ਲੁਧਿਆਣਾ, 28 ਅਗਸਤ 2022 – ਲੁਧਿਆਣਾ ‘ਚ ਦਿਨ ਦਿਹਾੜੇ ਈ-ਰਿਕਸ਼ਾ ‘ਤੇ ਜਾ ਰਹੀ ਔਰਤ ਦਾ ਪਰਸ ਬਾਈਕ ਸਵਾਰ ਨੇ ਖੋਹ ਲਿਆ ਅਤੇ ਇਸ ਦੌਰਾਨ ਔਰਤ ਈ-ਰਿਕਸ਼ਾ ਤੋਂ ਨਿੱਕਲ ਕੇ ਸੜਕ ‘ਤੇ ਡਿੱਗ ਗਈ। ਔਰਤ ਬੁਰੀ ਤਰ੍ਹਾਂ ਜ਼ਖਮੀ ਹੋ ਗਈ ਪਰ ਬਾਈਕ ਸਵਾਰ ਫ਼ਰਾਰ ਹੋ ਗਿਆ। ਇਹ ਘਟਨਾ ਹੈਬੋਵਾਲ ਇਲਾਕੇ ਦੀ ਹੈ। ਔਰਤ ਆਪਣੀ ਡਿਊਟੀ ਖਤਮ ਕਰਕੇ ਘਰ ਜਾ ਰਹੀ ਸੀ।
ਪੀੜਤ ਔਰਤ ਦੀ ਪਛਾਣ ਅਨੁਰਾਧਾ ਧਵਨ ਵਜੋਂ ਹੋਈ ਹੈ। ਔਰਤ ਮਾਲ ਰੋਡ ‘ਤੇ ਇਕ ਡਾਕਟਰ ਕੋਲ ਰਿਸੈਪਸ਼ਨਿਸਟ ਵਜੋਂ ਕੰਮ ਕਰਦੀ ਹੈ। ਔਰਤ ਮੁਤਾਬਕ ਉਹ ਡਿਊਟੀ ਖਤਮ ਕਰਕੇ ਰਿਕਸ਼ਾ ‘ਤੇ ਘਰ ਜਾ ਰਹੀ ਸੀ ਕਿ ਬਾਈਕ ਸਵਾਰ ਬਦਮਾਸ਼ ਆ ਕੇ ਉਸ ਦਾ ਪਰਸ ਖੋਹ ਕੇ ਲੈ ਗਏ। ਰਿਕਸ਼ੇ ‘ਚ ਬੈਠਦਿਆਂ ਹੀ ਉਸ ਨੇ ਬਾਈਕ ਸਵਾਰ ਤੋਂ ਪਰਸ ਖੋਹਣ ਦੀ ਕੋਸ਼ਿਸ਼ ਕੀਤੀ ਪਰ ਉਹ ਸੜਕ ‘ਤੇ ਡਿੱਗ ਗਈ। ਇਸ ਕਾਰਨ ਉਸ ਨੂੰ ਕਾਫੀ ਸੱਟਾਂ ਲੱਗੀਆਂ।
ਅਨੁਰਾਧਾ ਨੇ ਦੱਸਿਆ ਕਿ ਉਸ ਦੇ ਪਰਸ ਵਿੱਚ ਕਰੀਬ 40 ਹਜ਼ਾਰ ਰੁਪਏ ਅਤੇ ਜ਼ਰੂਰੀ ਸਾਮਾਨ ਸੀ। ਉਸ ਨੇ ਨਵੀਂ ਐਕਟਿਵਾ ਸਕੂਟੀ ਲੈਣ ਲਈ ਬੈਂਕ ਵਿੱਚ 40 ਹਜ਼ਾਰ ਰੁਪਏ ਜਮ੍ਹਾਂ ਕਰਵਾਏ ਸਨ। ਉਸ ਨੇ ਅੱਜ ਬੈਂਕ ਵਿੱਚੋਂ ਪੈਸੇ ਕਢਵਾਏ ਸਨ। ਲੋਕ ਜ਼ਖਮੀ ਅਨੁਰਾਧਾ ਨੂੰ ਇਲਾਜ ਲਈ ਡਾਕਟਰ ਕੋਲ ਲੈ ਗਏ। ਔਰਤ ਨੇ ਘਟਨਾ ਦੀ ਸੂਚਨਾ ਪੁਲਸ ਨੂੰ ਦਿੱਤੀ। ਪੁਲਸ ਮੌਕੇ ‘ਤੇ ਪਹੁੰਚੀ ਅਤੇ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕਰ ਰਹੀ ਹੈ।
