ ਗੋਡਿਆਂ ਦੇ ਅਪਰੇਸ਼ਨ ਕਾਰਨ ਉਹ ਘਰੋਂ ਘੱਟ ਹੀ ਨਿਕਲਦੀ ਹੈ। ਉਹ ਸਿਰਫ ਸਬਜ਼ੀ ਮੰਡੀ ਖਰੀਦਦਾਰੀ ਕਰਨ ਗਈ ਸੀ। ਬਦਮਾਸ਼ਾਂ ਨੇ ਉਸ ਦੀਆਂ 8 ਗ੍ਰਾਮ ਦੀਆਂ ਸੋਨੇ ਦੀਆਂ ਵਾਲੀਆਂ ਖੋਹ ਲਈਆਂ।
