ਚੰਡੀਗੜ੍ਹ, 7 ਮਾਰਚ 2023 – ਚੰਡੀਗੜ੍ਹ ਵਿੱਚ ਜੁਡੀਸ਼ੀਅਲ ਮੈਜਿਸਟਰੇਟ ਜਸਪ੍ਰੀਤ ਸਿੰਘ ਮਿਨਹਾਸ ਨੇ ਵਾਹਨਾਂ ਦੇ ਜਾਅਲੀ ਦਸਤਾਵੇਜ਼ ਤਿਆਰ ਕਰਕੇ ਬੈਂਕ ਕਰਜ਼ਾ ਲੈ ਕੇ ਲੱਖਾਂ ਰੁਪਏ ਦੀ ਠੱਗੀ ਮਾਰਨ ਵਾਲੇ ਸਮਰ ਠਾਕੁਰ ਨਾਮਕ ਮੁਲਜ਼ਮ ਨੂੰ 3 ਸਾਲ ਕੈਦ ਦੀ ਸਜ਼ਾ ਸੁਣਾਈ ਹੈ। ਇੱਕ ਆਟੋ ਫਾਈਨਾਂਸ ਕੰਪਨੀ ਦੇ ਸਾਬਕਾ ਕਰਮਚਾਰੀ ਸਮਰ ਨੂੰ ਜਾਅਲਸਾਜ਼ੀ ਦੇ ਇੱਕ ਮਾਮਲੇ ਵਿੱਚ ਸਜ਼ਾ ਸੁਣਾਈ ਗਈ ਹੈ।
ਇਸੇ ਕੇਸ ਵਿੱਚ ਸੋਨੂੰ ਅਤੇ ਪ੍ਰਕਾਸ਼ ਨਾਮ ਦੇ ਦੋ ਮੁਲਜ਼ਮਾਂ ਨੂੰ ਸਬੂਤਾਂ ਦੀ ਘਾਟ ਕਾਰਨ ਬਰੀ ਕਰ ਦਿੱਤਾ ਗਿਆ ਹੈ। ਸੈਕਟਰ 36 ਥਾਣੇ ਦੀ ਪੁਲੀਸ ਨੇ ਇਹ ਕੇਸ 21 ਫਰਵਰੀ 2015 ਨੂੰ ਧੋਖਾਧੜੀ ਅਤੇ ਜਾਅਲਸਾਜ਼ੀ ਦੀਆਂ ਧਾਰਾਵਾਂ ਤਹਿਤ ਦਰਜ ਕੀਤਾ ਸੀ।
ਪੁਲੀਸ ਕੇਸ ਅਨੁਸਾਰ ਸਮਰ ਠਾਕੁਰ ਇਸ ਕੇਸ ਵਿੱਚ ਇਸ ਰੈਕੇਟ ਦਾ ਮਾਸਟਰਮਾਈਂਡ ਸੀ। ਉਹ ਹੋਰ ਮੁਲਜ਼ਮਾਂ ਦੀ ਮਦਦ ਨਾਲ ਲੋਨ ਲੈਣ ਵਾਲਿਆਂ ਤੋਂ ਦਸਤਾਵੇਜ਼ ਲੈ ਲੈਂਦਾ ਸੀ। ਉਹ ਅਸਲ ਦਸਤਾਵੇਜ਼ਾਂ ਦੀ ਫੋਟੋ ਕਾਪੀ ਅਤੇ ਐਡਿਟ ਕਰਕੇ ਵਿਅਕਤੀ ਦੀ ਫਰਜ਼ੀ ਪਛਾਣ ਬਣਾ ਲੈਂਦਾ ਸੀ।
ਪੁਲਿਸ ਨੇ ਦਾਅਵਾ ਕੀਤਾ ਸੀ ਕਿ ਸਮਰ ਆਟੋ ਡੀਲਰਾਂ ਤੋਂ ਨਵੀਆਂ ਕਾਰਾਂ ਦੀ ਡਲਿਵਰੀ ਲੈਂਦਾ ਸੀ। ਇਸ ਦੇ ਨਾਲ ਹੀ ਫਰਜ਼ੀ ਦਸਤਾਵੇਜ਼ਾਂ ਦੇ ਆਧਾਰ ‘ਤੇ ਬੈਂਕ ਤੋਂ ਕਰਜ਼ਾ ਲੈਂ ਲੈਂਦਾ ਸੀ। ਇਸ ਤੋਂ ਬਾਅਦ ਉਹ ਬੈਂਕ ਦਾ ਝਾਂਸਾ ਦੇ ਕੇ ਵਾਹਨਾਂ ਦੇ ਜਾਅਲੀ ਸੇਲ ਬਿੱਲ ਤਿਆਰ ਕਰਦਾ ਸੀ। ਅਜਿਹੀ ਸਥਿਤੀ ਵਿੱਚ ਵਾਹਨਾਂ ਦਾ ਰਜਿਸਟ੍ਰੇਸ਼ਨ ਸਰਟੀਫਿਕੇਟ (ਆਰ.ਸੀ.) ਬਿਨਾਂ ਕਿਸੇ ਵਿੱਤੀ ਸੰਸਥਾ (ਬੈਂਕ) ਦੇ ਨਾਮ ਤੋਂ ਤਿਆਰ ਕੀਤਾ ਜਾਂਦਾ ਸੀ। ਜਿਸ ਤੋਂ ਬਾਅਦ ਗੱਡੀਆਂ ਵੇਚ ਦਿੱਤੀਆਂ ਜਾਂਦੀਆਂ ਸੀ।
ਪੁਲਿਸ ਨੇ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕਰਨ ਤੋਂ ਬਾਅਦ ਚਾਰਜਸ਼ੀਟ ਦਾਇਰ ਕੀਤੀ ਸੀ। ਪਹਿਲੀ ਨਜ਼ਰੇ ਕੇਸ ਬਣਦੇ ਦੇਖ ਕੇ ਮੁਲਜ਼ਮਾਂ ਖ਼ਿਲਾਫ਼ ਦੋਸ਼ ਆਇਦ ਕੀਤੇ ਗਏ ਅਤੇ ਕੇਸ ਦੀ ਸੁਣਵਾਈ ਸ਼ੁਰੂ ਹੋ ਗਈ।
