- 1 ਇੰਸਪੈਕਟਰ ਲਾਈਨ ਹਾਜ਼ਰ, ਦੋ ਇੰਸਪੈਕਟਰਾਂ ਸਮੇਤ 4 ਮੁਅੱਤਲ
ਬਰੇਲੀ, 3 ਅਕਤੂਬਰ 2024 – ਬਰੇਲੀ ‘ਚ ਬੁੱਧਵਾਰ ਸ਼ਾਮ ਨੂੰ ਇਕ ਪਟਾਕਾ ਫੈਕਟਰੀ ‘ਚ ਧਮਾਕਾ ਹੋਇਆ। ਧਮਾਕੇ ‘ਚ ਫੈਕਟਰੀ ਨੇੜਲੇ 8 ਘਰਾਂ ਨੂੰ ਨੁਕਸਾਨ ਪਹੁੰਚਿਆ ਹੈ। 5 ਮਕਾਨ ਢਹਿ ਗਏ ਹਨ, 3 ਵਿਚ ਤਰੇੜਾਂ ਆ ਗਈਆਂ ਹਨ। 6 ਤੋਂ ਵੱਧ ਲੋਕ ਜ਼ਖਮੀ ਹੋਏ ਹਨ। ਧਮਾਕੇ ਦੀ ਆਵਾਜ਼ ਕਰੀਬ 2 ਕਿਲੋਮੀਟਰ ਦੂਰ ਸੁਣਾਈ ਦਿੱਤੀ। ਜੇਸੀਬੀ ਨਾਲ ਮਲਬਾ ਹਟਾਇਆ ਜਾ ਰਿਹਾ ਹੈ। ਪੁਲਸ ਅਤੇ ਪਿੰਡ ਵਾਸੀਆਂ ਨੇ ਜ਼ਖਮੀਆਂ ਨੂੰ ਹਸਪਤਾਲ ਪਹੁੰਚਾਇਆ।
ਇਹ ਘਟਨਾ ਬਰੇਲੀ ਤੋਂ 85 ਕਿਲੋਮੀਟਰ ਦੂਰ ਸਿਰੌਲੀ ਖੇਤਰ ਦੇ ਕਲਿਆਣਪੁਰ ਪਿੰਡ ਦੀ ਹੈ। ਇੱਥੇ ਇੱਕ ਘਰ ਵਿੱਚ ਕਰੀਬ 100 ਕਿਲੋ ਬਾਰੂਦ ਸੀ ਅਤੇ ਬਿਨਾਂ ਲਾਇਸੈਂਸ ਤੋਂ ਪਟਾਕੇ ਬਣਾਏ ਜਾ ਰਹੇ ਸਨ। ਫਿਰ ਅਚਾਨਕ ਧਮਾਕਾ ਹੋਇਆ। ਪਿੰਡ ਵਾਸੀਆਂ ਨੇ ਤੁਰੰਤ ਬਚਾਅ ਸ਼ੁਰੂ ਕਰ ਦਿੱਤਾ। ਪੁਲਿਸ ਅਧਿਕਾਰੀ ਵੀ ਮੌਕੇ ‘ਤੇ ਪਹੁੰਚ ਗਏ।
ਬਰੇਲੀ ਦੇ ਐਸਐਸਪੀ ਅਨੁਰਾਗ ਆਰੀਆ ਨੇ ਦੱਸਿਆ ਕਿ ਘਰ ਵਿੱਚ ਧਮਾਕਾ ਹੋਣ ਦੇ ਮਾਮਲੇ ਵਿੱਚ ਪੁਲੀਸ ਦੀ ਲਾਪਰਵਾਹੀ ਸਾਹਮਣੇ ਆਈ ਹੈ। ਇਸ ਮਾਮਲੇ ਵਿੱਚ ਸਿਰੌਲੀ ਦੇ ਇੰਸਪੈਕਟਰ ਰਵੀ ਚੌਧਰੀ ਨੂੰ ਲਾਈਨ ਹਾਜ਼ਰ ਕਰ ਦਿੱਤਾ ਗਿਆ ਹੈ। ਹਲਕਾ ਇੰਚਾਰਜ ਨਾਹਰ ਸਿੰਘ, ਟਾਊਨ ਇੰਚਾਰਜ ਦੇਸ਼ਰਾਜ ਸਿੰਘ, ਕਾਂਸਟੇਬਲ ਸੁਰਿੰਦਰ ਕੁਮਾਰ, ਕਾਂਸਟੇਬਲ ਅਜੈ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਸਾਰਿਆਂ ਖਿਲਾਫ ਵਿਭਾਗੀ ਜਾਂਚ ਵੀ ਸ਼ੁਰੂ ਕਰ ਦਿੱਤੀ ਗਈ ਹੈ। ਮੁੱਖ ਮੁਲਜ਼ਮ ਨਾਸਿਰ ਖ਼ਿਲਾਫ਼ ਪਹਿਲਾਂ ਹੀ ਕੇਸ ਦਰਜ ਹਨ।
