ਕੀਵ, 6 ਅਕਤੂਬਰ 2023 – ਰੂਸ ਨੇ ਬੁੱਧਵਾਰ ਦੇਰ ਰਾਤ ਪੂਰਬੀ ਯੂਕਰੇਨ ਦੇ ਖਾਰਕਿਵ ਖੇਤਰ ਦੇ ਹਰੋਜ਼ਾ ਪਿੰਡ ‘ਤੇ ਹਮਲਾ ਕੀਤਾ। ਇਸ ‘ਚ 51 ਲੋਕਾਂ ਦੀ ਮੌਤ ਹੋ ਗਈ, ਜਦਕਿ 7 ਲੋਕ ਜ਼ਖਮੀ ਹੋ ਗਏ। ਮਰਨ ਵਾਲਿਆਂ ਵਿੱਚ ਇੱਕ 6 ਸਾਲ ਦਾ ਬੱਚਾ ਵੀ ਸ਼ਾਮਲ ਹੈ। ਬੀਬੀਸੀ ਦੀ ਰਿਪੋਰਟ ਮੁਤਾਬਕ ਹਮਲੇ ਦੌਰਾਨ ਇੱਕ ਯੂਕਰੇਨੀ ਫੌਜੀ ਦਾ ਅੰਤਿਮ ਸਸਕਾਰ ਚੱਲ ਰਿਹਾ ਸੀ। ਯੂਕਰੇਨ ਦੇ ਰੱਖਿਆ ਮੰਤਰਾਲੇ ਨੇ ਕਿਹਾ ਕਿ ਰੂਸ ਨਾਗਰਿਕਾਂ ‘ਤੇ ਹਮਲੇ ਕਰ ਰਿਹਾ ਹੈ।
ਉਨ੍ਹਾਂ ਨੇ ਕਿਹਾ ਕਿ ਜਿਸ ਜਗ੍ਹਾ ‘ਤੇ ਹਮਲਾ ਹੋਇਆ ਉੱਥੇ ਕੋਈ ਫੌਜੀ ਨਿਸ਼ਾਨਾ ਨਹੀਂ ਸੀ, ਸਿਰਫ ਲੋਕ ਸਨ। ਹਮਲੇ ਵਿੱਚ ਪਿੰਡ ਦੀ 20% ਆਬਾਦੀ ਦੀ ਮੌਤ ਹੋ ਗਈ ਸੀ।ਪ੍ਰੈਜ਼ੀਡੈਂਸ਼ੀਅਲ ਚੀਫ਼ ਆਫ਼ ਸਟਾਫ਼ ਆਂਦਰੇ ਯਰਮਾਕ ਅਤੇ ਖਾਰਕੀਵ ਪਿੰਡ ਦੇ ਮੁਖੀ ਓਲੇਹ ਸਿਨਿਹੁਬੋਵ ਨੇ ਕਿਹਾ ਕਿ ਜੰਗ ਤੋਂ ਪਹਿਲਾਂ ਪਿੰਡ ਦੀ ਆਬਾਦੀ ਲਗਭਗ 500 ਸੀ। ਯੁੱਧ ਦੀ ਸ਼ੁਰੂਆਤ ਤੋਂ ਲੈ ਕੇ ਹੁਣ ਤੱਕ ਇੱਥੇ 255 ਲੋਕ ਰਹਿ ਰਹੇ ਸਨ। ਇਨ੍ਹਾਂ 255 ਲੋਕਾਂ ‘ਚੋਂ ਵੀਰਵਾਰ ਰਾਤ ਨੂੰ ਹੋਏ ਹਮਲੇ ‘ਚ 51 ਲੋਕਾਂ ਦੀ ਮੌਤ ਹੋ ਗਈ।
