ਅੰਮ੍ਰਿਤਸਰ, 12 ਮਾਰਚ 2023 – ਅੰਮ੍ਰਿਤਸਰ ‘ਚ ਪਾਕਿਸਤਾਨੀ ਗੁਬਾਰਾ ਮਿਲਣ ਤੋਂ ਬਾਅਦ ਸੁਰੱਖਿਆ ਏਜੰਸੀਆਂ ਚੌਕਸ ਹੋ ਗਈਆਂ ਹਨ। ਇਹ ਗੁਬਾਰਾ ਕਿਸੇ ਸਰਹੱਦੀ ਪਿੰਡ ਵਿੱਚ ਨਹੀਂ ਸਗੋਂ ਉੱਚ ਸੁਰੱਖਿਆ ਵਾਲੇ ਅੰਮ੍ਰਿਤਸਰ ਹਵਾਈ ਅੱਡੇ ’ਤੇ ਮਿਲਿਆ ਹੈ। ਫਿਲਹਾਲ ਹਵਾਈ ਅੱਡੇ ਦੀ ਸੁਰੱਖਿਆ ਕਰ ਰਹੀ ਸੀਆਈਐਸਐਫ ਨੇ ਗੁਬਾਰੇ ਨੂੰ ਆਪਣੇ ਕਬਜ਼ੇ ਵਿੱਚ ਲੈ ਲਿਆ ਹੈ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਸੀਆਈਐਸਐਫ ਦੇ ਜਵਾਨ ਗਸ਼ਤ ’ਤੇ ਸਨ। ਹਵਾਈ ਅੱਡੇ ਦੀ ਸੁਰੱਖਿਆ ਦੀ ਜਾਂਚ ਕੀਤੀ ਜਾ ਰਹੀ ਸੀ। ਉਦੋਂ ਇਕ ਨੌਜਵਾਨ ਦੀ ਨਜ਼ਰ ਝਾੜੀਆਂ ਵਿਚ ਡਿੱਗੇ ਇਕ ਗੁਬਾਰੇ ‘ਤੇ ਪਈ। ਹੈਰਾਨੀ ਦੀ ਗੱਲ ਹੈ ਕਿ ਇਸ ਪਾਕਿਸਤਾਨੀ ਗੁਬਾਰੇ ‘ਤੇ ਪਾਕਿ ਏਅਰਲਾਈਨਜ਼ ਪੀਆਈਏ ਦੀ ਛਾਪ ਸੀ ਅਤੇ ਇਹ ਗੁਬਾਰਾ ਵੀ ਜਹਾਜ਼ ਦੀ ਨਕਲ ‘ਚ ਸੀ। ਸੀਆਈਐਸਐਫ ਦੇ ਜਵਾਨਾਂ ਨੇ ਜਾਂਚ ਲਈ ਗੁਬਾਰੇ ਨੂੰ ਜ਼ਬਤ ਕਰ ਲਿਆ ਹੈ। ਫਿਲਹਾਲ ਇਸ ਗੁਬਾਰੇ ਨਾਲ ਕੋਈ ਵੀ ਸ਼ੱਕੀ ਵਸਤੂ ਨਹੀਂ ਲੱਗੀ ਸੀ।
ਸੁਰੱਖਿਆ ਏਜੰਸੀਆਂ ਦਾ ਕਹਿਣਾ ਹੈ ਕਿ ਇਸ ਤਰ੍ਹਾਂ ਦੇ ਗੁਬਾਰੇ ਪਹਿਲਾਂ ਵੀ ਕਈ ਵਾਰ ਗੁਰਦਾਸਪੁਰ ਦੇ ਸਰਹੱਦੀ ਇਲਾਕਿਆਂ ‘ਚੋਂ ਮਿਲੇ ਹਨ ਪਰ ਇਹ ਗੁਬਾਰੇ ਸਰਹੱਦੀ ਪਿੰਡਾਂ ‘ਚ ਹੀ ਮਿਲੇ ਹਨ। ਇਹ ਗੁਬਾਰਾ ਸਰਹੱਦ ਤੋਂ ਕਾਫੀ ਦੂਰ ਅਤੇ ਅੰਮ੍ਰਿਤਸਰ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਮਿਲਿਆ ਹੈ, ਜੋ ਚਿੰਤਾ ਦਾ ਵਿਸ਼ਾ ਹੈ। ਜਾਂਚ ਕੀਤੀ ਜਾ ਰਹੀ ਹੈ ਕਿ ਕੀ ਇਹ ਗੁਬਾਰਾ ਭਾਰਤੀ ਸਰਹੱਦ ਦੇ ਅੰਦਰ ਕਿਸੇ ਵੱਲੋਂ ਉਡਾਇਆ ਗਿਆ ਹੈ ਜਾਂ ਇਹ ਹਵਾ ਦੇ ਵਹਾਅ ਕਾਰਨ ਪਾਕਿਸਤਾਨ ਤੋਂ ਆਇਆ ਹੈ।
