ਨਵੀਂ ਦਿੱਲੀ, 12 ਸਤੰਬਰ 2023 – ਕੰਪਨੀ ਐਪਲ ਦਾ ਸਾਲ ਦਾ ਸਭ ਤੋਂ ਵੱਡਾ ਲਾਂਚ ਈਵੈਂਟ ਅੱਜ ਯਾਨੀ 12 ਸਤੰਬਰ ਨੂੰ ਹੋਵੇਗਾ। ਇਸ ਸਾਲ ਕੰਪਨੀ ਨੇ ਆਪਣੇ ਈਵੈਂਟ ਦਾ ਨਾਮ ‘ਵਾਂਡਰਲਸਟ’ ਰੱਖਿਆ ਹੈ, ਜੋ ਕੈਲੀਫੋਰਨੀਆ ਵਿੱਚ ਐਪਲ ਹੈੱਡਕੁਆਰਟਰ ਦੇ ‘ਸਟੀਵ ਜੌਬਸ ਥੀਏਟਰ’ ਵਿੱਚ ਆਯੋਜਿਤ ਕੀਤਾ ਜਾਵੇਗਾ। ਭਾਰਤੀ ਸਮੇਂ ਮੁਤਾਬਕ ਇਹ ਸਮਾਗਮ ਰਾਤ 10:30 ਵਜੇ ਸ਼ੁਰੂ ਹੋਵੇਗਾ।
ਇਸ ਈਵੈਂਟ ਨੂੰ ਕੰਪਨੀ ਦੀ ਵੈੱਬਸਾਈਟ apple.com ਜਾਂ Apple TV ਐਪ ‘ਤੇ ਆਨਲਾਈਨ ਦੇਖਿਆ ਜਾ ਸਕਦਾ ਹੈ। ਐਪਲ ਇਸ ਈਵੈਂਟ ‘ਚ iPhone 15 ਸੀਰੀਜ਼ ਦੇ ਨਾਲ Apple Watch Series 9 ਅਤੇ Apple Watch Ultra 2 ਨੂੰ ਵੀ ਲਾਂਚ ਕਰ ਸਕਦਾ ਹੈ। ਹਾਲਾਂਕਿ, ਕੰਪਨੀ ਨੇ ਇਸ ਬਾਰੇ ਕੋਈ ਅਧਿਕਾਰਤ ਜਾਣਕਾਰੀ ਨਹੀਂ ਦਿੱਤੀ ਹੈ ਕਿ ਈਵੈਂਟ ਵਿੱਚ ਕਿਹੜੇ ਉਤਪਾਦ ਲਾਂਚ ਕੀਤੇ ਜਾਣਗੇ।
ਕੰਪਨੀ Apple Wanderlust ਈਵੈਂਟ ‘ਚ iOS 17 ਆਪਰੇਟਿੰਗ ਸਿਸਟਮ ਦੇ ਰੋਲਆਊਟ ਦੀ ਤਰੀਕ ਦਾ ਐਲਾਨ ਵੀ ਕਰ ਸਕਦੀ ਹੈ। iOS 17 ਦੇ ਫੀਚਰਸ ਨੂੰ ਕੰਪਨੀ ਨੇ ਤਿੰਨ ਮਹੀਨੇ ਪਹਿਲਾਂ WWDC23 ਈਵੈਂਟ ‘ਚ ਪੇਸ਼ ਕੀਤਾ ਸੀ। ਲਾਈਵ ਵੌਇਸ ਮੇਲ ਟ੍ਰਾਂਸਕ੍ਰਿਪਸ਼ਨ, ਫੇਸਟਾਈਮ ਸੰਦੇਸ਼ਾਂ ਨੂੰ ਰਿਕਾਰਡ ਕਰਨ ਦੀ ਸਮਰੱਥਾ, ਵਿਅਕਤੀਗਤ ਸੰਪਰਕ ਪੋਸਟਰ ਵਰਗੀਆਂ ਵਿਸ਼ੇਸ਼ਤਾਵਾਂ iOS 17 ਵਿੱਚ ਉਪਲਬਧ ਹੋਣਗੀਆਂ।
ਡਿਵਾਈਸ ‘ਚ iOS 17 ਅਪਡੇਟ ਮਿਲਣ ਤੋਂ ਬਾਅਦ ਜੇਕਰ ਕੋਈ ਕਾਲ ਰਿਸੀਵ ਨਹੀਂ ਕਰ ਰਿਹਾ ਹੈ ਤਾਂ ਯੂਜ਼ਰ ਰਿਕਾਰਡ ਕੀਤੇ ਫੇਸਟਾਈਮ ਮੈਸੇਜ ਭੇਜ ਸਕਣਗੇ। ਇਸ ਦੇ ਨਾਲ ਹੁਣ ਵਾਇਸ ਕਮਾਂਡ ਫੀਚਰ ਦੀ ਵਰਤੋਂ ਸਿਰਫ ‘ਸਿਰੀ’ ਕਹਿ ਕੇ ਕੀਤੀ ਜਾ ਸਕਦੀ ਹੈ ਨਾ ਕਿ ‘ਹੇ ਸਿਰੀ’। ਯੂਜ਼ਰਸ ਹੁਣ ਆਫਲਾਈਨ ਮੈਪ ਦੀ ਵੀ ਵਰਤੋਂ ਕਰ ਸਕਣਗੇ। ਵਰਤਮਾਨ ਵਿੱਚ iOS 17 ਬੀਟਾ ਟੈਸਟਿੰਗ ਪੜਾਅ ਵਿੱਚ ਹੈ।
