ਨਵੀਂ ਦਿੱਲੀ, 10 ਦਸੰਬਰ 2024 – ਆਈਸੀਸੀ ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ (ਡਬਲਯੂਟੀਸੀ) ਦੇ ਫਾਈਨਲ ਦਾ ਸਮੀਕਰਨ ਹੋਰ ਗੁੰਝਲਦਾਰ ਹੁੰਦਾ ਜਾ ਰਿਹਾ ਹੈ। ਨਿਊਜ਼ੀਲੈਂਡ ਖਿਲਾਫ ਕਲੀਨ ਸਵੀਪ ਨਾਲ ਹਾਰਨ ਅਤੇ ਆਸਟ੍ਰੇਲੀਆ ਖਿਲਾਫ ਐਡੀਲੇਡ ਟੈਸਟ ‘ਚ ਹਾਰ ਤੋਂ ਬਾਅਦ ਭਾਰਤੀ ਟੀਮ ਲਈ ਰਾਹ ਕਾਫੀ ਮੁਸ਼ਕਿਲ ਨਜ਼ਰ ਆ ਰਿਹਾ ਹੈ। ਨਵੇਂ ਸਮੀਕਰਨ ਮੁਤਾਬਕ ਹੁਣ ਭਾਰਤੀ ਟੀਮ ਨੂੰ ਪਾਕਿਸਤਾਨ ਦੀ ਜਿੱਤ ‘ਤੇ ਨਿਰਭਰ ਰਹਿਣਾ ਪੈ ਸਕਦਾ ਹੈ।
ਦਰਅਸਲ, ਦੱਖਣੀ ਅਫਰੀਕਾ ਨੇ ਸ਼੍ਰੀਲੰਕਾ ਖਿਲਾਫ ਦੋ ਮੈਚਾਂ ਦੀ ਟੈਸਟ ਸੀਰੀਜ਼ ‘ਤੇ 2-0 ਨਾਲ ਕਬਜ਼ਾ ਕਰ ਲਿਆ ਸੀ। ਸੀਰੀਜ਼ ਦਾ ਦੂਜਾ ਮੈਚ ਸੇਂਟ ਜਾਰਜ ਪਾਰਕ, ਗੱਕੇਬਰਾਹਾ ਵਿਖੇ ਖੇਡਿਆ ਗਿਆ। ਇਸ ਮੈਚ ਵਿੱਚ ਮੇਜ਼ਬਾਨ ਟੀਮ ਦੱਖਣੀ ਅਫਰੀਕਾ ਨੇ 109 ਦੌੜਾਂ ਨਾਲ ਜਿੱਤ ਦਰਜ ਕੀਤੀ। ਸ਼੍ਰੀਲੰਕਾ ਖਿਲਾਫ ਇਸ ਧਮਾਕੇਦਾਰ ਜਿੱਤ ਤੋਂ ਬਾਅਦ ਦੱਖਣੀ ਅਫਰੀਕਾ ਨੂੰ ਡਬਲਯੂਟੀਸੀ ਦੇ ਅੰਕ ਸੂਚੀ ਵਿੱਚ ਵੱਡਾ ਫਾਇਦਾ ਹੋਇਆ ਹੈ। ਅਫਰੀਕੀ ਟੀਮ ਹੁਣ ਪਹਿਲੇ ਨੰਬਰ ‘ਤੇ ਆ ਗਈ ਹੈ। 10 ਟੈਸਟ ਮੈਚਾਂ ਵਿੱਚ 6 ਜਿੱਤਾਂ, ਤਿੰਨ ਹਾਰਾਂ ਅਤੇ ਇੱਕ ਡਰਾਅ ਨਾਲ ਦੱਖਣੀ ਅਫਰੀਕਾ ਦੀ ਟੀਮ ਦੇ ਕੁੱਲ 76 ਅੰਕ ਹੋ ਗਏ ਹਨ। ਟੀਮ ਦਾ ਸਕੋਰ ਪ੍ਰਤੀਸ਼ਤ 63.33 ਹੈ, ਜੋ ਕਿ ਆਸਟ੍ਰੇਲੀਆ ਤੋਂ ਵੱਧ ਹੈ।
ਦੂਜੇ ਪਾਸੇ ਆਸਟ੍ਰੇਲੀਆਈ ਟੀਮ ਹੁਣ ਦੂਜੇ ਸਥਾਨ ‘ਤੇ ਖਿਸਕ ਗਈ ਹੈ। ਹੁਣ ਤੱਕ ਆਸਟਰੇਲੀਆ ਦੇ 14 ਮੈਚਾਂ ਵਿੱਚ 9 ਜਿੱਤ, 4 ਹਾਰ ਅਤੇ 1 ਡਰਾਅ ਨਾਲ 102 ਅੰਕ ਹਨ। ਉਸ ਦੇ ਅੰਕਾਂ ਦੀ ਪ੍ਰਤੀਸ਼ਤਤਾ 60.71 ਹੈ। ਭਾਰਤ, ਜੋ ਇਸ ਸਮੇਂ ਤੀਜੇ ਸਥਾਨ ‘ਤੇ ਹੈ, ਦੇ 16 ਮੈਚਾਂ ਵਿੱਚ 9 ਜਿੱਤਾਂ, 6 ਹਾਰਾਂ ਅਤੇ ਇੱਕ ਡਰਾਅ ਨਾਲ 110 ਅੰਕ ਹਨ। ਉਸ ਦੇ ਅੰਕਾਂ ਦੀ ਪ੍ਰਤੀਸ਼ਤਤਾ 57.29 ਹੈ। ਭਾਰਤ ਨੂੰ ਮੌਜੂਦਾ ਚੱਕਰ ‘ਚ 3 ਹੋਰ ਮੈਚ ਖੇਡਣੇ ਹਨ, ਜੋ ਸਿਰਫ ਆਸਟ੍ਰੇਲੀਆ ਖਿਲਾਫ ਹਨ।
