ਨਵੀਂ ਦਿੱਲੀ, 14 ਮਈ 2024 – ਇੰਡੀਅਨ ਪ੍ਰੀਮੀਅਰ ਲੀਗ (IPL) ਦੇ 64ਵੇਂ ਮੈਚ ‘ਚ ਅੱਜ ਦਿੱਲੀ ਕੈਪੀਟਲਸ ਦਾ ਸਾਹਮਣਾ ਲਖਨਊ ਸੁਪਰ ਜਾਇੰਟਸ ਨਾਲ ਹੋਵੇਗਾ। ਇਹ ਮੈਚ ਦਿੱਲੀ ਦੇ ਘਰੇਲੂ ਮੈਦਾਨ ਅਰੁਣ ਜੇਤਲੀ ਸਟੇਡੀਅਮ ‘ਚ ਸ਼ਾਮ 7:30 ਵਜੇ ਤੋਂ ਖੇਡਿਆ ਜਾਵੇਗਾ। ਟਾਸ ਸ਼ਾਮ 7 ਵਜੇ ਹੋਵੇਗਾ।
ਦਿੱਲੀ ਲਈ ਪਲੇਆਫ ਦੀਆਂ ਉਮੀਦਾਂ ਬਰਕਰਾਰ ਹਨ। ਦਿੱਲੀ ਦੇ 13 ਮੈਚਾਂ ‘ਚ 6 ਜਿੱਤਾਂ ਤੇ 7 ਹਾਰਾਂ ਨਾਲ 12 ਅੰਕ ਹਨ ਪਰ ਆਰਸੀਬੀ ਨਾਲੋਂ ਖਰਾਬ ਰਨ ਰੇਟ ਕਾਰਨ ਟੀਮ ਛੇਵੇਂ ਸਥਾਨ ‘ਤੇ ਹੈ। ਕੁਆਲੀਫਾਈ ਕਰਨ ਲਈ ਟੀਮ ਨੂੰ ਹੁਣ ਆਖਰੀ ਮੈਚ ‘ਚ ਲਖਨਊ ਨੂੰ ਹਰਾਉਣਾ ਹੋਵੇਗਾ ਅਤੇ ਦੂਜੇ ਨਤੀਜਿਆਂ ‘ਤੇ ਵੀ ਨਿਰਭਰ ਕਰਨਾ ਹੋਵੇਗਾ।
ਦੂਜੇ ਪਾਸੇ ਲਖਨਊ ਕੋਲ ਜਿੱਤ ਦਰਜ ਕਰਕੇ ਚੌਥਾ ਸਥਾਨ ਹਾਸਲ ਕਰਨ ਦਾ ਮੌਕਾ ਹੈ। ਟੀਮ ਦੇ 2 ਮੈਚ ਬਾਕੀ ਹਨ, ਜੇਕਰ ਟੀਮ ਦੋਵੇਂ ਜਿੱਤ ਜਾਂਦੀ ਹੈ ਤਾਂ ਉਹ 16 ਅੰਕਾਂ ਨਾਲ ਕੁਆਲੀਫਾਈ ਕਰ ਸਕਦੀ ਹੈ।
ਦੋਵਾਂ ਟੀਮਾਂ ਵਿਚਾਲੇ ਹੁਣ ਤੱਕ 4 ਮੈਚ ਹੋ ਚੁੱਕੇ ਹਨ। ਇਨ੍ਹਾਂ ‘ਚੋਂ 3 ‘ਚ ਲਖਨਊ ਨੇ ਜਿੱਤ ਦਰਜ ਕੀਤੀ। ਜਦਕਿ ਦਿੱਲੀ ਨੇ 1 ਵਿੱਚ ਜਿੱਤ ਦਰਜ ਕੀਤੀ। ਦਿੱਲੀ ਨੂੰ ਇਸ ਸੀਜ਼ਨ ‘ਚ ਲਖਨਊ ਖਿਲਾਫ ਇਕਲੌਤੀ ਜਿੱਤ ਮਿਲੀ ਹੈ। ਟੀਮ ਨੇ ਲਖਨਊ ਵਿੱਚ ਇਹ ਮੈਚ 6 ਵਿਕਟਾਂ ਨਾਲ ਜਿੱਤਿਆ ਸੀ।
