- ਪੁਲਿਸ ਨੇ ਰੂਟ ਡਾਇਵਰਸ਼ਨ ਪਲਾਨ ਕੀਤਾ ਜਾਰੀ
- ਐਲੀਵੇਟਿਡ ਰੋਡ ‘ਤੇ ਇਕ ਹਫਤੇ ਤੱਕ ਲਗਾਏ ਜਾਣਗੇ ਗਰਡਰ
ਲੁਧਿਆਣਾ, 25 ਅਕਤੂਬਰ 2023 – ਲੁਧਿਆਣਾ ਦਾ ਭਾਰਤ ਨਗਰ ਚੌਕ ਅੱਜ ਤੋਂ 1 ਹਫ਼ਤੇ ਲਈ ਬੰਦ ਰਹੇਗਾ। ਐਲੀਵੇਟਿਡ ਰੋਡ ‘ਤੇ ਗਰਡਰ ਲਗਾਉਣ ਦਾ ਕੰਮ ਅੱਜ ਤੋਂ ਸ਼ੁਰੂ ਹੋਣ ਜਾ ਰਿਹਾ ਹੈ। ਇੱਥੇ 18 ਗਰਡਰ ਲਗਾਏ ਜਾਣਗੇ, ਜਿਨ੍ਹਾਂ ਵਿੱਚੋਂ ਹਰ ਰੋਜ਼ ਇੱਕ ਗਰਡਰ ਲਗਾਇਆ ਜਾਵੇਗਾ। ਪੂਰੇ ਕੰਮ ਵਿੱਚ ਇੱਕ ਹਫ਼ਤਾ ਲੱਗੇਗਾ।
ਚੌਕ ਬੰਦ ਹੋਣ ਕਾਰਨ ਤਿਉਹਾਰਾਂ ਦੇ ਸੀਜ਼ਨ ਦੌਰਾਨ ਲੋਕਾਂ ਨੂੰ ਟ੍ਰੈਫਿਕ ਜਾਮ ਵਰਗੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਇਸ ਲਈ ਟ੍ਰੈਫਿਕ ਪੁਲਸ ਨੇ ਲੋਕਾਂ ਲਈ ਬਦਲਵੇਂ ਰੂਟਾਂ ਲਈ ਟਰੈਫਿਕ ਡਾਇਵਰਸ਼ਨ ਪਲਾਨ ਤਿਆਰ ਕੀਤਾ ਹੈ। ਕਰੀਬ 4 ਹਫਤਿਆਂ ਤੱਕ ਲੋਕਾਂ ਨੂੰ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
ਏ.ਸੀ.ਪੀ ਚਰਨਜੀਤ ਲਾਂਬਾ ਨੇ ਦੱਸਿਆ ਕਿ ਉਸਾਰੀ ਕਾਰਜਾਂ ਕਾਰਨ ਹੋਣ ਵਾਲੀ ਅਸੁਵਿਧਾ ਨੂੰ ਘੱਟ ਕਰਨ ਲਈ ਐਡਵਾਈਜ਼ਰੀ ਜਾਰੀ ਕੀਤੀ ਗਈ ਹੈ। ਪੁਲਿਸ ਨੇ 2 ਟਰੈਫਿਕ ਰੂਟ ਡਾਇਵਰਸ਼ਨ ਤਿਆਰ ਕੀਤੇ ਹਨ। ਪਹਿਲਾ ਰੂਟ ਡਾਇਵਰਸ਼ਨ ਬੁੱਧਵਾਰ ਤੋਂ ਸ਼ੁਰੂ ਹੋਣ ਵਾਲੇ ਪਹਿਲੇ ਹਫ਼ਤੇ ਦੌਰਾਨ ਨਿਰੰਕਾਰੀ ਸਤਿਸੰਗ ਭਵਨ ਰੋਡ ‘ਤੇ ਦੋਵਾਂ ਦਿਸ਼ਾਵਾਂ ਵਿੱਚ ਆਵਾਜਾਈ ਦੀ ਆਗਿਆ ਦਿੱਤੀ ਗਈ ਹੈ। ਨਾਲ ਹੀ ਠੇਕੇਦਾਰ ਨੂੰ ਭਾਰਤ ਨਗਰ ਚੌਕ ਰੋਡ ‘ਤੇ ਬੀ.ਐੱਸ.ਐੱਨ.ਐੱਲ.ਐਕਸਚੇਂਜ ਬਿਲਡਿੰਗ ਦੀ ਕੰਧ ਦੇ ਨਾਲ ਲੱਗਦੀ 20 ਫੁੱਟ ਜਗ੍ਹਾ ਮੁਹੱਈਆ ਕਰਵਾਉਣ ਦੇ ਨਿਰਦੇਸ਼ ਦਿੱਤੇ ਹਨ।
ਇੱਕ ਦੂਜੀ ਯੋਜਨਾ ਆਉਣ ਵਾਲੇ ਹਫ਼ਤਿਆਂ ਵਿੱਚ ਲਾਗੂ ਕੀਤੀ ਜਾਵੇਗੀ। ਜਿਸ ਵਿੱਚ ਬੀ.ਐਸ.ਐਨ.ਐਲ. ਐਕਸਚੇਂਜ ਦੀ ਕੰਧ ਦੇ ਨਾਲ ਅਲਾਟ ਕੀਤੀ 20 ਫੁੱਟ ਜਗ੍ਹਾ ਨੂੰ ਭਾਰਤ ਨਗਰ ਚੌਂਕ ਵਾਲੇ ਪਾਸੇ ਤੋਂ ਮਿੰਨੀ ਸਕੱਤਰੇਤ ਵੱਲ ਜਾਣ ਵਾਲੀ ਆਵਾਜਾਈ ਲਈ ਸਰਵਿਸ ਲੇਨ ਵਜੋਂ ਵਰਤਿਆ ਜਾਵੇਗਾ।
ਏਸੀਪੀ ਲਾਂਬਾ ਨੇ ਕਿਹਾ ਕਿ ਐਲੀਵੇਟਿਡ ਰੋਡ ਦਾ ਨਿਰਮਾਣ ਕਰਨ ਵਾਲੀ ਕੰਪਨੀ ਸਾਈਟ ‘ਤੇ ਕੁੱਲ 18 ਗਰਡਰ ਲਗਾਉਣ ਦੀ ਯੋਜਨਾ ਬਣਾ ਰਹੀ ਹੈ। ਪ੍ਰਤੀ ਦਿਨ 3 ਦੇ ਕਰੀਬ ਗਰਡਰ ਵੀ ਲਗਾਏ ਜਾਣਗੇ, ਇਸ ਲਈ ਇੱਕ ਹਫ਼ਤੇ ਵਿੱਚ ਕੰਮ ਮੁਕੰਮਲ ਕਰ ਲਿਆ ਜਾਵੇਗਾ। ਇਸ ਕੰਮ ਤੋਂ ਬਾਅਦ, ਕਾਸਟਿੰਗ ਦਾ ਕੰਮ ਸ਼ੁਰੂ ਹੋ ਜਾਵੇਗਾ, ਜੋ ਕਿ ਲਗਭਗ 3-4 ਹਫਤਿਆਂ ਤੱਕ ਚੱਲਣ ਦੀ ਉਮੀਦ ਹੈ, ਜਿਸ ਨਾਲ ਆਲੇ-ਦੁਆਲੇ ਦੇ ਖੇਤਰ ਵਿੱਚ ਆਵਾਜਾਈ ਨੂੰ ਕਾਫੀ ਪ੍ਰਭਾਵਿਤ ਕਰੇਗਾ।