ਆਸਟ੍ਰੇਲੀਆ ਨੂੰ ਜਨਵਰੀ ‘ਚ 2 ਮੈਚਾਂ ਦੀ ਟੈਸਟ ਸੀਰੀਜ਼ ਲਈ ਸ਼੍ਰੀਲੰਕਾ ਦਾ ਦੌਰਾ ਕਰਨਾ ਹੈ। ਜਦੋਂ ਕਿ ਭਾਰਤੀ ਟੀਮ ਨੂੰ ਇਸ ਆਸਟ੍ਰੇਲੀਆ ਦੌਰੇ ‘ਤੇ WTC 2023-25 ਸੀਜ਼ਨ ਦੇ ਆਖਰੀ ਮੈਚ ਖੇਡਣੇ ਹਨ। ਦੂਜੇ ਪਾਸੇ ਦੱਖਣੀ ਅਫਰੀਕੀ ਟੀਮ ਨੂੰ ਪਾਕਿਸਤਾਨ ਦੇ ਖਿਲਾਫ ਘਰੇਲੂ ਮੈਦਾਨ ‘ਤੇ 2 ਮੈਚਾਂ ਦੀ ਟੈਸਟ ਸੀਰੀਜ਼ ਖੇਡਣੀ ਹੈ। ਸ਼ਾਨ ਮਸੂਦ ਦੀ ਕਪਤਾਨੀ ‘ਚ ਪਾਕਿਸਤਾਨੀ ਟੀਮ ਨੂੰ 26 ਦਸੰਬਰ ਤੋਂ ਸੈਂਚੁਰੀਅਨ ‘ਚ ਪਹਿਲਾ ਮੈਚ ਅਤੇ 3 ਜਨਵਰੀ ਤੋਂ ਕੇਪਟਾਊਨ ‘ਚ ਦੂਜਾ ਟੈਸਟ ਮੈਚ ਖੇਡਣਾ ਹੈ।
ਜੇਕਰ ਭਾਰਤੀ ਟੀਮ ਆਪਣੇ ਬਾਕੀ ਤਿੰਨ ਮੈਚਾਂ ਵਿੱਚ ਆਸਟਰੇਲੀਆ ਨੂੰ ਹਰਾ ਦਿੰਦੀ ਹੈ ਤਾਂ ਉਹ ਫਾਈਨਲ ਵਿੱਚ ਪਹੁੰਚ ਸਕਦੀ ਹੈ। ਇਸ ਸਮੀਕਰਨ ‘ਚ ਜੇਕਰ ਦੱਖਣੀ ਅਫਰੀਕਾ ਪਾਕਿਸਤਾਨ ਨੂੰ ਦੋਵਾਂ ਟੈਸਟਾਂ ‘ਚ ਹਰਾ ਦਿੰਦਾ ਹੈ ਤਾਂ ਉਹ ਚੋਟੀ ‘ਤੇ ਰਹਿੰਦੇ ਹੋਏ ਡਬਲਿਊਟੀਸੀ ਫਾਈਨਲ ‘ਚ ਪਹੁੰਚ ਜਾਵੇਗਾ। ਉਥੇ ਹੀ ਭਾਰਤੀ ਟੀਮ ਤਿੰਨੋਂ ਮੈਚ ਜਿੱਤ ਕੇ ਦੂਜੇ ਸਥਾਨ ‘ਤੇ ਰਹਿ ਕੇ ਫਾਈਨਲ ਖੇਡੇਗੀ।
ਹਾਲਾਂਕਿ, ਜੇਕਰ ਆਸਟਰੇਲੀਆਈ ਟੀਮ ਸ਼੍ਰੀਲੰਕਾ ਦੇ ਖਿਲਾਫ ਦੋਵੇਂ ਟੈਸਟ ਮੈਚ ਜਿੱਤ ਜਾਂਦੀ ਹੈ, ਤਾਂ ਭਾਰਤੀ ਟੀਮ ਕੰਗਾਰੂਆਂ ਖਿਲਾਫ ਆਪਣੇ ਬਾਕੀ ਬਚੇ 3 ਮੈਚਾਂ ਵਿੱਚੋਂ 2 ਜਿੱਤ ਕੇ ਡਬਲਯੂਟੀਸੀ ਦੇ ਫਾਈਨਲ ਵਿੱਚ ਪਹੁੰਚ ਸਕਦੀ ਹੈ ਅਤੇ ਇੱਕ ਹਾਰ ਕੇ ਵੀ ਦੂਜੇ ਸਥਾਨ ‘ਤੇ ਰਹਿ ਸਕਦੀ ਹੈ। ਪਰ ਇਹ ਸਮੀਕਰਨ ਉਦੋਂ ਹੀ ਬਣੇਗਾ ਜਦੋਂ ਪਾਕਿਸਤਾਨੀ ਟੀਮ ਦੱਖਣੀ ਅਫ਼ਰੀਕਾ ਖ਼ਿਲਾਫ਼ ਦੋਵੇਂ ਮੈਚ ਜਿੱਤੇਗੀ ਜਾਂ ਡਰਾਅ ਕਰੇਗੀ।
