ਚੰਡੀਗੜ੍ਹ, 26 ਨਵੰਬਰ 2022 – ਦੇਸ਼ ਦੇ ਜ਼ਿਆਦਾਤਰ ਸ਼ਹਿਰਾਂ ਅਤੇ ਰਾਜਾਂ ਵਿੱਚ ਵਾਹਨਾਂ ਦੇ ਆਨਲਾਈਨ ਚਲਾਨ ਸ਼ੁਰੂ ਹੋ ਗਏ ਹਨ। ਜਿਸ ਤਹਿਤ ਵਾਹਨਾਂ ਦੇ ਆਨਲਾਈਨ ਚਲਾਨ ਕੀਤੇ ਜਾ ਰਹੇ ਹਨ। ਤੁਸੀਂ ਆਪਣੇ ਵਾਹਨ ਨਾਲ ਜਿੱਥੇ ਮਰਜ਼ੀ ਸਫ਼ਰ ਕਰ ਰਹੇ ਹੋ, ਜੇਕਰ ਤੁਸੀਂ ਟ੍ਰੈਫਿਕ ਨਿਯਮਾਂ ਦੀ ਅਣਦੇਖੀ ਕਰਦੇ ਹੋ, ਤਾਂ ਤੁਹਾਡੇ ਮੋਬਾਈਲ ਫੋਨ ‘ਤੇ ਟ੍ਰੈਫਿਕ ਪੁਲਿਸ ਵੱਲੋਂ ਚਲਾਨ ਦਾ ਸੁਨੇਹਾ ਆ ਜਾਵੇਗਾ।
ਚੰਡੀਗੜ੍ਹ ਵਿੱਚ ਹੀ ਨਹੀਂ ਸਗੋਂ ਨਾਲ ਲੱਗਦੇ ਸੂਬੇ ਹਿਮਾਚਲ ਵਿੱਚ ਵੀ ਆਨਲਾਈਨ ਚਲਾਨ ਕੱਟਣੇ ਸ਼ੁਰੂ ਹੋ ਗਏ ਹਨ। ਅਜਿਹੇ ‘ਚ ਹਿਮਾਚਲ ਟਰਾਂਸਪੋਰਟ ਤੋਂ ਮੋਬਾਈਲ ‘ਤੇ ਚਲਾਨ ਦੇ ਸੰਦੇਸ਼ ਭੇਜੇ ਜਾ ਰਹੇ ਹਨ।
ਹੁਣ ਇਸ ਨੂੰ ਗਲਤੀ ਕਹੋ ਜਾਂ ਲਾਪਰਵਾਹੀ… ਕਿਉਂਕਿ ਸਾਹਮਣੇ ਆਇਆ ਮਾਮਲਾ ਜਾਣ ਕੇ ਤੁਸੀਂ ਵੀ ਹੈਰਾਨ ਰਹਿ ਜਾਓਗੇ। ਦਰਅਸਲ ਹਿਮਾਚਲ ਟਰਾਂਸਪੋਰਟ ਵੱਲੋਂ ਚੰਡੀਗੜ੍ਹ ਦੇ ਆਟੋ ਚਾਲਕ ਦਾ ਵੱਡਾ ਆਨਲਾਈਨ ਚਲਾਨ ਕੀਤਾ ਗਿਆ ਹੈ। ਜਦੋਂ ਆਟੋ ਚਾਲਕ ਨੂੰ ਹਿਮਾਚਲ ਟਰਾਂਸਪੋਰਟ ਵਿਭਾਗ ਵੱਲੋਂ ਆਪਣੇ ਮੋਬਾਈਲ ‘ਤੇ ਆਟੋ ਚਲਾਨ ਦਾ ਸੁਨੇਹਾ ਮਿਲਿਆ ਤਾਂ ਉਹ ਹੈਰਾਨ ਰਹਿ ਗਿਆ।
ਹਿਮਾਚਲ ਦੇ ਟਰਾਂਸਪੋਰਟ ਵਿਭਾਗ ਨੇ ਚੰਡੀਗੜ੍ਹ ‘ਚ ਚੱਲਣ ਵਾਲੇ ਆਟੋ ਦਾ ਵੱਡਾ ਚਲਾਨ ਕੀਤਾ ਹੈ। ਹਿਮਾਚਲ ਟਰਾਂਸਪੋਰਟ ਨੇ ਆਟੋ ਚਾਲਕ ਦਾ ਕੁੱਲ 27 ਹਜ਼ਾਰ 500 ਰੁਪਏ ਦਾ ਚਲਾਨ ਕੱਟਿਆ ਹਉ। ਮੋਬਾਈਲ ‘ਤੇ ਚਲਾਨ ਕੱਟੇ ਜਾਣ ਦੀ ਸੂਚਨਾ ਮਿਲਣ ਤੋਂ ਬਾਅਦ ਆਟੋ ਚਾਲਕ ਪਰੇਸ਼ਾਨ ਹੈ। ਆਟੋ ਚਾਲਕ ਦੁਰਗਾ ਨੰਦ ਮਾਮਲੇ ਦੀ ਸ਼ਿਕਾਇਤ ਚੰਡੀਗੜ੍ਹ ਪੁਲੀਸ ਅਤੇ ਹਿਮਾਚਲ ਟਰਾਂਸਪੋਰਟ ਵਿਭਾਗ ਨੂੰ ਵੀ ਦਿੱਤੀ ਗਈ ਹੈ।
