ਨਵੀਂ ਦਿੱਲੀ, 13 ਨਵੰਬਰ 2024 – ਅਮਰੀਕੀ ਰਾਸ਼ਟਰਪਤੀ ਚੋਣਾਂ ‘ਚ ਡੋਨਾਲਡ ਟਰੰਪ ਦੀ ਜਿੱਤ ਤੋਂ ਬਾਅਦ ਗਰਭਪਾਤ ਅਤੇ ਗਰਭ ਨਿਰੋਧਕ ਗੋਲੀਆਂ ਦੀ ਵਿਕਰੀ ਵਧ ਗਈ ਹੈ। ਅਮਰੀਕਾ ਵਿੱਚ ਗਰਭਪਾਤ ਦੀਆਂ ਗੋਲੀਆਂ ਦੀ ਸਭ ਤੋਂ ਵੱਡੀ ਸਪਲਾਇਰ ਐਡ ਐਕਸੈਸ ਦੇ ਅਨੁਸਾਰ, ਟਰੰਪ ਦੀ ਜਿੱਤ ਦੇ 24 ਘੰਟਿਆਂ ਦੇ ਅੰਦਰ, 10,000 ਔਰਤਾਂ ਵੱਲੋਂ ਦਵਾਈਆਂ ਦੀਆਂ ਬੇਨਤੀਆਂ ਪ੍ਰਾਪਤ ਹੋਈਆਂ, ਆਮ ਤੌਰ ‘ਤੇ ਇਹ ਗਿਣਤੀ 600 ਦੇ ਕਰੀਬ ਹੁੰਦੀ ਹੈ। ਦਰਅਸਲ, ਟਰੰਪ ਦੇ ਪਹਿਲੇ ਕਾਰਜਕਾਲ ਦੌਰਾਨ, ਯੂਐਸ ਸੁਪਰੀਮ ਕੋਰਟ ਨੇ 2022 ਵਿੱਚ ਗਰਭਪਾਤ ਦੇ ਅਧਿਕਾਰਾਂ ਨੂੰ ਖਤਮ ਕਰ ਦਿੱਤਾ ਸੀ। ਟਰੰਪ ਦੀ ਜਿੱਤ ਤੋਂ ਬਾਅਦ ਕਈ ਔਰਤਾਂ ਨੂੰ ਡਰ ਹੈ ਕਿ ਗਰਭਪਾਤ ਨਾਲ ਸਬੰਧਤ ਕਾਨੂੰਨ ਹੋਰ ਸਖ਼ਤ ਬਣਾਏ ਜਾਣਗੇ।
ਅਮਰੀਕਾ ਵਿੱਚ 1880 ਤੱਕ ਗਰਭਪਾਤ ਕਰਵਾਉਣਾ ਆਸਾਨ ਅਤੇ ਕਾਨੂੰਨੀ ਸੀ। ਹਾਲਾਂਕਿ, 1873 ਵਿੱਚ, ਅਮਰੀਕੀ ਕਾਂਗਰਸ ਵਿੱਚ ਕਾਮਸਟੌਕ ਕਾਨੂੰਨ ਪਾਸ ਕਰਕੇ ਗਰਭਪਾਤ ਦੀਆਂ ਦਵਾਈਆਂ ‘ਤੇ ਪਾਬੰਦੀ ਲਗਾ ਦਿੱਤੀ ਗਈ ਸੀ। 1900 ਤੱਕ, ਲਗਭਗ ਸਾਰੇ ਰਾਜਾਂ ਵਿੱਚ ਗਰਭਪਾਤ ‘ਤੇ ਪਾਬੰਦੀ ਲਗਾ ਦਿੱਤੀ ਗਈ ਸੀ। ਅਜਿਹਾ ਉਦੋਂ ਹੀ ਕੀਤਾ ਜਾ ਸਕਦਾ ਸੀ ਜਦੋਂ ਗਰਭ ਅਵਸਥਾ ਮਾਂ ਦੀ ਜਾਨ ਨੂੰ ਖਤਰਾ ਪੈਦਾ ਕਰਦੀ ਸੀ। 1973 ਵਿੱਚ, ਸੁਪਰੀਮ ਕੋਰਟ ਨੇ ਗਰਭਪਾਤ ਨੂੰ ਕਾਨੂੰਨੀ ਮਾਨਤਾ ਦਿੱਤੀ ਸੀ। ਪਰ ਇਹ ਫੈਸਲਾ ਜੂਨ 2022 ਵਿੱਚ ਉਲਟਾ ਦਿੱਤਾ ਗਿਆ।
