ਨਵੀਂ ਦਿੱਲੀ, 14 ਜਨਵਰੀ 2025 – ਟੀਮ ਇੰਡੀਆ ਦੇ ਸਲਾਮੀ ਬੱਲੇਬਾਜ਼ ਅਭਿਸ਼ੇਕ ਸ਼ਰਮਾ ਨਾਲ ਦਿੱਲੀ ਹਵਾਈ ਅੱਡੇ ‘ਤੇ ਬਦਸਲੂਕੀ ਕੀਤੀ ਗਈ। ਇਹ ਜਾਣਕਾਰੀ ਖੁਦ ਅਭਿਸ਼ੇਕ ਨੇ ਇੰਸਟਾਗ੍ਰਾਮ ‘ਤੇ ਇੱਕ ਸਟੋਰੀ ਸ਼ੇਅਰ ਕਰਕੇ ਦਿੱਤੀ ਹੈ। ਉਸਨੇ ਕਿਹਾ ਕਿ ਇੰਡੀਗੋ ਸਟਾਫ ਦੇ ਮਾੜੇ ਵਿਵਹਾਰ ਕਾਰਨ ਉਹ ਆਪਣੀ ਫਲਾਈਟ ਤੋਂ ਖੁੰਝ ਗਿਆ। ਉਹ ਛੁੱਟੀਆਂ ‘ਤੇ ਜਾ ਰਿਹਾ ਸੀ। ਹਾਲਾਂਕਿ, ਇਸ ਮਾਮਲੇ ਵਿੱਚ ਇੰਡੀਗੋ ਵੱਲੋਂ ਕੋਈ ਬਿਆਨ ਨਹੀਂ ਆਇਆ ਹੈ।
ਅਭਿਸ਼ੇਕ ਨੂੰ 22 ਜਨਵਰੀ ਤੋਂ ਇੰਗਲੈਂਡ ਵਿਰੁੱਧ ਸ਼ੁਰੂ ਹੋਣ ਵਾਲੀ ਟੀ-20 ਲੜੀ ਲਈ ਭਾਰਤੀ ਕ੍ਰਿਕਟ ਟੀਮ ਵਿੱਚ ਚੁਣਿਆ ਗਿਆ ਹੈ। 24 ਸਾਲਾ ਅਭਿਸ਼ੇਕ ਨੇ ਸੋਮਵਾਰ ਨੂੰ ਲਿਖਿਆ – “ਦਿੱਲੀ ਹਵਾਈ ਅੱਡੇ ‘ਤੇ ਇੰਡੀਗੋ ਨਾਲ ਮੇਰਾ ਸਭ ਤੋਂ ਬੁਰਾ ਅਨੁਭਵ ਹੋਇਆ। ਸਟਾਫ਼ ਦਾ ਵਿਵਹਾਰ, ਖਾਸ ਕਰਕੇ ਕਾਊਂਟਰ ਮੈਨੇਜਰ ਸੁਸ਼ਮਿਤਾ ਮਿੱਤਲ ਦਾ ਵਿਵਹਾਰ ਬਹੁਤ ਮਾੜਾ ਸੀ। ਮੈਂ ਸਮੇਂ ਸਿਰ ਸਹੀ ਕਾਊਂਟਰ ‘ਤੇ ਪਹੁੰਚ ਗਿਆ, ਪਰ ਉਨ੍ਹਾਂ ਨੇ ਮੈਨੂੰ ਬੇਲੋੜਾ ਦੂਜੇ ਕਾਊਂਟਰ ‘ਤੇ ਭੇਜ ਦਿੱਤਾ। ਬਾਅਦ ਵਿੱਚ ਮੈਨੂੰ ਦੱਸਿਆ ਗਿਆ ਕਿ ਚੈੱਕ-ਇਨ ਬੰਦ ਹੋ ਗਿਆ ਹੈ ਅਤੇ ਉਸ ਦੀ ਫਲਾਈਟ ਖੁੰਝ ਗਈ। ਉਸ ਕੋਲ ਸਿਰਫ਼ ਇੱਕ ਦਿਨ ਦੀ ਛੁੱਟੀ ਸੀ। ਜੋ ਹੁਣ ਪੂਰੀ ਤਰ੍ਹਾਂ ਬਰਬਾਦ ਹੋ ਚੁੱਕੀ ਹੈ। ਇਹ ਹੁਣ ਤੱਕ ਦਾ ਸਭ ਤੋਂ ਮਾੜਾ ਏਅਰਲਾਈਨ ਅਨੁਭਵ ਅਤੇ ਸਭ ਤੋਂ ਮਾੜਾ ਸਟਾਫ ਪ੍ਰਬੰਧਨ ਹੈ ਜੋ ਮੈਂ ਕਦੇ ਦੇਖਿਆ ਹੈ।”
ਅਭਿਸ਼ੇਕ ਵਿਜੇ ਹਜ਼ਾਰੇ ਟਰਾਫੀ ਵਿੱਚ ਪੰਜਾਬ ਦੇ ਕਪਤਾਨ ਸਨ। ਦੋ ਦਿਨ ਪਹਿਲਾਂ, 11 ਜਨਵਰੀ ਨੂੰ, ਉਸਦੀ ਟੀਮ ਨੂੰ ਕੁਆਰਟਰ ਫਾਈਨਲ ਮੈਚ ਵਿੱਚ ਮਹਾਰਾਸ਼ਟਰ ਦੇ ਹੱਥੋਂ 70 ਦੌੜਾਂ ਦੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਅਭਿਸ਼ੇਕ ਨੇ ਇਸ ਟੂਰਨਾਮੈਂਟ ਦੇ 8 ਮੈਚਾਂ ਵਿੱਚ ਇੱਕ ਸੈਂਕੜਾ ਅਤੇ 3 ਅਰਧ ਸੈਂਕੜਿਆਂ ਦੀ ਮਦਦ ਨਾਲ 467 ਦੌੜਾਂ ਬਣਾਈਆਂ ਹਨ।
