ਨਵੀ ਦਿੱਲੀ, 6 ਸਤੰਬਰ,2025: ਛੇ ਦਹਾਕਿਆਂ ਤੋਂ ਵੀ ਵੱਧ ਸਮੇਂ ਦੀ ਸੇਵਾ ਤੋਂ ਬਾਅਦ ਭਾਰਤੀ ਹਵਾਈ ਸੈਨਾ MiG-21 ਲੜਾਕੂ ਜਹਾਜ਼ ਨੂੰ ਅਲਵਿਦਾ ਕਹਿਣ ਲਈ ਤਿਆਰ ਹੈ। ਇਸ ਜਹਾਜ਼ ਨੂੰ 26 ਸਤੰਬਰ, 2025 ਨੂੰ ਇੱਕ ਵਿਸ਼ੇਸ਼ ਸਮਾਰੋਹ ਵਿੱਚ ਰਸਮੀ ਤੌਰ ‘ਤੇ ਸੇਵਾਮੁਕਤ ਕਰ ਦਿੱਤਾ ਜਾਵੇਗਾ। ਹਵਾਈ ਸੈਨਾ ਦੁਸ਼ਮਣਾਂ ਵਿੱਚ ਡਰ ਪੈਦਾ ਕਰਨ ਵਾਲੇ ਮਿਗ-21 ਨੂੰ ਇੱਕ ਵੱਖਰੇ ਅਤੇ ਖਾਸ ਤਰੀਕੇ ਨਾਲ ਅਲਵਿਦਾ ਕਹਿਣ ਦੀ ਤਿਆਰੀ ਕਰ ਰਹੀ ਹੈ।
ਮੀਡੀਆ ਰਿਪੋਰਟਸ ਅਨੁਸਾਰ ਇਸ ਮੌਕੇ ‘ਤੇ ਚੰਡੀਗੜ੍ਹ ਏਅਰ ਫੋਰਸ ਸਟੇਸ਼ਨ ‘ਤੇ ਇੱਕ ਵਿਸ਼ੇਸ਼ ਸਮਾਰੋਹ ਆਯੋਜਿਤ ਕੀਤਾ ਜਾਵੇਗਾ। ਇਸਦੀ ਫੁੱਲ ਡਰੈੱਸ ਰਿਹਰਸਲ 24 ਸਤੰਬਰ 2025 ਨੂੰ ਹੋਵੇਗੀ। 62 ਸਾਲਾਂ ਤੋਂ ਭਾਰਤੀ ਹਵਾਈ ਸੈਨਾ ਦਾ ਮਾਣ ਰਹੇ ਇਸ ਜਹਾਜ਼ ਨੂੰ ਸ਼ਾਨਦਾਰ ਵਿਦਾਇਗੀ ਦੇਣ ਦੀਆਂ ਤਿਆਰੀਆਂ ਸ਼ੁਰੂ ਹੋ ਗਈਆਂ ਹਨ। 26 ਸਤੰਬਰ ਨੂੰ, ਮਿਗ-21 ਚੰਡੀਗੜ੍ਹ ਤੋਂ ਅਸਮਾਨ ਵਿੱਚ ਆਖਰੀ ਵਾਰ ਉਡਾਣ ਭਰੇਗਾ। ਲਗਭਗ 90 ਮਿੰਟ ਦੇ ਇਸ ਸਮਾਰੋਹ ਵਿੱਚ ਇੱਕ ਵਿਸ਼ੇਸ਼ ਫਲਾਈਪਾਸਟ, ਗਾਰਡ ਆਫ਼ ਆਨਰ ਅਤੇ ਯਾਦਗਾਰੀ ਸਜਾਵਟ ਸ਼ਾਮਲ ਹੋਵੇਗੀ।
ਮਿਗ-21 ਨਾਲ ਜੁੜੇ ਪਾਇਲਟ ਅਤੇ ਚਾਲਕ ਦਲ ਦੇ ਮੈਂਬਰ, ਜਿਨ੍ਹਾਂ ਨੇ ਇਸਦੀ ਸ਼ਾਨਦਾਰ ਸੇਵਾ ਯਾਤਰਾ ਵਿੱਚ ਯੋਗਦਾਨ ਪਾਇਆ ਹੈ, ਨੂੰ ਵੀ ਇਸ ਸਮਾਰੋਹ ਵਿੱਚ ਸੱਦਾ ਦਿੱਤਾ ਜਾਵੇਗਾ। ਮਿਗ-21 ਬਾਈਸਨ ਦੇ ਦੋ ਸਕੁਐਡਰਨ ਜੋ ਇਸ ਸਮੇਂ ਸਰਗਰਮ ਹਨ, ਨੂੰ ਵੀ ਪੜਾਅਵਾਰ ਸੇਵਾਮੁਕਤ ਕੀਤਾ ਜਾਵੇਗਾ। ਮਿਗ-21 ਦੀ ਵਿਦਾਇਗੀ ਦੇ ਇਸ ਵਿਸ਼ੇਸ਼ ਮੌਕੇ ‘ਤੇ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਅਤੇ ਹਵਾਈ ਸੈਨਾ ਮੁਖੀ ਏਅਰ ਚੀਫ ਮਾਰਸ਼ਲ ਏਪੀ ਸਿੰਘ ਵੀ ਮੌਜੂਦ ਰਹਿਣਗੇ। ਉਡਾਣ ਭਰਨ ਤੋਂ ਬਾਅਦ, ਮਿਗ 21 ਦੇ ਸਕੁਐਡਰਨ ਦੀ ਚਾਬੀ ਰੱਖਿਆ ਮੰਤਰੀ ਨੂੰ ਸੌਂਪੀ ਜਾਵੇਗੀ, ਜਿਸ ਤੋਂ ਬਾਅਦ ਇਹ ਜਹਾਜ਼ ਹਮੇਸ਼ਾ ਲਈ ਇਤਿਹਾਸ ਦਾ ਹਿੱਸਾ ਬਣ ਜਾਵੇਗਾ।
