ਨਵੀਂ ਦਿੱਲੀ, 15 ਫਰਵਰੀ 2023 – ਮਹਿਰੌਲੀ ਇਲਾਕੇ ‘ਚ ਸ਼ਰਧਾ ਦੇ ਕਤਲ ਨੂੰ ਲੋਕ ਅਜੇ ਭੁੱਲ ਨਹੀਂ ਸਕੇ ਸਨ ਕਿ ਅਜਿਹੀ ਹੀ ਇਕ ਹੋਰ ਘਟਨਾ ਸਾਹਮਣੇ ਆਈ ਹੈ। ਨੌਜਵਾਨ ਨੇ ਆਪਣੇ ਲਿਵ-ਇਨ ਪਾਰਟਨਰ ਨਿੱਕੀ ਯਾਦਵ ਕਰ ਦਿੱਤਾ ਅਤੇ ਲਾਸ਼ ਨੂੰ ਫਰਿੱਜ ‘ਚ ਲੁਕਾ ਦਿੱਤਾ। ਮ੍ਰਿਤਕ ਮੁਲਜ਼ਮ ‘ਤੇ ਵਿਆਹ ਲਈ ਦਬਾਅ ਪਾ ਰਹੀ ਸੀ। ਜਦੋਂ ਕਿ ਮੁਲਜ਼ਮ ਦੀ ਸਗਾਈ ਕਿਤੇ ਹੋਰ ਹੋ ਗਈ ਸੀ।
ਸਾਹਿਲ ਗਹਿਲੋਤ ਨੇ ਪੁੱਛਗਿੱਛ ਦੌਰਾਨ ਪੁਲਿਸ ਨੂੰ ਦੱਸਿਆ ਕਿ ਉਸ ਦਾ ਵਿਆਹ ਤੈਅ ਹੋਣ ਦਾ ਪਤਾ ਲੱਗਣ ‘ਤੇ ਨਿੱਕੀ ਨੇ ਉਸ ਨੂੰ ਕਿਹਾ ਸੀ ਕਿ ਅਸੀਂ ਦੋਵੇਂ ਇਕੱਠੇ ਨਹੀਂ ਰਹਿ ਸਕਦੇ ਪਰ ਇਕੱਠੇ ਜਾਨ ਦੇ ਸਕਦੇ ਹਾਂ। 9 ਫਰਵਰੀ ਦੀ ਰਾਤ ਨੂੰ ਇਸ ਗੱਲ ਨੂੰ ਲੈ ਕੇ ਦੋਵਾਂ ਵਿਚਾਲੇ ਲੰਬੀ ਬਹਿਸ ਹੋਈ।
ਨਿੱਕੀ ਨੇ ਕਿਹਾ ਕਿ ਸੀ ਕਿ ਉਸ ਕੋਲ ਤਿੰਨ ਰਸਤੇ ਹਨ। ਮੇਰੇ ਨਾਲ ਵਿਆਹ ਕਰਾਓ, ਪਰਿਵਾਰ ਵੱਲੋਂ ਤੈਅ ਕੀਤਾ ਰਿਸ਼ਤਾ ਤੋੜ ਦਿਓ ਜਾਂ ਅਸੀਂ ਦੋਵੇਂ ਇਕੱਠੇ ਮਰ ਜਾਵਾਂਗੇ। ਸਾਹਿਲ ਨੇ ਕਿਹਾ ਕਿ ਉਹ ਇਨ੍ਹਾਂ ਤਿੰਨਾਂ ‘ਚੋਂ ਕੋਈ ਵੀ ਨਹੀਂ ਕਰ ਸਕਦਾ। ਇਸ ਨੂੰ ਲੈ ਕੇ ਦੋਵਾਂ ਵਿਚਾਲੇ ਗਰਮਾ-ਗਰਮ ਬਹਿਸ ਹੋਈ। ਇਸ ਦੌਰਾਨ ਸਾਹਿਲ ਨੇ ਮੋਬਾਈਲ ਡਾਟਾ ਕੇਬਲ ਨਾਲ ਨਿੱਕੀ ਦਾ ਗਲਾ ਘੁੱਟ ਕੇ ਕਤਲ ਕਰ ਦਿੱਤਾ।
ਇਸ ਤੋਂ ਪਹਿਲਾਂ ਸਾਹਿਲ ਦੇ ਪਰਿਵਾਰ ਵਾਲਿਆਂ ਨੇ ਉਸ ‘ਤੇ ਵਿਆਹ ਲਈ ਦਬਾਅ ਬਣਾਉਣਾ ਸ਼ੁਰੂ ਕਰ ਦਿੱਤਾ। ਅਖੀਰ ਸਾਹਿਲ ਮੰਨ ਗਿਆ। ਸਾਹਿਲ ਦਾ ਰਿਸ਼ਤਾ ਦਸੰਬਰ 2022 ‘ਚ ਤੈਅ ਹੋਇਆ ਸੀ, ਮੰਗਣੀ ਦੀ ਤਰੀਕ 9 ਫਰਵਰੀ ਅਤੇ ਵਿਆਹ ਦੀ ਤਰੀਕ 10 ਫਰਵਰੀ ਤੈਅ ਕੀਤੀ ਗਈ ਸੀ।
