ਇੰਫਾਲ, 2 ਜੁਲਾਈ 2023 – ਮਣੀਪੁਰ ‘ਚ ਹਿੰਸਾ ਰੁਕਣ ਦਾ ਨਾਂ ਨਹੀਂ ਲੈ ਰਹੀ ਹੈ। ਇਸ ਦੌਰਾਨ ਸ਼ਨੀਵਾਰ ਦੇਰ ਰਾਤ ਬਿਸ਼ਨੂਪੁਰ ਜ਼ਿਲੇ ‘ਚ ਗੋਲੀਬਾਰੀ ‘ਚ ਇਕ ਵਾਰ ਫਿਰ ਤਿੰਨ ਮੈਤੇਈ ਵਲੰਟੀਅਰ ਮਾਰੇ ਗਏ। ਇਹ ਘਟਨਾ ਬਿਸ਼ਨੂਪੁਰ ਜ਼ਿਲੇ ਦੇ ਖੁੰਬੀ ਪੁਲਸ ਸਟੇਸ਼ਨ ਦੇ ਅਧੀਨ ਲਿੰਗੰਗਤਾਬੀ ਪੁਲਸ ਆਊਟ ਪੋਸਟ ਦੇ ਕੋਲ ਸਥਿਤ ਲਿੰਗੰਗਤਾਬੀ ਰਿਹਾਇਸ਼ੀ ਸਕੂਲ ‘ਚ ਵਾਪਰੀ।
ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਮੁਤਾਬਕ ਸ਼ਨੀਵਾਰ ਰਾਤ ਕਰੀਬ 12.30 ਵਜੇ ਉੱਤਰ-ਪੱਛਮੀ ਦਿਸ਼ਾ ਤੋਂ ਗੋਲੀਬਾਰੀ ਦੀ ਆਵਾਜ਼ ਸੁਣਾਈ ਦਿੱਤੀ। ਇਸ ਤੋਂ ਬਾਅਦ ਕਰੀਬ 02:20 ਵਜੇ, ਅਣਪਛਾਤੇ ਹਥਿਆਰਬੰਦ ਬਦਮਾਸ਼ਾਂ, ਡੰਪੀ ਹਿੱਲ ਇਲਾਕੇ ਦੇ ਸ਼ੱਕੀ ਕੁਕੀ ਵਿਦਰੋਹੀਆਂ ਨੇ ਉੱਥੇ ਤਾਇਨਾਤ ਵੀਡੀਐਫ/ਪੁਲਿਸ ਕਮਾਂਡੋਜ਼ ਵੱਲ ਗੋਲੀਬਾਰੀ ਸ਼ੁਰੂ ਕਰ ਦਿੱਤੀ। VDF/ਪੁਲਿਸ ਕਮਾਂਡੋਜ਼ ਨੇ ਇਸ ਦਾ ਜਵਾਬ ਦਿੱਤਾ। VDF/ਪੁਲਿਸ ਕਮਾਂਡੋ ਅਤੇ ਸ਼ੱਕੀ ਕੂਕੀ ਬਦਮਾਸ਼ਾਂ ਵਿਚਕਾਰ ਰਾਤ ਭਰ ਰੁਕ-ਰੁਕ ਕੇ ਗੋਲੀਬਾਰੀ ਹੁੰਦੀ ਰਹੀ।
ਇਸ ਸਮੇਂ ਦੌਰਾਨ ਮੈਤੇਈ ਵਲੰਟੀਅਰ ਜੋ ਕਿ ਖੋਇਨੁਮੰਤਬੀ ਚਿੰਗਥਕ ਵਿਖੇ ਬੰਕਰ ਵਿੱਚ ਪੋਜੀਸ਼ਨ ਲੈ ਰਹੇ ਸਨ, ਕਥਿਤ ਤੌਰ ‘ਤੇ ਕੁਕੀ ਬਦਮਾਸ਼ਾਂ ਦੀ ਗੋਲੀ ਦੀ ਮਾਰ ਹੇਠ ਆ ਗਏ।ਗੋਲੀਬਾਰੀ ਦੀ ਘਟਨਾ ਤੋਂ ਬਾਅਦ ਖੋਈਜੁਮੰਤਬੀ ਚਿੰਗਥਕ ਬੰਕਰ ਵਿੱਚ ਤਿੰਨ ਮੈਤੇਈ ਵਲੰਟੀਅਰ ਮਰੇ ਹੋਏ ਪਾਏ ਗਏ। ਸੂਤਰਾਂ ਮੁਤਾਬਕ ਫਿਲਹਾਲ ਸਥਿਤੀ ਪੂਰੀ ਤਰ੍ਹਾਂ ਕਾਬੂ ਹੇਠ ਹੈ। ਫੌਜ, ਪੁਲਿਸ ਅਤੇ ਸੁਰੱਖਿਆ ਬਲਾਂ ਨੇ ਤਲਾਸ਼ੀ ਮੁਹਿੰਮ ਸ਼ੁਰੂ ਕਰ ਦਿੱਤੀ ਹੈ।
