- ਤੇਜ਼ ਰਫਤਾਰ ਕਾਰ ਬੇਕਾਬੂ ਹੋ ਫੁੱਟਪਾਥ ‘ਤੇ ਚੜ੍ਹ ਗਈ ਸੀ,
- ਘਟਨਾ ਕਰਨਾਟਕ ਦੇ ਮੰਗਲੁਰੂ ਦੀ
ਕਰਨਾਟਕ, 19 ਅਕਤੂਬਰ 2023 – ਕਰਨਾਟਕ ਦੇ ਮੰਗਲੁਰੂ ‘ਚ ਇਕ ਕਾਰ ਸਵਾਰ ਨੇ ਫੁੱਟਪਾਥ ‘ਤੇ ਪੈਦਲ ਜਾ ਰਹੇ 5 ਲੋਕਾਂ ਨੂੰ ਟੱਕਰ ਮਾਰ ਦਿੱਤੀ। ਘਟਨਾ ਬੁੱਧਵਾਰ ਸ਼ਾਮ 4 ਵਜੇ ਦੀ ਹੈ। ਇਸ ਹਾਦਸੇ ‘ਚ ਇਕ ਔਰਤ ਦੀ ਮੌਤ ਹੋ ਗਈ ਅਤੇ ਚਾਰ ਲੋਕ ਗੰਭੀਰ ਜ਼ਖਮੀ ਹੋ ਗਏ ਹਨ।
ਪੁਲਸ ਨੇ ਦੱਸਿਆ ਕਿ ਕਾਰ ਨੂੰ ਕਮਲੇਸ਼ ਬਲਦੇਵ ਨਾਂ ਦਾ ਵਿਅਕਤੀ ਚਲਾ ਰਿਹਾ ਸੀ। ਉਸ ਖ਼ਿਲਾਫ਼ ਅਣਗਹਿਲੀ ਕਾਰਨ ਮੌਤ ਦਾ ਕੇਸ ਦਰਜ ਕੀਤਾ ਗਿਆ ਹੈ।
ਹਾਦਸੇ ਦੀ ਵੀਡੀਓ ਨੇੜੇ ਲੱਗੇ ਸੀਸੀਟੀਵੀ ਵਿੱਚ ਰਿਕਾਰਡ ਹੋ ਗਈ। ਵੀਡੀਓ ‘ਚ ਦੇਖਿਆ ਜਾ ਸਕਦਾ ਹੈ ਕਿ ਮੰਨਾਗੁੜਾ ਜੰਕਸ਼ਨ ਨੇੜੇ ਫੁੱਟਪਾਥ ‘ਤੇ ਕਈ ਲੋਕ ਪੈਦਲ ਚੱਲ ਰਹੇ ਹਨ। ਉਦੋਂ ਇੱਕ ਚਿੱਟੇ ਰੰਗ ਦੀ ਤੇਜ਼ ਰਫ਼ਤਾਰ ਕਾਰ ਨੇ ਆ ਕੇ ਲੋਕਾਂ ਨੂੰ ਕੁਚਲ ਦਿੱਤਾ।
ਕਾਰ ਨੇ ਪਹਿਲਾਂ ਤਿੰਨ-ਚਾਰ ਔਰਤਾਂ ਨੂੰ ਟੱਕਰ ਮਾਰੀ। ਟੱਕਰ ਐਨੀ ਜ਼ਬਰਦਸਤ ਸੀ ਕਿ ਔਰਤਾਂ ਕਈ-ਕਈ ਫੁੱਟ ਹਵਾ ਵਿਚ ਉਛਲ ਗਈਆਂ। ਇਸ ਤੋਂ ਬਾਅਦ ਕਾਰ ਅੱਗੇ ਵਧਦੀ ਹੈ ਅਤੇ ਦੋ ਹੋਰ ਲੋਕਾਂ ਨੂੰ ਕੁਚਲ ਦਿੰਦੀ ਹੈ।
ਇਸ ਤੋਂ ਬਾਅਦ ਕਾਰ ਸੜਕ ਕਿਨਾਰੇ ਲੱਗੇ ਖੰਭੇ ਨਾਲ ਟਕਰਾ ਕੇ ਦਿਸ਼ਾ ਬਦਲਦੀ ਹੈ। ਡਰਾਈਵਰ ਕਾਰ ਨੂੰ ਸੜਕ ‘ਤੇ ਲਿਆਉਂਦਾ ਹੈ ਜਿੱਥੇ ਉਹ ਦੁਬਾਰਾ ਇੱਕ ਵਿਅਕਤੀ ਨੂੰ ਟੱਕਰ ਮਾਰ ਕੇ ਭੱਜ ਜਾਂਦਾ ਹੈ।
ਮ੍ਰਿਤਕ ਔਰਤ ਦੀ ਪਛਾਣ 23 ਸਾਲਾ ਰੂਪਸ਼੍ਰੀ ਵਜੋਂ ਹੋਈ ਹੈ। ਚਾਰ ਜ਼ਖ਼ਮੀਆਂ ਵਿੱਚੋਂ ਤਿੰਨ ਨਾਬਾਲਗ ਹਨ। ਪੁਲੀਸ ਅਨੁਸਾਰ ਹਾਦਸੇ ਵਾਲੀ ਥਾਂ ਤੋਂ ਭੱਜਣ ਤੋਂ ਬਾਅਦ ਕਮਲੇਸ਼ ਬਲਦੇਵ ਆਪਣੀ ਕਾਰ ਕਾਰ ਦੇ ਸ਼ੋਅਰੂਮ ਦੇ ਸਾਹਮਣੇ ਖੜ੍ਹੀ ਕਰਕੇ ਆਪਣੇ ਘਰ ਚਲਾ ਗਿਆ।
