ਜਲੰਧਰ, 4 ਮਈ 2023 – ਬੀਤੇ ਦਿਨ ਜਲੰਧਰ ਸ਼ਹਿਰ ਦੇ ਵਿਜ ਨਗਰ ਗਾਜੀ ਗੁੱਲਾ ਤੋਂ 6 ਮਹੀਨੇ ਦੀ ਬੱਚੀ ਨੂੰ ਅਗਵਾ ਕਰਨ ਵਾਲੇ ਗਿਰੋਹ ਦੀ ਸੀਸੀਟੀਵੀ ਫੁਟੇਜ ਸਾਹਮਣੇ ਆਈ ਹੈ। ਸੀਸੀਟੀਵੀ ਵਿੱਚ ਦਿਖਾਈ ਦੇ ਰਿਹਾ ਹੈ ਕਿ 3 ਅਗਵਾਕਾਰ ਸਨ ਅਤੇ ਉਨ੍ਹਾਂ ਵਿੱਚ ਇੱਕ ਔਰਤ ਵੀ ਸ਼ਾਮਲ ਸੀ। ਤਿੰਨੇ ਸਕੂਟੀ ‘ਤੇ ਸਵਾਰ ਹੋ ਕੇ ਆਏ ਅਤੇ ਬੱਚਿਆਂ ‘ਚੋਂ ਛੋਟੀ ਬੱਚੀ ਨੂੰ ਚੁੱਕ ਲਿਆ।
ਹਾਲਾਂਕਿ ਜੋ ਸੀਸੀਟੀਵੀ ਫੁਟੇਜ ਸਾਹਮਣੇ ਆਈ ਹੈ, ਉਸ ਦੀ ਕੁਆਲਿਟੀ ਖ਼ਰਾਬ ਹੈ। ਸੀਸੀਟੀਵੀ ਵਿੱਚ ਬੱਚੇ ਚੁੱਕਣ ਵਾਲੇ ਗਿਰੋਹ ਦੇ ਮੈਂਬਰਾਂ ਦੇ ਚਿਹਰੇ ਸਾਫ਼ ਨਜ਼ਰ ਨਹੀਂ ਆ ਰਹੇ ਹਨ। ਨਾ ਹੀ ਸਕੂਟੀ ਦਾ ਨੰਬਰ ਆ ਰਿਹਾ ਹੈ। ਜਿਸ ਰਸਤੇ ਤੋਂ ਉਹ ਆਏ ਸਨ, ਉਨ੍ਹਾਂ ਦੇ ਪਹਿਨੇ ਹੋਏ ਕੱਪੜਿਆਂ, ਸਕੂਟੀ ਦੇ ਰੰਗ ਅਤੇ ਕੁਝ ਹੋਰ ਕੈਮਰਿਆਂ ਦੀ ਜਾਂਚ ਕਰਕੇ ਪੁਲਿਸ ਗਿਰੋਹ ਨੂੰ ਫੜਨ ਦੀ ਕੋਸ਼ਿਸ਼ ਕਰ ਰਹੀ ਹੈ।
ਜਦੋਂ ਗਰੋਹ ਵੱਲੋਂ ਬੱਚੀ ਨੂੰ ਚੁੱਕਿਆ ਗਿਆ ਤਾਂ ਪ੍ਰਵਾਸੀ ਓਮ ਪ੍ਰਕਾਸ਼ ਦੇ ਦੋ ਬੱਚੇ ਘਰ ਦੇ ਬਾਹਰ ਆਪਣੀ ਛੋਟੀ ਭੈਣ ਨੂੰ ਝੂਲਾ ਰਹੇ ਸਨ। ਉਥੇ ਕੁਝ ਹੋਰ ਬੱਚੇ ਵੀ ਖੇਡ ਰਹੇ ਸਨ। ਅਗਵਾਕਾਰ ਸਕੂਟੀ ‘ਤੇ ਬੱਚਿਆਂ ਕੋਲ ਆਏ ਸਨ। ਉਸਨੇ ਸਭ ਤੋਂ ਪਹਿਲਾਂ ਬੱਚਿਆਂ ਨੂੰ ਆਪਣੀਆਂ ਗੱਲਾਂ ‘ਚ ਲਾਇਆ। ਇਸ ਤੋਂ ਬਾਅਦ 6 ਮਹੀਨੇ ਦੀ ਬੱਚੀ ਦੇ ਭਰਾ-ਭੈਣ ਨੂੰ 500 ਰੁਪਏ ਦਿੱਤੇ ਅਤੇ ਔਰਤ ਨੇ ਬੱਚੀ ਨੂੰ ਚੁੱਕ ਲਿਆ।
ਤਿੰਨ ਅਗਵਾਕਾਰਾਂ ਵਿੱਚੋਂ ਸਿਰਫ਼ ਔਰਤ ਹੀ ਸਕੂਟੀ ਤੋਂ ਹੇਠਾਂ ਉਤਰੀ। ਔਰਤ ਨੇ ਪਹਿਲਾਂ ਬੱਚੀ ਨੂੰ ਦੁੱਧ ਪਿਲਾਉਣ ਲਈ ਝੂਲੇ ਤੋਂ ਚੁੱਕਿਆ, ਉਸ ਤੋਂ ਬਾਅਦ ਉਹ ਬੱਚੀ ਨੂੰ ਲੈ ਕੇ ਸਕੂਟੀ ‘ਤੇ ਬੈਠ ਗਈ ਅਤੇ ਤਿੰਨੋਂ ਮੌਕੇ ਤੋਂ ਫਰਾਰ ਹੋ ਗਏ। ਪੁਲੀਸ ਨੇ ਇਸ ਸਬੰਧੀ ਕੇਸ ਦਰਜ ਕਰ ਲਿਆ ਹੈ ਅਤੇ ਟੀਮਾਂ ਦਾ ਗਠਨ ਕਰ ਦਿੱਤਾ ਹੈ ਜੋ ਵੱਖ-ਵੱਖ ਥਾਵਾਂ ’ਤੇ ਇਸ ਬੱਚੇ ਨੂੰ ਅਗਵਾ ਕਰਨ ਵਾਲੇ ਗਰੋਹ ਦਾ ਪਤਾ ਲਗਾ ਰਹੀਆਂ ਹਨ।
