- ਅੰਮ੍ਰਿਤਸਰ ਵਿੱਚ ਹੋਇਆ ਸਸਕਾਰ ਕੀਤਾ ਗਿਆ, ਭਰਾ ਨੇ ਦਿੱਤੀ ਮੁੱਖ ਅਗਨੀ
ਅੰਮ੍ਰਿਤਸਰ, 16 ਫਰਵਰੀ 2024 – ਦੂਰਦਰਸ਼ਨ ਦੇ ਸੀਰੀਅਲ ‘ਉਡਾਨ’ ਤੋਂ ਪ੍ਰਸਿੱਧੀ ਹਾਸਲ ਕਰਨ ਵਾਲੀ ਅਦਾਕਾਰਾ ਕਵਿਤਾ ਚੌਧਰੀ ਦਾ ਸ਼ੁੱਕਰਵਾਰ ਨੂੰ 62 ਸਾਲ ਦੀ ਉਮਰ ‘ਚ ਦਿਹਾਂਤ ਹੋ ਗਿਆ। ਉਹ ਲੰਬੇ ਸਮੇਂ ਤੋਂ ਕੈਂਸਰ ਤੋਂ ਪੀੜਤ ਸੀ। ਉਨ੍ਹਾਂ ਦਾ ਅੰਤਿਮ ਸਸਕਾਰ ਅੰਮ੍ਰਿਤਸਰ ਵਿਖੇ ਕੀਤਾ ਗਿਆ। ਕਵਿਤਾ ਚੌਧਰੀ ਦਾ ਜਨਮ ਅੰਮ੍ਰਿਤਸਰ ਵਿੱਚ ਹੋਇਆ ਸੀ ਅਤੇ ਉਸਨੇ ਆਪਣੀ ਜ਼ਿੰਦਗੀ ਦਾ ਆਖਰੀ ਸਮਾਂ ਇੱਥੇ ਬਿਤਾਉਣ ਲਈ 2018 ਵਿੱਚ ਮਾਨਾਂਵਾਲਾ ਵਿੱਚ ਇੱਕ ਘਰ ਖਰੀਦਿਆ ਸੀ।
ਅਦਾਕਾਰਾ ਕਵਿਤਾ ਚੌਧਰੀ ਦਾ ਅੰਮ੍ਰਿਤਸਰ ਦੇ ਪਾਰਵਤੀ ਦੇਵੀ ਹਸਪਤਾਲ ਵਿੱਚ ਕੈਂਸਰ ਦਾ ਇਲਾਜ ਚੱਲ ਰਿਹਾ ਸੀ। ਜਿੱਥੇ ਬੀਤੀ ਦੇਰ ਰਾਤ ਉਨ੍ਹਾਂ ਨੇ ਆਖਰੀ ਸਾਹ ਲਿਆ। ਕਵਿਤਾ ਚੌਧਰੀ ਦਾ ਸਸਕਾਰ ਉਸ ਦੇ ਭਰਾ ਕਪਿਲ ਚੌਧਰੀ ਨੇ ਕੀਤਾ। ਹਾਲਾਂਕਿ ਉਨ੍ਹਾਂ ਦੇ ਸਹਾਇਕ ਅਜੈ ਨੇ ਵੀ ਉਨ੍ਹਾਂ ਦਾ ਸਾਥ ਦਿੱਤਾ। ਇਸ ਦੌਰਾਨ ਸਾਬਕਾ ਕਾਂਗਰਸੀ ਵਿਧਾਇਕ ਡਾ: ਰਾਜ ਕੁਮਾਰ ਵੀ ਪਹੁੰਚੇ। ਉਨ੍ਹਾਂ ਦੀ ਮੌਤ ਨਾਲ ਬਾਲੀਵੁੱਡ ਅਤੇ ਫਿਲਮ ਇੰਡਸਟਰੀ ਨੂੰ ਵੱਡਾ ਸਦਮਾ ਲੱਗਾ ਹੈ।
35 ਸਾਲ ਪਹਿਲਾਂ ਦੂਰਦਰਸ਼ਨ ‘ਤੇ ਇੱਕ ਸੀਰੀਅਲ ਉਡਾਨ ਪ੍ਰਸਾਰਿਤ ਕੀਤਾ ਗਿਆ ਸੀ। ਇਸ ਦੀ ਕਹਾਣੀ ਅਤੇ ਸੈੱਟ ਵੀ ਅਸਲੀ ਸਨ। ਇਹ ਸੀਰੀਅਲ ਕਵਿਤਾ ਚੌਧਰੀ ਨੇ ਆਪਣੀ ਭੈਣ ਆਈਪੀਐਸ ਕੰਚਨ ਚੌਧਰੀ ਭੱਟਾਚਾਰੀਆ ਦੇ ਪ੍ਰਭਾਵ ਹੋ ਕੇ ਬਣਾਇਆ ਸੀ। ਉਨ੍ਹਾਂ ਦੀ ਭੈਣ ਕੰਚਨ ਦੇਸ਼ ਦੀ ਪਹਿਲੀ ਆਈਪੀਐਸ ਬਣਨ ਵਾਲੀ ਕਿਰਨ ਬੇਦੀ ਤੋਂ ਬਾਅਦ ਦੂਜੀ ਮਹਿਲਾ ਆਈਪੀਐਸ ਅਧਿਕਾਰੀ ਸੀ। ਦੋਵਾਂ ਦੀ ਖਾਸ ਗੱਲ ਇਹ ਸੀ ਕਿ ਦੋਵੇਂ ਅੰਮ੍ਰਿਤਸਰ ਦੇ ਰਹਿਣ ਵਾਲੀਆਂ ਸਨ।
ਕਵਿਤਾ ਨੇ ਸੀਰੀਅਲ ਉਡਾਨ ਵਿੱਚ ਆਪਣੀ ਹੀ ਆਈਪੀਐਸ ਭੈਣ ਦੀ ਜ਼ਿੰਦਗੀ ਨੂੰ ਲੋਕਾਂ ਦੇ ਸਾਹਮਣੇ ਪੇਸ਼ ਕੀਤਾ ਸੀ। 1989 ‘ਚ ਦੂਰਦਰਸ਼ਨ ‘ਤੇ ਆਇਆ ਟੀਵੀ ਸ਼ੋਅ ‘ਉਡਾਨ’ ਭਾਰਤ ਦੀ ਦੂਜੀ ਆਈਪੀਐਸ ਅਧਿਕਾਰੀ ਕੰਚਨ ਚੌਧਰੀ ਭੱਟਾਚਾਰੀਆ ਦੀ ਕਹਾਣੀ ‘ਤੇ ਆਧਾਰਿਤ ਸੀ, ਜਿਸ ਨੂੰ ਉਸ ਦੀ ਭੈਣ ਕਵਿਤਾ ਚੌਧਰੀ ਦੁਆਰਾ ਨਿਰਦੇਸ਼ਿਤ ਕੀਤਾ ਗਿਆ ਸੀ ਅਤੇ ਉਸ ਨੇ ਇਸ ਵਿੱਚ ਮੁੱਖ ਭੂਮਿਕਾ ਵੀ ਨਿਭਾਈ ਸੀ। ਕਵਿਤਾ ਨੇ ਆਪਣੀ ਭੈਣ ਕੰਚਨ ਚੌਧਰੀ ਦੀ ਭੂਮਿਕਾ ਦਾ ਨਾਂ ਕਲਿਆਣੀ ਸਿੰਘ ਰੱਖਿਆ ਸੀ। ਸਿਰਫ 30 ਐਪੀਸੋਡਾਂ ਵਾਲੀ ਇਸ ਟੀਵੀ ਸੀਰੀਜ਼ ਨੂੰ ਜ਼ਬਰਦਸਤ ਪ੍ਰਸ਼ੰਸਾ ਮਿਲੀ ਸੀ।
ਇਸ ਤੋਂ ਬਾਅਦ ਕਵਿਤਾ ਨੇ ਦੋ ਹੋਰ ਸੀਰੀਅਲ ਕੀਤੇ। ਜਿਨ੍ਹਾਂ ਵਿੱਚੋਂ ਇੱਕ, ਯੁਅਰ ਆਨਰ, 2000 ਵਿੱਚ ਦੂਰਦਰਸ਼ਨ ਉੱਤੇ ਦਿਖਾਇਆ ਗਿਆ ਸੀ। ਇਸ ਵਿੱਚ ਕਵਿਤਾ ਕੌਸ਼ਲਿਆ ਦੇ ਰੋਲ ਵਿੱਚ ਨਜ਼ਰ ਆਈ ਸੀ। ਇਸ ਤੋਂ ਬਾਅਦ, 2015 ਵਿੱਚ, ਕਵਿਤਾ ਇੱਕ ਵਾਰ ਫਿਰ ਦੂਰਦਰਸ਼ਨ ‘ਤੇ ਸੀਰੀਅਲ IPS ਵਿੱਚ ਨਜ਼ਰ ਆਈ ਸੀ। ਇਹ ਇੱਕ ਅਪਰਾਧ ਅਧਾਰਤ ਸੀਰੀਅਲ ਸੀ। ਜਿਸ ਦੀ ਐਂਕਰ ਕਵਿਤਾ ਚੌਧਰੀ ਖੁਦ ਸੀ।