ਤਾਈਵਾਨੀ ਇਲੈਕਟ੍ਰੋਨਿਕਸ ਨਿਰਮਾਤਾ Foxconn ਭਾਰਤ ਵਿੱਚ ਆਪਣੇ ਤਾਮਿਲਨਾਡੂ ਪਲਾਂਟ ਵਿੱਚ iPhone 15 ਦਾ ਨਿਰਮਾਣ ਕਰ ਰਹੀ ਹੈ। ਉਤਪਾਦਨ ਨੂੰ ਤੇਜ਼ ਕਰਨ ਲਈ, Foxconn ਨੇ ਚੇਨਈ ਪਲਾਂਟ ‘ਤੇ ਉਤਪਾਦਨ ਲਾਈਨਾਂ ਨੂੰ ਵੀ ਵਧਾ ਦਿੱਤਾ ਹੈ। ਹਰ ਸਾਲ ਸਤੰਬਰ ਵਿੱਚ, ਐਪਲ ਨਵੀਂ ਆਈਫੋਨ ਸੀਰੀਜ਼ ਦੇ ਨਾਲ ਕਈ ਹੋਰ ਉਤਪਾਦ ਲਾਂਚ ਕਰਦਾ ਹੈ।
ਐਪਲ ਨੇ ਆਈਫੋਨ SE ਨਾਲ 2017 ਵਿੱਚ ਭਾਰਤ ਵਿੱਚ ਆਈਫੋਨ ਦਾ ਨਿਰਮਾਣ ਸ਼ੁਰੂ ਕੀਤਾ ਸੀ। ਇਸ ਦੇ ਤਿੰਨ ਇਲੈਕਟ੍ਰੋਨਿਕਸ ਮੈਨੂਫੈਕਚਰਿੰਗ ਸਰਵਿਸ (ਈਐਮਐਸ) ਪਾਰਟਨਰ ਹਨ – ਫੌਕਸਕਾਨ, ਵਿਸਟ੍ਰੋਨ ਅਤੇ ਪੇਗੈਟਰੋਨ। ਆਈਫੋਨ SE ਤੋਂ ਬਾਅਦ, ਆਈਫੋਨ 11, ਆਈਫੋਨ 12, ਆਈਫੋਨ 13 ਅਤੇ ਆਈਫੋਨ 14 ਵੀ ਭਾਰਤ ਵਿੱਚ ਤਿਆਰ ਕੀਤੇ ਗਏ ਸਨ। Foxconn ਦਾ ਪਲਾਂਟ ਚੇਨਈ ਦੇ ਨੇੜੇ ਸ਼੍ਰੀਪੇਰੰਬਦੂਰ ਵਿੱਚ ਹੈ।
ਐਪਲ ਦੇ ਤਿੰਨੋਂ ਕੰਟਰੈਕਟ ਨਿਰਮਾਤਾ (ਫੌਕਸਕਾਨ, ਵਿਸਟ੍ਰੋਨ ਅਤੇ ਪੇਗਟ੍ਰੋਨ) ਭਾਰਤ ਸਰਕਾਰ ਦੀ 41,000 ਕਰੋੜ ਰੁਪਏ ਦੀ ਪ੍ਰੋਡਕਸ਼ਨ-ਲਿੰਕਡ ਇੰਸੈਂਟਿਵ ਸਕੀਮ (PLI) ਦਾ ਹਿੱਸਾ ਹਨ। ਇਸ ਸਕੀਮ ਤੋਂ ਬਾਅਦ ਹੀ ਭਾਰਤ ਵਿੱਚ ਆਈਫੋਨ ਨਿਰਮਾਣ ਵਿੱਚ ਵਾਧਾ ਹੋਇਆ ਹੈ। 2020 ਵਿੱਚ, ਭਾਰਤ ਸਰਕਾਰ ਨੇ PLI ਸਕੀਮ ਸ਼ੁਰੂ ਕੀਤੀ।
ਇਸ ਯੋਜਨਾ ਦੇ ਜ਼ਰੀਏ, ਬਾਹਰਲੇ ਦੇਸ਼ਾਂ ਦੀਆਂ ਕੰਪਨੀਆਂ ਨੂੰ ਸਥਾਨਕ ਨਿਰਮਾਣ ਦਾ ਲਾਭ ਲੈਣ ਦਾ ਮੌਕਾ ਮਿਲਦਾ ਹੈ ਅਤੇ ਇਸ ‘ਤੇ ਪ੍ਰੋਤਸਾਹਨ ਵੀ ਪ੍ਰਾਪਤ ਹੁੰਦਾ ਹੈ।