ਚੰਡੀਗੜ੍ਹ ਦੇ ਰਹਿਣ ਵਾਲੇ ਆਟੋ ਚਾਲਕ ਦੁਰਗਾ ਨੰਦ ਕੋਲ ਹਰਿਆਣਾ ਨੰਬਰ ਐਚਆਰ 68ਬੀ 8822 ਆਟੋ ਹੈ, ਜਿਸ ਦਾ ਹਿਮਾਚਲ ਟਰਾਂਸਪੋਰਟ ਵੱਲੋਂ ਆਨਲਾਈਨ ਚਲਾਨ ਕੱਟਿਆ ਗਿਆ ਹੈ। ਉਹ ਆਪਣੇ ਆਟੋ ਨਾਲ ਟ੍ਰਾਈਸਿਟੀ (ਚੰਡੀਗੜ੍ਹ, ਪੰਚਕੂਲਾ, ਮੋਹਾਲੀ) ਵਿੱਚ ਯਾਤਰੀਆਂ ਨੂੰ ਲੈ ਕੇ ਜਾਂਦਾ ਹੈ। ਦੁਰਗਾ ਨੰਦ ਨੇ ਦੱਸਿਆ ਕਿ ਉਹ ਕਦੇ ਵੀ ਆਟੋ ਲੈ ਕੇ ਹਿਮਾਚਲ ਨਹੀਂ ਗਿਆ। ਇਸ ਤੋਂ ਇਲਾਵਾ ਉਹ ਕਦੇ ਵੀ ਟਰੈਫਿਕ ਨਿਯਮਾਂ ਦੀ ਉਲੰਘਣਾ ਨਹੀਂ ਕਰਦਾ। ਚੰਡੀਗੜ੍ਹ ਵਿੱਚ ਸਖ਼ਤ ਨਿਯਮਾਂ ਦੇ ਬਾਵਜੂਦ ਅੱਜ ਤੱਕ ਸ਼ਹਿਰ ਵਿੱਚ ਉਸ ਦਾ ਚਲਾਨ ਨਹੀਂ ਕੀਤਾ ਗਿਆ, ਜਦੋਂ ਕਿ ਹਿਮਾਚਲ ਟਰਾਂਸਪੋਰਟ ਵਿਭਾਗ ਨੇ ਉਸ ਦੇ ਆਟੋ ਦਾ ਇੰਨਾ ਮੋਟਾ ਚਲਾਨ ਕਿਵੇਂ ਕੀਤਾ ਹੈ।
ਆਟੋ ਚਾਲਕ ਦੁਰਗਾ ਨੰਦ ਨੂੰ ਉਸ ਦੇ ਮੋਬਾਈਲ ‘ਤੇ ਹਿਮਾਚਲ ਟਰਾਂਸਪੋਰਟ ਤੋਂ ਵੱਡੀ ਰਕਮ ਦਾ ਚਲਾਨ ਭਰਨ ਦਾ ਸੁਨੇਹਾ ਮਿਲਿਆ ਹੈ। ਹੈਰਾਨੀਜਨਕ ਗੱਲ ਇਹ ਹੈ ਕਿ ਚਲਾਨ ਦੇ ਮੈਸੇਜ ਵਿੱਚ ਆਟੋ ਦਾ ਨੰਬਰ ਅਤੇ ਮੋਬਾਈਲ ਨੰਬਰ ਸਹੀ ਲਿਖਿਆ ਹੋਇਆ ਹੈ ਪਰ ਨਾਮ ਦੁਰਗਾ ਨੰਦ ਦੀ ਬਜਾਏ ਰਾਮਲਾਲ ਦਾ ਹੈ।
ਚੰਡੀਗੜ੍ਹ ਆਟੋ ਯੂਨੀਅਨ ਦੇ ਪ੍ਰਧਾਨ ਅਨਿਲ ਕੁਮਾਰ ਨੇ ਦੱਸਿਆ ਕਿ ਇਸ ਤੋਂ ਪਹਿਲਾਂ ਵੀ ਅਜਿਹੀ ਲਾਪਰਵਾਹੀ ਲਈ ਹਿਮਾਚਲ ਟਰਾਂਸਪੋਰਟ ਵੱਲੋਂ ਇੱਕ ਆਟੋ ਚਾਲਕ ਦਾ 35 ਹਜ਼ਾਰ ਰੁਪਏ ਦਾ ਚਲਾਨ ਕੱਟਿਆ ਗਿਆ ਸੀ। ਬਾਅਦ ਵਿੱਚ ਸ਼ਿਕਾਇਤ ਕਰਨ ਅਤੇ ਦੋ ਵਾਰ ਚੱਕਰ ਲਗਾਉਣ ਤੋਂ ਬਾਅਦ ਚਲਾਨ ਕੈਂਸਲ ਕਰ ਦਿੱਤਾ ਗਿਆ। ਇਸ ਤਰ੍ਹਾਂ ਵਿਭਾਗ ਦੀ ਲਾਪ੍ਰਵਾਹੀ ਕਾਰਨ ਆਟੋ ਚਾਲਕਾਂ ਦਾ ਨੁਕਸਾਨ ਹੁੰਦਾ ਹੈ।
