- ਚੰਦਰਭਾਨ ਡਰੇਨ ‘ਚੋਂ ਮਿਲੀ ਸੀ ਲਾਸ਼
ਮੁਕਤਸਰ, 11 ਜੂਨ 2023 – ਜ਼ਿਲ੍ਹਾ ਮੁਕਤਸਰ ਦੀ ਮੰਡੀ ਲੱਖੇਵਾਲੀ ਵਿੱਚ ਇੱਕ ਨੌਜਵਾਨ ਦਾ ਕਤਲ ਕਰਕੇ ਲਾਸ਼ ਨੂੰ ਖੁਰਦ ਬੁਰਦ ਕਰਨ ਲਈ ਨਾਲੇ ਵਿੱਚ ਸੁੱਟ ਦਿੱਤਾ ਗਿਆ ਸੀ। ਥਾਣਾ ਲੱਖੇਵਾਲੀ ਦੀ ਪੁਲੀਸ ਨੇ ਇਸ ਮਾਮਲੇ ਵਿੱਚ 4 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕਰਕੇ ਉਨ੍ਹਾਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ। ਮ੍ਰਿਤਕ ਦੀ ਪਛਾਣ ਗੁਰਪਿੰਦਰ ਸਿੰਘ (25) ਪੁੱਤਰ ਸਰਬਜੀਤ ਸਿੰਘ ਵਾਸੀ ਪਿੰਡ ਬਾਗਸਰ ਵਜੋਂ ਹੋਈ ਹੈ।
ਮੁਲਜ਼ਮਾਂ ਦੀ ਪਛਾਣ ਕਾਲਾ ਸਿੰਘ ਪੁੱਤਰ ਹਰਜਿੰਦਰ ਸਿੰਘ, ਵਰਿੰਦਰ ਸਿੰਘ ਪੁੱਤਰ ਮਹਿੰਦਰ ਸਿੰਘ, ਜਾਨੀ ਸਿੰਘ ਉਰਫ ਦੇਵਾ ਪੁੱਤਰ ਦਰਸ਼ਨ, ਰਵਿੰਦਰ ਸਿੰਘ ਉਰਫ ਕਾਲੂ ਪੁੱਤਰ ਇਕਬਾਲ ਸਿੰਘ ਵਾਸੀ ਭਾਗਸਰ ਵਜੋਂ ਹੋਈ ਹੈ। ਉਨ੍ਹਾਂ ਖ਼ਿਲਾਫ਼ ਆਈਪੀਸੀ ਦੀ ਧਾਰਾ 302, 201, 34 ਤਹਿਤ ਕੇਸ ਦਰਜ ਕੀਤਾ ਗਿਆ ਹੈ। ਉਨ੍ਹਾਂ ਨੇ ਮੋਬਾਈਲ ਫੋਨ ਲਈ ਗੁਰਪਿੰਦਰ ਦਾ ਕਤਲ ਕਰ ਦਿੱਤਾ ਸੀ। 3 ਦਿਨਾਂ ਬਾਅਦ 10 ਜੂਨ ਨੂੰ ਚੰਦਰਭਾਨ ਡਰੇਨ ‘ਚੋਂ ਨੌਜਵਾਨ ਦੀ ਲਾਸ਼ ਮਿਲੀ ਸੀ।
ਪੁਲੀਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਮ੍ਰਿਤਕ ਗੁਰਪਿੰਦਰ ਸਿੰਘ ਦੇ ਪਿਤਾ ਸਰਬਜੀਤ ਸਿੰਘ ਨੇ ਦੱਸਿਆ ਕਿ ਗੁਰਪਿੰਦਰ ਸਿੰਘ ਵਿਆਹਿਆ ਹੋਇਆ ਸੀ। ਉਹ ਲੁਕ-ਛਿਪ ਕੇ ਸ਼ਰਾਬ ਵੇਚਦਾ ਸੀ। 8 ਜੂਨ ਨੂੰ ਸ਼ਾਮ 7.30 ਵਜੇ ਕਾਲਾ ਬਾਈਕ ‘ਤੇ ਘਰ ਆਇਆ ਅਤੇ ਗੁਰਪਿੰਦਰ ਸਿੰਘ ਨੂੰ ਆਪਣੇ ਨਾਲ ਲੈ ਗਿਆ, ਇਸ ਤੋਂ ਬਾਅਦ ਗੁਰਪਿੰਦਰ ਘਰ ਨਹੀਂ ਪਰਤਿਆ ਅਤੇ 3 ਦਿਨ ਬਾਅਦ ਉਸ ਦੀ ਲਾਸ਼ ਗਲੀ ‘ਚ ਸੜੀ ਹਾਲਤ ‘ਚ ਮਿਲੀ।
ਜਾਂਚ ਕਰਨ ‘ਤੇ ਪਤਾ ਲੱਗਾ ਕਿ ਗੁਰਪਿੰਦਰ ਸਿੰਘ ਅਤੇ ਵਰਿੰਦਰ ਸਿੰਘ ਨੇ ਮਿਲ ਕੇ ਵਰਿੰਦਰ ਸਿੰਘ ਦਾ ਮੋਬਾਈਲ 4000 ਰੁਪਏ ‘ਚ ਕਿਸੇ ਕੋਲ ਗਿਰਵੀ ਰੱਖਿਆ ਸੀ, ਜਿਸ ਦੇ ਪੈਸੇ ਇਨ੍ਹਾਂ ਦੋਵਾਂ ਨੇ ਵਰਤ ਲਏ। ਹੁਣ ਵਰਿੰਦਰ ਗੁਰਪਿੰਦਰ ‘ਤੇ ਆਪਣਾ ਮੋਬਾਈਲ ਵਾਪਸ ਲੈਣ ਲਈ ਦਬਾਅ ਪਾ ਰਿਹਾ ਸੀ। ਵਰਿੰਦਰ ਸਿੰਘ, ਜਾਨੀ ਸਿੰਘ, ਰਵਿੰਦਰ ਸਿੰਘ ਉਰਫ਼ ਕਾਲੂ ਨੇ ਗੁਰਪਿੰਦਰ ਨੂੰ ਧਮਕੀਆਂ ਦੇਣੀਆਂ ਸ਼ੁਰੂ ਕਰ ਦਿੱਤੀਆਂ ਕਿ ਜੇਕਰ ਉਸ ਦਾ ਮੋਬਾਈਲ ਵਾਪਸ ਨਾ ਕੀਤਾ ਤਾਂ ਚੰਗਾ ਨਹੀਂ ਹੋਵੇਗਾ।
ਸ਼ਿਕਾਇਤਕਰਤਾ ਨੇ ਦੱਸਿਆ ਕਿ 10 ਜੂਨ ਨੂੰ ਗੁਰਪਿੰਦਰ ਸਿੰਘ ਦੀ ਭਾਲ ਕਰਦੇ ਹੋਏ ਉਹ ਪਿੰਡ ਭਾਗਸਰ ਤੋਂ ਪਿੰਡ ਚੱਕ ਮਦਰੱਸੇ ਨੂੰ ਜਾਂਦੇ ਚੰਦਰਭਾਨ ਡਰੇਨ ਕੋਲ ਪਹੁੰਚਿਆ ਤਾਂ ਉੱਥੇ ਇੱਕ ਲਾਸ਼ ਪਈ ਦੇਖੀ। ਨੇੜੇ ਜਾ ਕੇ ਦੇਖਿਆ ਤਾਂ ਲਾਸ਼ ਗੁਰਪਿੰਦਰ ਸਿੰਘ ਦੀ ਸੀ। ਗੁਰਪਿੰਦਰ ਸਿੰਘ ਦੇ ਕੰਨ ਉਪਰ ਤੇਜ਼ਧਾਰ ਹਥਿਆਰ ਨਾਲ ਸੱਟ ਲੱਗੀ ਸੀ। ਛਾਤੀ ਅਤੇ ਸਰੀਰ ਦੇ ਹੋਰ ਹਿੱਸਿਆਂ ‘ਤੇ ਵੀ ਸੱਟਾਂ ਦੇ ਨਿਸ਼ਾਨ ਸਨ।