ਹੁਣ ਤੱਕ ਨਿੱਕੀ ਸਾਹਿਲ ਦੇ ਵਿਆਹ ਤੋਂ ਅਣਜਾਣ ਸੀ। ਇਸ ਗੱਲ ਨੂੰ ਲੈ ਕੇ ਨਿੱਕੀ ਅਤੇ ਸਾਹਿਲ ਵਿਚਕਾਰ ਲੜਾਈ ਹੋ ਗਈ। ਦੋਹਾਂ ਨੇ ਵਿਆਹ ਤੋਂ ਪਹਿਲਾਂ ਗੋਆ ਭੱਜਣ ਦੀ ਯੋਜਨਾ ਵੀ ਬਣਾਈ। ਨਿੱਕੀ ਨੇ 9 ਫਰਵਰੀ ਲਈ ਟਿਕਟਾਂ ਵੀ ਬੁੱਕ ਕਰਵਾਈਆਂ ਸਨ। ਦੋਵਾਂ ਨੇ ਮਿਲ ਕੇ ਖੁਦਕੁਸ਼ੀ ਕਰਨ ਦੀ ਯੋਜਨਾ ਵੀ ਬਣਾਈ ਸੀ। ਪਰ ਸਾਹਿਲ ਨੇ ਆਖਰੀ ਸਮੇਂ ਗੋਆ ਜਾਣ ਤੋਂ ਇਨਕਾਰ ਕਰ ਦਿੱਤਾ। ਸੂਤਰਾਂ ਦਾ ਦਾਅਵਾ ਹੈ ਕਿ ਨਿੱਕੀ ਨੇ ਸਾਹਿਲ ‘ਤੇ ਕੇਸ ਦਰਜ ਕਰਨ ਦੀ ਧਮਕੀ ਵੀ ਦਿੱਤੀ ਸੀ। ਸਾਹਿਲ ਦੀ ਮੰਗਣੀ 9 ਫਰਵਰੀ ਨੂੰ ਹੋਈ ਸੀ। ਇਸ ਤੋਂ ਬਾਅਦ ਨਿੱਕੀ ਨੇ ਉਸ ਨੂੰ ਆਪਣੇ ਫਲੈਟ ‘ਤੇ ਮਿਲਣ ਲਈ ਬੁਲਾਇਆ। ਉਹ ਪਿਛਲੇ ਕੁਝ ਸਮੇਂ ਤੋਂ ਇਕੱਲੀ ਰਹਿ ਰਹੀ ਸੀ ਅਤੇ ਸਾਹਿਲ ਦਾ ਉੱਥੇ ਆਉਣਾ-ਜਾਣਾ ਰਹਿੰਦਾ ਸੀ। ਮੰਗਣੀ ਵਾਲੇ ਦਿਨ ਯਾਨੀ 9 ਫਰਵਰੀ ਦੀ ਸ਼ਾਮ ਨੂੰ ਸਾਹਿਲ ਨਿੱਕੀ ਨੂੰ ਕਾਰ ਰਾਹੀਂ ਲੈ ਕੇ ਕਸ਼ਮੀਰੀ ਗੇਟ ਪਹੁੰਚ ਗਿਆ।
ਸਾਹਿਲ ਨੇ ਕਾਰ ਵਿੱਚ ਹੀ ਮੋਬਾਈਲ ਫੋਨ ਦੀ ਡਾਟਾ ਕੇਬਲ ਨਾਲ ਗਲਾ ਘੁੱਟ ਕੇ ਨਿੱਕੀ ਦਾ ਕਤਲ ਕਰ ਦਿੱਤਾ। ਸਾਹਿਲ ਮ੍ਰਿਤਕ ਦੇਹ ਲੈ ਕੇ ਪਿੰਡ ਮਿਤਰਾਉਂ ਪਹੁੰਚ ਗਿਆ। ਉਸ ਦਾ ਢਾਬਾ ਮਿਤਰਾਉਂ ਅਤੇ ਕੇਰ ਪਿੰਡਾਂ ਦੇ ਵਿਚਕਾਰ ਇੱਕ ਸੁੰਨਸਾਨ ਖੇਤਰ ਵਿੱਚ ਇੱਕ ਖਾਲੀ ਪਲਾਟ ਉੱਤੇ ਹੈ। ਉਸ ਨੇ ਢਾਬੇ ਵਿੱਚ ਰੱਖੇ ਫਰਿੱਜ ਨੂੰ ਖਾਲੀ ਕਰਕੇ ਉਸ ਵਿੱਚ ਨਿੱਕੀ ਦੀ ਲਾਸ਼ ਛੁਪਾ ਦਿੱਤੀ। ਉਸ ਨੇ ਢਾਬੇ ਨੂੰ ਬਾਹਰੋਂ ਤਾਲਾ ਲਾ ਕੇ ਚਾਬੀ ਆਪਣੇ ਕੋਲ ਰੱਖ ਲਈ। ਉਥੋਂ ਉਹ ਆਪਣੇ ਘਰ ਚਲਾ ਗਿਆ ਅਤੇ 10 ਫਰਵਰੀ ਨੂੰ ਵਿਆਹ ਕਰਵਾ ਲਿਆ।
