ਅੰਮ੍ਰਿਤਸਰ, 22 ਅਗਸਤ 2022 – ਪੰਜਾਬ ਦੇ ਅੰਮ੍ਰਿਤਸਰ ਜ਼ਿਲ੍ਹੇ ਵਿੱਚ ਦਿਵਿਆਂਗ ਦੇ ਕਤਲ ਦਾ ਭੇਤ ਪੁਲਿਸ ਨੇ 12 ਘੰਟਿਆਂ ਵਿੱਚ ਸੁਲਝਾ ਲਿਆ ਹੈ। ਕਤਲ ਪੈਸਿਆਂ ਲਈ ਨਹੀਂ ਸਗੋਂ ਪ੍ਰੇਮ ਸਬੰਧਾਂ ਕਾਰਨ ਕੀਤਾ ਗਿਆ ਸੀ। ਪੁਲੀਸ ਨੇ ਕਾਰਵਾਈ ਕਰਦਿਆਂ ਮ੍ਰਿਤਕ ਦੇ ਭਤੀਜੇ ਦੀ ਪਤਨੀ ਸੋਨੀਆ ਅਤੇ ਉਸ ਦੇ ਪ੍ਰੇਮੀ ਰਾਜਨਦੀਪ ਸਿੰਘ ਵਾਸੀ ਮਕਬੂਲਪੁਰਾ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਅੰਮ੍ਰਿਤਸਰ ਦੇ ਮੂਲਚੱਕ ‘ਚੋਂ 50 ਸਾਲਾ ਅਪਾਹਜ ਨਰਿੰਦਰ ਸਿੰਘ ਉਰਫ਼ ਨਿੰਦ ਦੀ ਲਾਸ਼ ਮਿਲੀ ਸੀ। ਇਲਾਕੇ ਦੇ ਸਬਜ਼ੀ ਵਿਕਰੇਤਾ ਨੇ ਨਰਿੰਦਰ ਦੀ ਲਾਸ਼ ਦੇਖੀ। ਨਰਿੰਦਰ ਦਾ ਸਰੀਰ ਨੀਲਾ ਪੈ ਗਿਆ ਸੀ। ਮ੍ਰਿਤਕ ਦੇ ਨਾਲ ਉਸ ਦਾ ਭਤੀਜਾ, ਪਤਨੀ ਸੁਰਿੰਦਰ ਕੌਰ ਉਰਫ ਸੋਨੀਆ ਅਤੇ ਬੱਚੇ ਵੀ ਰਹਿੰਦੇ ਸਨ। ਜਦੋਂ ਪੁਲਿਸ ਨੇ ਸੋਨੀਆ ਦੇ ਬਿਆਨ ਲਏ ਤਾਂ ਉਨ੍ਹਾਂ ਨੂੰ ਇਸ ਵਿੱਚ ਬਹੁਤ ਅਜੀਬ ਲੱਗਿਆ, ਜਿਸ ਤੋਂ ਬਾਅਦ ਪੁਲਿਸ ਨੇ ਸੋਨੀਆ ਤੋਂ ਸਖ਼ਤੀ ਨਾਲ ਪੁੱਛਗਿੱਛ ਕੀਤੀ ਤਾਂ ਉਸ ਦੇ ਕਿਸੇ ਦੂਰ ਦੇ ਰਿਸ਼ਤੇਦਾਰ ਨਾਲ ਪ੍ਰੇਮ ਸਬੰਧ ਸਾਹਮਣੇ ਆਏ।
ਮ੍ਰਿਤਕ ਨਰਿੰਦਰ ਅਪਾਹਜ ਹੋਣ ਕਾਰਨ ਘਰ ਵਿੱਚ ਹੀ ਰਹਿੰਦਾ ਸੀ। ਨਰਿੰਦਰ ਦੀ ਕਰਿਆਨੇ ਦੀ ਦੁਕਾਨ ਵੀ ਘਰ ਦੇ ਬਾਹਰ ਸੀ। ਉਹ ਵਾਰ-ਵਾਰ ਮੁਲਜ਼ਮ ਸੋਨੀਆ ਅਤੇ ਰਾਜਨਦੀਪ ਵਾਸੀ ਮਕਬੂਲਪੁਰਾ ਦੀ ਮੁਲਾਕਾਤ ਵਿੱਚ ਰੁਕਾਵਟ ਪਾ ਰਿਹਾ ਸੀ। ਇਸ ਲਈ ਦੋਵਾਂ ਨੇ ਮਿਲ ਕੇ ਉਸ ਨੂੰ ਵਿਚਕਾਰੋਂ ਹਟਾਉਣ ਲਈ ਹੀ ਉਸ ਨੂੰ ਮਾਰਨ ਦੀ ਯੋਜਨਾ ਬਣਾਈ।
ਮੁਲਜ਼ਮ ਸੋਨੀਆ ਨੂੰ ਪਤਾ ਸੀ ਕਿ ਨਰਿੰਦਰ ਦੀ 58 ਹਜ਼ਾਰ ਰੁਪਏ ਦੀ ਕਮੇਟੀ ਸਾਹਮਣੇ ਆਈ ਹੈ। ਕਤਲ ਤੋਂ ਬਾਅਦ ਸੋਨੀਆ ਅਤੇ ਰਾਜਨਦੀਪ ਦੋਵਾਂ ਨੇ ਪੈਸੇ ਵੰਡ ਲਏ। ਪੁਲੀਸ ਨੇ ਰਾਜਨਦੀਪ ਕੋਲੋਂ 28 ਹਜ਼ਾਰ ਅਤੇ ਸੋਨੀਆ ਕੋਲੋਂ 30 ਹਜ਼ਾਰ ਰੁਪਏ ਬਰਾਮਦ ਕੀਤੇ ਹਨ।
