ਚੰਡੀਗੜ੍ਹ, 6 ਅਕਤੂਬਰ 2022 – ਚੰਡੀਗੜ੍ਹ ‘ਚ ਦੁਸਹਿਰੇ ਮੌਕੇ ਰਾਵਣ ਦਹਿਨ ਦੌਰਾਨ ਇਕ ਨਿੱਜੀ ਸਕੂਲ ‘ਚ ਅੱਗ ਲੱਗ ਗਈ। ਇਹ ਘਟਨਾ ਬੁੱਧਵਾਰ ਨੂੰ ਸੈਕਟਰ 49ਬੀ ਵਿੱਚ ਵਾਪਰੀ। ਹਾਲਾਂਕਿ ਪੁਲਿਸ ਮੁਲਾਜ਼ਮ ਅਤੇ ਸਮਾਜ ਸੇਵੀ ਦੀ ਬਹਾਦਰੀ ਸਦਕਾ ਵੱਡਾ ਹਾਦਸਾ ਟਲ ਗਿਆ।
ਦਰਅਸਲ ਸੈਕਟਰ 49 ਸਥਿਤ ਰਿਆਨ ਇੰਟਰਨੈਸ਼ਨਲ ਸਕੂਲ ਦੀ ਇਮਾਰਤ ਦੇ ਕੋਲ ਸਥਿਤ ਗਰਾਊਂਡ ਵਿੱਚ ਰਾਵਣ, ਕੁੰਭਕਰਨ ਅਤੇ ਮੇਘਨਾਥ ਦੇ ਪੁਤਲੇ ਬਣਾਏ ਗਏ ਸਨ। ਉਨ੍ਹਾਂ ਨੂੰ ਸੜਦੇ ਦੇਖਣ ਲਈ ਸੈਂਕੜੇ ਲੋਕ ਪੁੱਜੇ ਹੋਏ ਸਨ। ਇਸ ਦੌਰਾਨ ਜਦੋਂ ਪੁਤਲਿਆਂ ਨੂੰ ਅੱਗ ਲਾਈ ਗਈ, ਉਸੇ ਵੇਲੇ ਹੀ ਸਕੂਲ ‘ਚ ਅੱਗ ਲੱਗ ਗਈ। ਅਸਲ ‘ਚ ਇਹ ਅੱਗ ਸ਼ੂਲ ਦੇ ਦਰੱਖਤਾਂ ਅਤੇ ਵੇਹੜੇ ‘ਚ ਪਾਏ ਸੁੱਕੇ ਪੱਤਿਆਂ ਨੂੰ ਲੱਗ ਗਈ ਸੀ, ਜਿਸ ‘ਤੇ ਸਮਾਂ ਰਹਿੰਦੇ ਹੀ ਕਾਬੂ ਪਾ ਲਿਆ ਗਿਆ ਅਤੇ ਵੱਡੀ ਘਟਨਾ ਵਾਪਰਨ ਤੋਂ ਪਹਿਲਾਂ ਹੋ ਬਚਾਅ ਹੋ ਗਿਆ।
ਮੌਕੇ ‘ਤੇ ਮੌਜੂਦ ਸੀਨੀਅਰ ਕਾਂਸਟੇਬਲ ਸ਼ਿਵ ਪ੍ਰਕਾਸ਼ ਅਤੇ ਸੈਕਟਰ 49 ‘ਚ ਰਹਿਣ ਵਾਲੇ ਸਮਾਜ ਸੇਵੀ ਰਿਸ਼ਭ ਨੇ ਤੁਰੰਤ ਸਥਿਤੀ ‘ਤੇ ਕਾਬੂ ਪਾ ਲਿਆ ਅਤੇ ਕੁਝ ਹੀ ਮਿੰਟਾਂ ‘ਚ ਅੱਗ ‘ਤੇ ਕਾਬੂ ਪਾਇਆ | ਸ਼ਿਵ ਪ੍ਰਕਾਸ਼ ਅਤੇ ਰਿਸ਼ਭ ਨੇ ਅੱਗ ਬੁਝਾਊ ਯੰਤਰ ਦੇ ਸਿਲੰਡਰਾਂ ਨਾਲ ਅੱਗ ’ਤੇ ਕਾਬੂ ਪਾਇਆ। ਇਹ ਅੱਗ ਹੋਰ ਵੀ ਫੈਲ ਸਕਦੀ ਹੈ ਅਤੇ ਸਕੂਲ ਨੂੰ ਨੁਕਸਾਨ ਪਹੁੰਚਾ ਸਕਦੀ ਹੈ। ਜਾਣਕਾਰੀ ਮੁਤਾਬਕ ਇਸ ਪ੍ਰੋਗਰਾਮ ‘ਚ ਸੰਸਦ ਮੈਂਬਰ ਕਿਰਨ ਖੇਰ ਵੀ ਪਹੁੰਚੀ ਸੀ।
ਸੀਨੀਅਰ ਕਾਂਸਟੇਬਲ ਅਤੇ ਸਥਾਨਕ ਬੀਟ ਇੰਚਾਰਜ ਸ਼ਿਵ ਪ੍ਰਕਾਸ਼ ਨੇ ਦੱਸਿਆ ਕਿ ਗਰਾਊਂਡ ਵਿੱਚ ਰਾਮਾਇਣ ਦਾ ਮੰਚਨ ਕੀਤਾ ਜਾ ਰਿਹਾ ਸੀ। ਇਸ ਦੌਰਾਨ ਰਿਆਨ ਸਕੂਲ ਵਿੱਚ ਪੁਤਲੇ ਫੂਕਣ ਦੌਰਾਨ ਅੱਗ ਲੱਗ ਗਈ। ਰਿਸ਼ਭ ਨੇ ਦੱਸਿਆ ਕਿ ਦਿਵਿਆ ਰਾਮਾਇਣ ਯੁਵਾ ਕਲਾ ਮੰਚ ਵੱਲੋਂ ਸੈਕਟਰ ਵਿੱਚ ਪਹਿਲੀ ਵਾਰ ਰਾਮਲੀਲਾ ਦਾ ਮੰਚਨ ਕੀਤਾ ਗਿਆ। ਪਹਿਲੀ ਵਾਰ ਦੁਸਹਿਰਾ ਮਨਾਇਆ ਗਿਆ। ਪ੍ਰੋਗਰਾਮ ਖਤਮ ਹੋਣ ਤੋਂ ਬਾਅਦ ਟੈਂਟ ਦੇ ਪਿਛਲੇ ਪਾਸੇ ਰਿਆਨ ਇੰਟਰਨੈਸ਼ਨਲ ਸਕੂਲ ‘ਚ ਅੱਗ ਲੱਗ ਗਈ। ਟੈਂਟ ਦੇ ਨਾਲ ਹੀ ਸਕੂਲ ਦੀ ਕੰਧ ਵੀ ਸੀ।
ਦੁਸਹਿਰੇ ਦਾ ਤਿਉਹਾਰ ਬੁੱਧਵਾਰ ਨੂੰ ਸ਼ਹਿਰ ‘ਚ ਕਈ ਥਾਵਾਂ ‘ਤੇ ਮਨਾਇਆ ਗਿਆ। ਇਸ ਤੋਂ ਪਹਿਲਾਂ ਮੰਗਲਵਾਰ ਰਾਤ ਨੂੰ ਸਮਾਜ ਵਿਰੋਧੀ ਅਨਸਰਾਂ ਨੇ ਸੈਕਟਰ 46 ਵਿੱਚ ਮੇਘਨਾਥ ਦਾ ਪੁਤਲਾ ਫੂਕਿਆ ਸੀ। ਇਸ ਦੌਰਾਨ ਰਾਵਣ ਦਾ ਪੁਤਲਾ ਫੂਕਣ ਦੀ ਕੋਸ਼ਿਸ਼ ਵੀ ਕੀਤੀ ਗਈ।
