ਬਠਿੰਡਾ, 11 ਜੂਨ 2024 – ਪੁਲਿਸ ਨੇ ਬਠਿੰਡਾ ਦੇ ਪਿੰਡ ਕੋਟ ਸਮੀਰ ਦੇ ਗੁਰਦੁਆਰਾ ਜੰਡਲੀ ਸਰ ਸਾਹਿਬ ਵਿੱਚ ਹਾਲ ਹੀ ਵਿੱਚ ਚੋਰੀ ਦੀ ਵਾਰਦਾਤ ਨੂੰ ਅੰਜਾਮ ਦੇਣ ਵਾਲੀਆਂ 9 ਔਰਤਾਂ ਅਤੇ ਇੱਕ ਆਟੋ ਚਾਲਕ ਨੂੰ ਗ੍ਰਿਫ਼ਤਾਰ ਕਰਕੇ ਉਨ੍ਹਾਂ ਦੇ ਕਬਜ਼ੇ ਵਿੱਚੋਂ ਚੋਰੀ ਦਾ ਸਾਮਾਨ ਬਰਾਮਦ ਕੀਤਾ ਹੈ।
ਕੋਰ ਸਮੀਰ ਪੁਲਿਸ ਚੌਕੀ ਗੁਰਦੁਆਰਾ ਜੰਡਲੀ ਸਰਾਂ ਦੇ ਮੁਖੀ ਮਨਪ੍ਰੀਤ ਸਿੰਘ ਵੱਲੋਂ ਸੂਚਨਾ ਦਿੱਤੀ ਗਈ ਕਿ ਕੁਝ ਔਰਤਾਂ ਗੁਰਦੁਆਰਾ ਸਹਿਬ ‘ਚੋਂ ਸਾਮਾਨ ਚੋਰੀ ਕਰ ਕੇ ਲੈ ਗਈਆਂ ਹਨ। ਇਸ ’ਤੇ ਕਾਰਵਾਈ ਕਰਦਿਆਂ ਥਾਣਾ ਸਦਰ ਬਠਿੰਡਾ ਦੀ ਪੁਲੀਸ ਨੇ 9 ਔਰਤਾਂ ਦੇ ਨਾਮ ’ਤੇ ਕੇਸ ਦਰਜ ਕਰ ਲਿਆ ਹੈ। ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ ਬਠਿੰਡਾ ਦੀ ਖੇਤਾ ਸਿੰਘ ਬਸਤੀ, ਕੱਚੀ ਕਲੋਨੀ ਆਦਿ ਇਲਾਕਿਆਂ ਦੀਆਂ ਔਰਤਾਂ ਦਾ ਇੱਕ ਗਰੋਹ ਕੋਟਸ਼ਮੀਰ ਅਤੇ ਆਸਪਾਸ ਦੇ ਇਲਾਕਿਆਂ ਵਿੱਚ ਆਇਆ ਹੋਇਆ ਸੀ। ਇਹ ਗਰੋਹ ਦਿਨ-ਦਿਹਾੜੇ ਚੋਰੀ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦਿੰਦਾ ਹੈ ਅਤੇ ਚੋਰੀ ਦਾ ਸਮਾਨ ਸੁੰਨਸਾਨ ਥਾਵਾਂ ‘ਤੇ ਲੁਕਾ ਦਿੰਦਾ ਹੈ।
ਇਸ ਦੌਰਾਨ ਪੁਲਿਸ ਨੂੰ ਸੂਚਨਾ ਮਿਲੀ ਕਿ ਮਹਿਲਾ ਚੋਰ ਰਾਤ ਨੂੰ ਆਪਣੇ ਪੁਰਸ਼ ਸਾਥੀਆਂ ਨਾਲ ਆਉਂਦੇ ਹਨ ਅਤੇ ਵੱਖ-ਵੱਖ ਥਾਵਾਂ ‘ਤੇ ਲੁਕੋ ਕੇ ਰੱਖੇ ਹੋਏ ਸਮਾਨ ਚੋਰੀ ਕਰਕੇ ਲੈ ਜਾਂਦੇ ਹਨ। ਇਸ ਸੂਚਨਾ ਦੇ ਆਧਾਰ ‘ਤੇ ਥਾਣਾ ਤਲਵੰਡੀ ਰੋਡ ਦੇ ਮੁਖੀਆਂ ਸਮੇਤ ਪੁਲਿਸ ਪਾਰਟੀ ਵੱਲੋਂ ਨਾਕਾਬੰਦੀ ਕਰਕੇ ਆਟੋ ਰਿਕਸ਼ਾ ‘ਚ ਸਫ਼ਰ ਕਰ ਰਹੀਆਂ 9 ਔਰਤਾਂ ਨੂੰ ਆਟੋ ਰਿਕਸ਼ਾ ਸਮੇਤ ਕਾਬੂ ਕੀਤਾ ਗਿਆ | ਪੁੱਛਗਿੱਛ ਦੌਰਾਨ ਔਰਤਾਂ ਨੇ ਚੋਰੀ ਦੀ ਗੱਲ ਕਬੂਲੀ। ਇਨ੍ਹਾਂ ਦੇ ਕਬਜ਼ੇ ‘ਚੋਂ 2 ਚੋਰੀ ਦੀਆਂ ਬੈਟਰੀਆਂ, 1 ਇਨਵਰਟਰ, 1 ਪੁਰਾਣਾ ਫਰਿੱਜ, 2 ਛੱਤ ਵਾਲੇ ਪੱਖੇ, 2 ਕਾਰਾਂ ਦੇ ਰਿਮ ਬਰਾਮਦ ਹੋਏ ਹਨ।