ਪਿੰਡ ਕਲਿਆਣਪੁਰ ਦੇ ਰਹਿਣ ਵਾਲੇ ਰਹਿਮਾਨ ਸ਼ਾਹ ਦੇ ਰਿਸ਼ਤੇਦਾਰ ਨਾਜ਼ਿਮ ਅਤੇ ਨਾਸਿਰ ਸਿਰੌਲੀ ਦੇ ਬਾਜ਼ਾਰ ਵਿੱਚ ਪਟਾਕਿਆਂ ਦਾ ਕੰਮ ਕਰਦੇ ਹਨ। ਰਹਿਮਾਨ ਸ਼ਾਹ ਵੀ ਗੁਪਤ ਰੂਪ ਵਿਚ ਆਪਣੇ ਘਰ ਆਤਿਸ਼ਬਾਜ਼ੀ ਬਣਾ ਕੇ ਉਨ੍ਹਾਂ ਨੂੰ ਦਿੰਦਾ ਸੀ।
ਲੋਕ ਇੱਥੇ ਆ ਕੇ ਪਟਾਕੇ ਬਣਾਉਣ ਦਾ ਕੰਮ ਕਰਦੇ ਹਨ। ਬੁੱਧਵਾਰ ਸ਼ਾਮ ਕਰੀਬ 3 ਵਜੇ ਅਚਾਨਕ ਜ਼ਬਰਦਸਤ ਧਮਾਕਾ ਹੋਇਆ। ਰਹਿਮਾਨ ਸ਼ਾਹ ਦਾ ਘਰ ਪੂਰੀ ਤਰ੍ਹਾਂ ਢਹਿ ਗਿਆ। ਧਮਾਕੇ ਦੀ ਆਵਾਜ਼ ਨਾਲ ਪੂਰਾ ਪਿੰਡ ਹਿੱਲ ਗਿਆ। ਧਮਾਕਾ ਇੰਨਾ ਜ਼ਬਰਦਸਤ ਸੀ ਕਿ ਆਸਪਾਸ ਰਹਿਣ ਵਾਲੇ ਰੁਖਸਾਰ, ਇਸਰਾਰ ਖਾਨ, ਬਾਬੂ ਸ਼ਾਹ ਅਤੇ ਪੀਰ ਸ਼ਾਹ ਦੇ ਘਰ ਵੀ ਪੂਰੀ ਤਰ੍ਹਾਂ ਢਹਿ ਢੇਰੀ ਹੋ ਗਏ। ਸਾਰਿਆਂ ਦੇ ਘਰ ਮਲਬੇ ਵਿੱਚ ਬਦਲ ਗਏ।
ਰਹਿਮਾਨ ਸ਼ਾਹ ਦੇ ਘਰ ਪਟਾਕਿਆਂ ਦਾ ਵੱਡਾ ਭੰਡਾਰ ਸੀ। ਇਕ ਤੋਂ ਬਾਅਦ ਇਕ ਧਮਾਕੇ ਤੋਂ ਬਾਅਦ ਵੀ ਧਮਾਕੇ ਰੁਕ-ਰੁਕ ਕੇ ਹੁੰਦੇ ਰਹੇ। ਇਹ ਸਿਲਸਿਲਾ ਡੇਢ ਘੰਟੇ ਯਾਨੀ ਕਰੀਬ 5 ਵਜੇ ਤੱਕ ਜਾਰੀ ਰਿਹਾ। ਬਚਾਅ ਲਈ ਆਏ ਲੋਕਾਂ ਨੂੰ ਵੀ ਡਰ ਸੀ ਕਿ ਕੋਈ ਹੋਰ ਧਮਾਕਾ ਹੋ ਸਕਦਾ ਹੈ। ਇਸ ਲਈ ਪਹਿਲਾਂ ਫਾਇਰ ਬ੍ਰਿਗੇਡ ਨੇ ਮਲਬੇ ‘ਤੇ ਪਾਣੀ ਪਾਇਆ। ਇਸ ਤੋਂ ਬਾਅਦ ਮਲਬੇ ਨੂੰ ਹਟਾਇਆ ਜਾ ਸਕਿਆ।
ਮਲਬਾ ਹਟਾਉਣ ਲਈ ਜੇਸੀਬੀ ਬੁਲਾਈ ਗਈ। ਪਰ ਇਹ ਪਿੰਡ ਦੀਆਂ ਤੰਗ ਗਲੀਆਂ ਵਿੱਚ ਫਸ ਗਈ। ਫਿਰ ਹੋਰ ਰਸਤਿਆਂ ਰਾਹੀਂ ਜੇਸੀਬੀ ਮੰਗਵਾਈ ਗਈ। ਇਸ ਤੋਂ ਬਾਅਦ ਜੇਸੀਬੀ ਦੀ ਮਦਦ ਨਾਲ ਮਲਬੇ ਨੂੰ ਹਟਾਇਆ ਜਾ ਸਕਿਆ।
