ਮੁੰਬਈ, 28 ਨਵੰਬਰ 2024 – ਸ਼ਤਰੂਘਨ ਸਿਨਹਾ ਹਾਲ ਹੀ ‘ਚ ਆਪਣੀ ਪਤਨੀ ਪੂਨਮ, ਬੇਟੀ ਸੋਨਾਕਸ਼ੀ ਅਤੇ ਜਵਾਈ ਜ਼ਹੀਰ ਇਕਬਾਲ ਨਾਲ ‘ਦਿ ਗ੍ਰੇਟ ਇੰਡੀਅਨ ਕਪਿਲ ਸ਼ੋਅ’ ‘ਚ ਪਹੁੰਚੇ ਸਨ। ਇਸ ਦੌਰਾਨ ਉਨ੍ਹਾਂ ਨੇ ਆਪਣੀ ਨਿੱਜੀ ਜ਼ਿੰਦਗੀ ਬਾਰੇ ਕਈ ਖੁਲਾਸੇ ਕੀਤੇ। ਸ਼ਤਰੂਘਨ ਸਿਨਹਾ ਨੇ ਦੱਸਿਆ ਕਿ ਉਨ੍ਹਾਂ ਦੀ ਸੱਸ ਉਨ੍ਹਾਂ ਨੂੰ ਪਸੰਦ ਨਹੀਂ ਕਰਦੀ ਸੀ ਅਤੇ ਉਨ੍ਹਾਂ ਨੇ ਉਸ ਦੇ ਰਿਸ਼ਤੇ ਨੂੰ ਠੁਕਰਾ ਦਿੱਤਾ ਸੀ।
ਦਰਅਸਲ ਅਰਚਨਾ ਪੂਰਨ ਸਿੰਘ ਨੇ ਪੂਨਮ ਸਿਨਹਾ ਨੂੰ ਪੁੱਛਿਆ ਸੀ ਕਿ ਪਹਿਲਾਂ ਕਿਸ ਨੇ ਪ੍ਰਪੋਜ਼ ਕੀਤਾ ਸੀ, ਉਨ੍ਹਾਂ ਨੇ ਜਾਂ ਸ਼ਤਰੂਘਨ ਨੇ। ਇਸ ‘ਤੇ ਪ੍ਰਤੀਕਿਰਿਆ ਦਿੰਦੇ ਹੋਏ ਸ਼ਤਰੂਘਨ ਨੇ ਕਿਹਾ ਕਿ ਪੂਨਮ ਨੇ ਉਨ੍ਹਾਂ ਨੂੰ ਵਿਆਹ ਲਈ ਪ੍ਰਪੋਜ਼ ਕਰਨ ਲਈ ਕਿਹਾ ਸੀ। ਉਦੋਂ ਪੂਨਮ ਨੇ ਦੱਸਿਆ ਕਿ ਸ਼ਤਰੂਘਨ ਦਾ ਵੱਡਾ ਭਰਾ ਉਸ ਦੇ ਘਰ ਵਿਆਹ ਦੀ ਗੱਲ ਕਰਨ ਆਇਆ ਸੀ। ਪਰ ਉਸ ਦੀ ਮਾਂ ਨੇ ਇਸ ਵਿਆਹ ਨੂੰ ਮਨਜ਼ੂਰੀ ਨਹੀਂ ਦਿੱਤੀ ਅਤੇ ਸਿੱਧੇ ਤੌਰ ‘ਤੇ ਕਿਹਾ ਕਿ ਉਸ ਦੀ ਬੇਟੀ ਫਿਲਮ ਇੰਡਸਟਰੀ ਨਾਲ ਜੁੜੇ ਕਿਸੇ ਨਾਲ ਵਿਆਹ ਨਹੀਂ ਕਰੇਗੀ।
ਇਸ ਦੌਰਾਨ ਸ਼ਤਰੂਘਨ ਸਿਨਹਾ ਨੇ ਖੁਲਾਸਾ ਕੀਤਾ, ‘ਜਦੋਂ ਮੇਰਾ ਭਰਾ ਉਸ (ਪੂਨਮ ਸਿਨਹਾ) ਦੇ ਘਰ ਗਿਆ ਤਾਂ ਮੇਰੀ ਸੱਸ ਨੇ ਉਸ ਨੂੰ ਕਿਹਾ, ਕੀ ਤੁਸੀਂ ਆਪਣੇ ਭਰਾ ਨੂੰ ਦੇਖਿਆ ਹੈ ? ਉਹ ਬਿਹਾਰੀ ਗਲੀ ਦਾ ਗੁੰਡਾ ਹੈ ਤੇ ਸਾਡੀ ਧੀ ਦੁੱਧ ਵਾਂਗ ਚਿੱਟੀ ਗੋਰੀ ਤੇ ਮਿਸ ਇੰਡੀਆ ਹੈ। ਜੇਕਰ ਅਸੀਂ ਦੋਹਾਂ ਨੂੰ ਇਕੱਠੇ ਖੜ੍ਹੇ ਕਰ ਕੇ ਕਲਰ ਫੋਟੋ ਖਿੱਚੀਏ ਤਾਂ ਇਹ ਬਲੈਕ ਐਂਡ ਵ੍ਹਾਈਟ ਦਿਖਾਈ ਦੇਵੇਗੀ।
ਸ਼ਤਰੂਘਨ ਸਿਨਹਾ ਅਤੇ ਪੂਨਮ ਸਿਨਹਾ ਦੀ ਪਹਿਲੀ ਮੁਲਾਕਾਤ ਪਟਨਾ ਤੋਂ ਮੁੰਬਈ ਜਾ ਰਹੀ ਟਰੇਨ ‘ਚ ਹੋਈ ਸੀ। ਦੋਹਾਂ ਨੇ ਕੁਝ ਸਮਾਂ ਇਕ-ਦੂਜੇ ਨੂੰ ਡੇਟ ਕੀਤਾ ਅਤੇ ਫਿਰ 9 ਜੁਲਾਈ 1980 ਨੂੰ ਵਿਆਹ ਕਰ ਲਿਆ ਸੀ।
