ਮੋਗਾ, 7 ਦਸੰਬਰ 2024 – ਪੰਜਾਬ ਵਿੱਚ ਇੱਕ ਐਨਆਰਆਈ ਲਾੜਾ ਮੋਗਾ ਜ਼ਿਲ੍ਹੇ ਵਿੱਚ ਵਿਆਹ ਦੀ ਬਰਾਤ ਲੈ ਕੇ ਆਇਆ ਸੀ, ਪਰ ਉਸ ਨੂੰ ਉੱਥੇ ਲਾੜੀ ਨਹੀਂ ਮਿਲੀ। ਇਹ ਹੀ ਨਹੀਂ ਲਾੜੇ ਨੂੰ ਸ਼ਹਿਰ ਵਿੱਚ ਉਹ ਮੈਰਿਜ ਪੈਲੇਸ ਵੀ ਨਹੀਂ ਮਿਲਿਆ ਜਿਸ ਬਾਰੇ ਉਸ ਨੂੰ ਦੱਸਿਆ ਗਿਆ ਸੀ। ਜਦੋਂ ਲਾੜੇ ਨੇ ਦੁਲਹਨ ਨੂੰ ਫ਼ੋਨ ਕੀਤਾ, ਤਾਂ ਉਸਦਾ ਫ਼ੋਨ ਵੀ ਬੰਦ ਸੀ। ਇਸ ਤੋਂ ਬਾਅਦ ਲਾੜੇ ਨੂੰ ਖਾਲੀ ਹੱਥ ਬਰਾਤ ਵਾਪਿਸ ਲੈ ਕੇ ਪਰਤਣਾ ਪਿਆ।
ਦੱਸਿਆ ਜਾ ਰਿਹਾ ਹੈ ਕਿ ਦੋਵਾਂ ਦੀ ਮੁਲਾਕਾਤ ਇੰਸਟਾਗ੍ਰਾਮ ‘ਤੇ ਹੋਈ ਸੀ ਅਤੇ ਉਨ੍ਹਾਂ ਨੇ ਇਕ ਦੂਜੇ ਨਾਲ ਵਿਆਹ ਕਰਨ ਦਾ ਫੈਸਲਾ ਕੀਤਾ ਸੀ। ਲਾੜੇ ਨੂੰ ਠੱਗੀ ਮਹਿਸੂਸ ਹੋਣ ‘ਤੇ ਉਸ ਨੇ ਸਾਊਥ ਸਿਟੀ ਥਾਣੇ ‘ਚ ਮਾਮਲਾ ਦਰਜ ਕਰਵਾਇਆ। ਫਿਲਹਾਲ ਪੁਲਸ ਲਾੜੀ ਅਤੇ ਉਸ ਦੇ ਪਰਿਵਾਰ ਦੀ ਭਾਲ ਕਰ ਰਹੀ ਹੈ।
ਲਾੜੇ ਦੀਪਕ ਨੇ ਦੱਸਿਆ ਕਿ ਉਹ ਮੂਲ ਰੂਪ ਵਿੱਚ ਜਲੰਧਰ ਦਾ ਰਹਿਣ ਵਾਲਾ ਹੈ ਅਤੇ ਇਸ ਸਮੇਂ ਦੁਬਈ ਵਿੱਚ ਰਹਿੰਦਾ ਹੈ। ਉਹ ਕੁਝ ਦਿਨ ਪਹਿਲਾਂ ਹੀ ਵਿਆਹ ਲਈ ਭਾਰਤ ਆਇਆ ਸੀ। ਦੀਪਕ ਨੇ ਦੱਸਿਆ ਕਿ ਉਸ ਦੀ 4 ਸਾਲ ਪਹਿਲਾਂ ਮੋਗਾ ਦੇ ਕੋਟ ਮੁਹੱਲੇ ਦੀ ਰਹਿਣ ਵਾਲੀ ਲੜਕੀ ਮਨਪ੍ਰੀਤ ਕੌਰ ਨਾਲ ਇੰਸਟਾਗ੍ਰਾਮ ‘ਤੇ ਦੋਸਤੀ ਹੋਈ ਸੀ।
