ਮੁੰਬਈ, 30 ਨਵੰਬਰ 2023 – ‘ਅਰਜਨ ਵੇਲੀ ਨੇ ਲੱਤਾਂ ਜੋੜ ਕੇ ਗੰਡਾਸੀ ਮਾਰੀ…’ ਰਣਬੀਰ ਕਪੂਰ ਦੀ ਫਿਲਮ ‘ਐਨੀਮਲ’ ਦਾ ਗੀਤ ‘ਅਰਜਨ ਵੇਲੀ’ ਇਨ੍ਹੀਂ ਦਿਨੀਂ ਹਰ ਕਿਸੇ ਦੀ ਜ਼ੁਬਾਨ ‘ਤੇ ਹੈ। ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਇਸ ਗੀਤ ਦਾ ਅਸਲ ਮਤਲਬ ਕੀ ਹੈ ? ਅਤੇ ਅਰਜਨ ਵੇਲੀ ਕੌਣ ਹੈ?
ਕਈ ਲੋਕਾਂ ਦਾ ਮੰਨਣਾ ਹੈ ਕਿ ਫਿਲਮ ‘ਚ ਰਣਬੀਰ ਦੇ ਕਿਰਦਾਰ ਅਰਜੁਨ ਬਾਰੇ ਲਿਖਿਆ ਗਿਆ ਹੈ ਪਰ ਅਸਲ ‘ਚ ਇਸ ਗੀਤ ਦਾ ਮਤਲਬ ਬਹੁਤ ਡੂੰਘਾ ਹੈ। ਨਾਲ ਹੀ ਇਹ ਸਭ ਤੋਂ ਬਹਾਦਰ ਸਿੱਖ ਯੋਧਿਆਂ ਵਿੱਚੋਂ ਇੱਕ ਨਾਲ ਸਬੰਧਤ ਹੈ।
ਇਹ ਪੰਜਾਬੀ ਗੀਤ ਪ੍ਰਸਿੱਧ ਲੋਕ ਧੁਨ ‘ਤੇ ਆਧਾਰਿਤ ਹੈ ਅਤੇ ਸਿੱਖ ਇਤਿਹਾਸ ਦੇ ਤੱਤਾਂ ਨੂੰ ਫਿਲਮ ਦੇ ਪਲਾਟ ਨਾਲ ਜੋੜਦਾ ਹੈ। ਫਿਲਮ ‘ਚ ਇਹ ਗੀਤ ਰਣਬੀਰ ਅਤੇ ਉਨ੍ਹਾਂ ਦੇ ਸਾਥੀਆਂ ‘ਤੇ ਫਿਲਮਾਇਆ ਗਿਆ ਹੈ।
ਆਓ ਜਾਣਦੇ ਹਾਂ ਇਸ ਗੀਤ ਬਾਰੇ…
ਅਰਜਨ ਵੇਲੀ ਗੀਤ ਨੂੰ ਪ੍ਰਸਿੱਧ ਪੰਜਾਬੀ ਕਲਾਕਾਰ ਭੁਪਿੰਦਰ ਬੱਬਲ ਨੇ ਲਿਖਿਆ ਅਤੇ ਗਾਇਆ ਹੈ। ਇਹ ਢਾਡੀ-ਵਾਰ ਸੰਗੀਤ ਸ਼ੈਲੀ ਵਿੱਚ ਰਚਿਆ ਗਿਆ ਹੈ ਜੋ ਗੁਰੂ ਗੋਬਿੰਦ ਸਿੰਘ ਦੁਆਰਾ ਮੁਗਲਾਂ ਨਾਲ ਲੜਦੇ ਸਮੇਂ ਆਪਣੇ ਸਿੱਖ ਯੋਧਿਆਂ ਵਿੱਚ ਹਿੰਮਤ ਪੈਦਾ ਕਰਨ ਲਈ ਗਾਇਆ ਗਿਆ ਸੀ।
ਇਹ ਇੱਕ ਜੰਗੀ ਨਾਅਰੇ ਵਾਂਗ ਸੀ ਜੋ ਅਰਜਨ ਸਿੰਘ ਨਲਵਾ ਦੀ ਬਹਾਦਰੀ ਅਤੇ ਜੰਗ ਦੇ ਮੈਦਾਨ ਵਿੱਚ ਉਸਦੇ ਬਹਾਦਰੀ ਦੇ ਕਾਰਨਾਮੇ ਬਿਆਨ ਕਰਦੀ ਹੈ। ਅਰਜਨ ਵੇਲੀ ਦਾ ਸਿੱਖ ਇਤਿਹਾਸ ਨਾਲ ਵੀ ਸਬੰਧ ਹੈ। ਇਹ ਅਸਲੀ ਗੀਤ ਪੰਜਾਬੀ ਲੋਕ ਕਲਾਕਾਰ ਕੁਲਦੀਪ ਮਾਣਕ ਦੁਆਰਾ ਤਿਆਰ ਕੀਤਾ ਗਿਆ ਸੀ, ਜੋ ਕਿ ਸਿੱਖ ਫੌਜੀ ਕਮਾਂਡਰ ਹਰੀ ਸਿੰਘ ਨਲਵਾ ਦੇ ਪੁੱਤਰ ਅਰਜਨ ਸਿੰਘ ਨਲਵਾ ਦੇ ਜੀਵਨ ‘ਤੇ ਆਧਾਰਿਤ ਸੀ।
