- ਗੁਲਾਟੀ ਨੇ ਕਿਹਾ…..ਕੇਸ ਲੜੋ, ਮੈਂ ਤੁਹਾਡੇ ਨਾਲ ਹਾਂ
ਚੰਡੀਗੜ੍ਹ, 28 ਅਕਤੂਬਰ 2022 – ਲਾਅ ਦੇ ਚੌਥੇ ਸਾਲ ਦੀ ਵਿਦਿਆਰਥਣ ਆਪਣੇ ਬੁਆਏਫ੍ਰੈਂਡ ਵਲੋਂ ਕੀਤੇ ਧੋਖੇ ਦੀ ਸ਼ਿਕਾਇਤ ਲੈ ਕੇ ਪੰਜਾਬ ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਮਨੀਸ਼ਾ ਗੁਲਾਟੀ ਦੀ ਲੋਕ ਅਦਾਲਤ ਵਿੱਚ ਪਹੁੰਚੀ। ਲੜਕੀ ਨੇ ਚੇਅਰਪਰਸਨ ਮਨੀਸ਼ਾ ਗੁਲਾਟੀ ਨੂੰ ਵਟਸਐਪ ‘ਤੇ ਆਪਣੇ ਬੁਆਏਫ੍ਰੈਂਡ ਵੱਲੋਂ ਭੇਜੀਆਂ ਗਈਆਂ ਅਸ਼ਲੀਲ ਟਿੱਪਣੀਆਂ ਦੇ ਪ੍ਰਿੰਟ ਆਊਟ ਦਿਖਾਏ। ਅਜਿਹੇ ਦਸਤਾਵੇਜ਼ ਦੇਖ ਕੇ ਮਨੀਸ਼ਾ ਗੁਲਾਟੀ ਹੈਰਾਨ ਰਹਿ ਗਈ ਅਤੇ ਲੋਕ ਅਦਾਲਤ ‘ਚ ਹੀ ਸਾਹਮਣੇ ਖੜ੍ਹੇ ਦੋਸ਼ੀ ਲੜਕੇ ਨੂੰ ਹੀ ਝਿੜਕਿਆ।
ਮਨੀਸ਼ਾ ਗੁਲਾਟੀ ਨੂੰ ਲਾਅ ਦੀ ਵਿਦਿਆਰਥਣ ਨੇ ਦੱਸਿਆ ਕਿ ਉਹ ਕਾਨੂੰਨ ਦੀ ਪੜ੍ਹਾਈ ਕਰ ਰਹੀ ਹੈ। ਉਸ ਨੂੰ ਅਜਿਹੀਆਂ ਇਤਰਾਜ਼ਯੋਗ ਟਿੱਪਣੀਆਂ ਕਰਨ ਅਤੇ ਰਿਸ਼ਤੇ ਵਿੱਚ ਧੋਖਾ ਕਰਨ ਵਾਲੇ ਲੜਕੇ ਨੂੰ ਸਜ਼ਾ ਦੇ ਕੇ ਦੂਜੀਆਂ ਕੁੜੀਆਂ ਲਈ ਇੱਕ ਮਿਸਾਲ ਕਾਇਮ ਕਰਨੀ ਚਾਹੀਦੀ ਹੈ। ਮਨੀਸ਼ਾ ਗੁਲਾਟੀ ਨੇ ਲਾਈਵ ਹੋ ਕੇ ਇਹ ਸਾਰੀ ਗੱਲਬਾਤ ਦੱਸੀ ਪਰ ਉਸ ਨੇ ਲੜਕੇ-ਲੜਕੀ ਦੇ ਭਵਿੱਖ ਨੂੰ ਧਿਆਨ ‘ਚ ਰੱਖਦਿਆਂ ਉਨ੍ਹਾਂ ਨੂੰ ਕੈਮਰੇ ਦੇ ਸਾਹਮਣੇ ਨਹੀਂ ਲਿਆਂਦਾ।
ਮਨੀਸ਼ਾ ਗੁਲਾਟੀ ਨੇ ਕਿਹਾ ਕਿ ਉਹ ਹੈਰਾਨ ਹੈ ਕਿ ਇੰਨੇ ਲੰਬੇ ਰਿਸ਼ਤੇ ਤੋਂ ਬਾਅਦ ਕੋਈ ਮੁੰਡਾ ਆਪਣੀ ਪ੍ਰੇਮਿਕਾ ਬਾਰੇ ਭੱਦੀ ਟਿੱਪਣੀ ਕਿਵੇਂ ਕਰ ਸਕਦਾ ਹੈ। ਉਸ ਨੇ ਲਾਅ ਦੀ ਵਿਦਿਆਰਥਣ ਨੂੰ ਦੋਸ਼ੀ ਲੜਕੇ ਵਿਰੁੱਧ ਅਦਾਲਤ ਵਿਚ ਕੇਸ ਦਾਇਰ ਕਰਨ ਲਈ ਕਿਹਾ। ਜੇਕਰ ਉਸ ਨੂੰ ਕਿਸੇ ਤਰ੍ਹਾਂ ਦੀ ਕੋਈ ਸਮੱਸਿਆ ਆਉਂਦੀ ਹੈ ਤਾਂ ਗੁਲਾਟੀ ਨੇ ਕਿਹਾ ਕੇ ਉਹ ਉਸ ਦੇ ਨਾਲ ਖੜ੍ਹੀ ਹੈ।
