ਚੰਡੀਗੜ੍ਹ, 18 ਫਰਵਰੀ 2022 – ਪੰਜਾਬ ‘ਚ ਚੋਣ ਪ੍ਰਚਾਰ ਅੱਜ ਸ਼ਾਮ ਖਤਮ ਹੋ ਰਿਹਾ ਹੈ ਪਰ ਸੱਤਾ ‘ਚ ਵਾਪਸੀ ਲਈ ਪੂਰੀ ਕੋਸ਼ਿਸ਼ ਕਰ ਰਹੀ ਕਾਂਗਰਸ ਨੂੰ ਕੁਝ ਘੰਟੇ ਪਹਿਲਾਂ ਹੀ ਆਪਣਾ ਚੋਣ ਮਨੋਰਥ ਪੱਤਰ ਜਾਰੀ ਕਰਨਾ ਯਾਦ ਆ ਗਿਆ ਹੈ। ਪੰਜਾਬ ‘ਚ 2 ਦਿਨ ਬਾਅਦ 20 ਫਰਵਰੀ ਨੂੰ ਵੋਟਾਂ ਪੈਣੀਆਂ ਹਨ। 11:30 ਵਜੇ ਚੰਡੀਗੜ੍ਹ ‘ਚ CM ਚੰਨੀ ਤੇ ਕੇ.ਸੀ ਵੇਣੂਗੋਪਾਲ ਮੈਨੀਫੈਸਟੋ ਜਾਰੀ ਕਰਨਗੇ। ਇਸ ਦੌਰਾਨ ਕਈ ਹੋਰ ਆਗੂ ਵੀ ਮੌਜੂਦ ਰਹਿਣਗੇ। ਚੋਣ ਮਨੋਰਥ ਪੱਤਰ ਵਿਚ ਅੱਜ ਇਹ ਵੀ ਦੇਖਣਾ ਹੋਵੇਗਾ ਕਿ ਨਵਜੋਤ ਸਿੱਧੂ ਦੇ ਪੰਜਾਬ ਮਾਡਲ ਬਾਰੇ ਕੀਤੇ ਐਲਾਨ ਵੀ ਸ਼ਾਮਲ ਹੋਣਗੇ।
ਪਰ ਯੂਪੀ ਲਈ 3-3 ਮੈਨੀਫੈਸਟੋ ਜਾਰੀ ਕਰਨ ਵਾਲੀ ਕਾਂਗਰਸ ਪੰਜਾਬ ਦੇ ਵੋਟਰਾਂ ਨੂੰ ਇਹ ਨਹੀਂ ਦੱਸ ਸਕੀ ਕਿ ਸੂਬੇ ਲਈ ਉਸ ਦਾ ਵਿਜ਼ਨ ਕੀ ਹੈ। ਇਸ ਕਾਰਨ ਪਾਰਟੀ ਅੰਦਰ ਵੀ ਇਕ ਪੱਧਰ ‘ਤੇ ਨਾਰਾਜ਼ਗੀ ਹੈ।
ਆਪਣੇ ਪੰਜਾਬ ਮਾਡਲ ਦੀ ਹਰ ਪਾਸੇ ਤਾਰੀਫ ਕਰਨ ਵਾਲੇ ਕਾਂਗਰਸ ਦੇ ਸੂਬਾ ਪ੍ਰਧਾਨ ਨਵਜੋਤ ਸਿੱਧੂ ਵੀ 6 ਫਰਵਰੀ ਨੂੰ ਚਰਨਜੀਤ ਚੰਨੀ ਨੂੰ ਮੁੱਖ ਮੰਤਰੀ ਚਿਹਰਾ ਐਲਾਨੇ ਜਾਣ ਤੋਂ 10 ਦਿਨ ਬਾਅਦ ਵੀ ਚੁੱਪ ਹਨ। ਪ੍ਰਚਾਰ ਲਈ ਪੰਜਾਬ ਪਹੁੰਚੇ ਰਾਹੁਲ ਗਾਂਧੀ ਅਤੇ ਪ੍ਰਿਅੰਕਾ ਗਾਂਧੀ ਨੇ ਕਈ ਚੋਣ ਵਾਅਦੇ ਕੀਤੇ ਪਰ ਪਾਰਟੀ ਕੋਈ ਵੀ ਅਧਿਕਾਰਤ ਦਸਤਾਵੇਜ਼ ਜਾਰੀ ਨਹੀਂ ਕਰ ਸਕੀ।
ਕਾਂਗਰਸ ਹਾਈਕਮਾਂਡ ਨੇ ਆਪਣੇ ਰਾਜ ਸਭਾ ਮੈਂਬਰ ਅਤੇ ਕਾਦੀਆਂ ਤੋਂ ਚੋਣ ਲੜ ਰਹੇ ਪ੍ਰਤਾਪ ਸਿੰਘ ਬਾਜਵਾ ਨੂੰ ਚੋਣ ਮੈਨੀਫੈਸਟੋ ਕਮੇਟੀ ਦਾ ਚੇਅਰਮੈਨ ਵੀ ਬਣਾਇਆ ਸੀ ਪਰ ਪਾਰਟੀ ਮੈਨੀਫੈਸਟੋ ਜਲਦੀ ਨਹੀਂ ਲਿਆ ਸਕੀ। ਚੋਣ ਮੈਨੀਫੈਸਟੋ ਵਿੱਚ ਦੇਰੀ ਤੋਂ ਚਿੰਤਤ ਪਾਰਟੀ ਦੇ ਕਈ ਸੀਨੀਅਰ ਆਗੂ ਇਸ ਨੂੰ ਜਲਦੀ ਤੋਂ ਜਲਦੀ ਜਾਰੀ ਕਰਨ ਦੇ ਹੱਕ ਵਿੱਚ ਖੜ੍ਹੇ ਨਜ਼ਰ ਆਏ ਪਰ ਪ੍ਰਚਾਰ ਦੇ ਆਖਰੀ ਦਿਨ ਤੱਕ ਪਾਰਟੀ ਆਪਣੇ ਚੋਣ ਵਾਅਦਿਆਂ ਦਾ ਕੋਈ ਦਸਤਾਵੇਜ਼ ਜਾਰੀ ਨਹੀਂ ਕਰ ਸਕੀ।