ਹਰੀ ਸਿੰਘ ਨਲਵਾ 1825 ਤੋਂ 1837 ਤੱਕ ਸਿੱਖ ਖਾਲਸਾ ਫੌਜ ਦਾ ਕਮਾਂਡਰ-ਇਨ-ਚੀਫ ਰਿਹਾ। ਉਸਦੇ ਸਭ ਤੋਂ ਛੋਟੇ ਪੁੱਤਰ ਅਰਜਨ ਸਿੰਘ ਨੇ ਉਸਦੀ ਮੌਤ ਤੋਂ ਬਾਅਦ ਆਪਣੇ ਪਿਤਾ ਦੀ ਕਮਾਨ ਸੰਭਾਲੀ ਅਤੇ ਮੁਗਲਾਂ ਵਿਰੁੱਧ ਲੜਿਆ ਸੀ।
ਐਨੀਮਲ ਦਾ ਗੀਤ ਅਰਜਨ ਵੇਲੀ ਦੱਸਦਾ ਹੈ ਕਿ ਕਿਵੇਂ ਅਰਜਨ ਸਿੰਘ ਨਲਵਾ ਨੇ ਆਪਣੀ ਗੰਡਾਸੀ (ਕੁਹਾੜੀ) ਨਾਲ ਜੰਗ ਦੇ ਮੈਦਾਨ ਵਿੱਚ ਤਬਾਹੀ ਮਚਾਈ ਸੀ। ਗੀਤ ਦੇ ਅੰਤ ਵਿੱਚ ਅਰਜਨ ਦੀ ਤੁਲਨਾ ਸ਼ੇਰ ਨਾਲ ਕੀਤੀ ਗਈ ਹੈ। ਇਹ ਵੀ ਕਿਹਾ ਜਾਂਦਾ ਹੈ ਕਿ ਉਹ ਪੁਲਿਸ ਅਤੇ ਸਰਕਾਰ ਨੂੰ ਆਪਣੇ ਪੈਰਾਂ ਹੇਠ ਰੱਖਦਾ ਹੈ।
ਗੀਤ ਅਰਜਨ ਸਿੰਘ ਨਲਵਾ ਅਤੇ ਅਰਜੁਨ, ਐਨੀਮਲ ਦੇ ਮੁੱਖ ਪਾਤਰ ਦੇ ਵਿਚਕਾਰ ਸਮਾਨਤਾਵਾਂ ਦਰਸਾਉਂਦਾ ਹੈ।
ਸੰਦੀਪ ਰੈੱਡੀ ਵਾਂਗਾ ਦੇ ਨਿਰਦੇਸ਼ਨ ‘ਚ ਬਣੀ ਇਸ ਫਿਲਮ ‘ਚ ਰਣਬੀਰ ਕਪੂਰ ਤੋਂ ਇਲਾਵਾ ਬੌਬੀ ਦਿਓਲ, ਅਨਿਲ ਕਪੂਰ, ਰਸ਼ਮਿਕਾ ਮੰਡਾਨਾ ਅਤੇ ਤ੍ਰਿਪਤੀ ਡਿਮਰੀ ਸਮੇਤ ਕਈ ਕਲਾਕਾਰ ਨਜ਼ਰ ਆਉਣਗੇ। 1 ਦਸੰਬਰ ਨੂੰ ਰਿਲੀਜ਼ ਹੋਣ ਜਾ ਰਹੀ ਇਸ ਫਿਲਮ ਨੂੰ ਸੈਂਸਰ ਬੋਰਡ ਨੇ ‘ਏ’ ਰੇਟਿੰਗ ਦਿੱਤੀ ਹੈ।
ਮੰਨਿਆ ਜਾ ਰਿਹਾ ਹੈ ਕਿ ਇਹ ਰਣਬੀਰ ਕਪੂਰ ਦੇ ਕਰੀਅਰ ਦੀ ਸਭ ਤੋਂ ਵੱਡੀ ਓਪਨਿੰਗ ਅਤੇ ਹਿੱਟ ਫਿਲਮ ਸਾਬਤ ਹੋਵੇਗੀ। ਫਿਲਮ ਨੇ ਐਡਵਾਂਸ ਬੁਕਿੰਗ ਰਾਹੀਂ ਹੁਣ ਤੱਕ 14 ਕਰੋੜ ਰੁਪਏ ਕਮਾ ਲਏ ਹਨ।