ਹੌਲੀ-ਹੌਲੀ ਗੱਲਾਂ ਵਧੀਆਂ, ਦੋਸਤੀ ਪਿਆਰ ਵਿੱਚ ਬਦਲ ਗਈ। ਦੋਹਾਂ ਵਿਚ ਪਿਆਰ ਹੋ ਗਿਆ ਅਤੇ ਦੀਪਕ ਨੇ ਉਸ ਨਾਲ ਵਿਆਹ ਕਰਨ ਦੀ ਗੱਲ ਆਖੀ। ਇਸ ‘ਤੇ ਮਨਪ੍ਰੀਤ ਨੇ ਵਿਆਹ ਦੀ ਤਰੀਕ 2 ਦਸੰਬਰ 2024 ਤੈਅ ਕੀਤੀ।
2 ਦਸੰਬਰ ਨੂੰ ਅੰਤਿਮ ਤਰੀਕ ਮੰਨਦੇ ਹੋਏ ਦੀਪਕ ਨੇ ਵਿਆਹ ਦੀਆਂ ਤਿਆਰੀਆਂ ਸ਼ੁਰੂ ਕਰ ਦਿੱਤੀਆਂ। ਫਿਰ 29 ਨਵੰਬਰ ਨੂੰ ਮਨਪ੍ਰੀਤ ਨੇ ਫੋਨ ਕਰਕੇ ਕਿਹਾ ਕਿ ਉਸ ਦੇ ਪਿਤਾ ਦੀ ਸਿਹਤ ਠੀਕ ਨਹੀਂ ਹੈ। ਵਿਆਹ ਦੀ ਤਰੀਕ ਮੁਲਤਵੀ ਕਰਨੀ ਪਵੇਗੀ। ਇਸ ਤੋਂ ਬਾਅਦ ਦੀਪਕ ਨੇ ਕਿਹਾ ਕਿ ਜੇਕਰ 2 ਨੂੰ ਨਹੀਂ ਤਾਂ 6 ਦਸੰਬਰ ਨੂੰ ਉਹ ਵਿਆਹ ਕਰਨਗੇ। ਲੜਕੀ ਨੇ ਵੀ ਦੀਪਕ ਦੀ ਇਸ ਗੱਲ ਨੂੰ ਸਵੀਕਾਰ ਕਰ ਲਿਆ। ਦੀਪਕ ਨੇ ਦੱਸਿਆ ਕਿ ਲੜਕੀ ਨੇ ਉਸ ਤੋਂ 60 ਹਜ਼ਾਰ ਰੁਪਏ ਵੀ ਲਏ ਸਨ।
ਦੀਪਕ ਨੇ ਕਿਹਾ, ‘ਅੱਜ ਮੈਂ ਸਵੇਰੇ ਉਸ (ਮਨਪ੍ਰੀਤ ਕੌਰ) ਨੂੰ ਫੋਨ ਕੀਤਾ ਕਿ ਮੈਂ ਤਿਆਰ ਹਾਂ ਅਤੇ ਵਿਆਹ ਦੀ ਬਰਾਤ ਲੈ ਕੇ ਆ ਰਿਹਾ ਹਾਂ। ਫਿਰ ਮਨਪ੍ਰੀਤ ਨੇ ਵਿਆਹ ਦੀ ਬਰਾਤ ਰੋਜ਼ ਗਾਰਡਨ ਜੋ ਗੀਤਾ ਭਵਨ ਨੇੜੇ ਹੈ, ਉੱਥੇ ਲਿਆਉਣ ਲਈ ਕਿਹਾ। ਮੋਗਾ ਪਹੁੰਚ ਕੇ ਜਦੋਂ ਉਸਨੂੰ ਫ਼ੋਨ ਕੀਤਾ ਤਾਂ ਉਸਨੇ ਫ਼ੋਨ ਕੱਟ ਦਿੱਤਾ ਅਤੇ ਬਾਅਦ ਵਿੱਚ ਸਵਿੱਚ ਆਫ਼ ਕਰ ਦਿੱਤਾ। ਜਦੋਂ ਕਾਫੀ ਦੇਰ ਹੋ ਗਈ ਤਾਂ ਅਸੀਂ ਰੋਜ਼ ਗਾਰਡਨ ਬਾਰੇ ਪੁੱਛਿਆ। ਫਿਰ ਪਤਾ ਲੱਗਾ ਕਿ ਇੱਥੇ ਰੋਜ਼ ਗਾਰਡਨ ਨਾਂ ਦਾ ਕੋਈ ਪੈਲੇਸ ਨਹੀਂ ਹੈ। ਦੀਪਕ ਨੇ ਕਿਹਾ ਕਿ ਮੈਂ 150 ਲੋਕਾਂ ਦਾ ਵਿਆਹ ਦੀ ਬਰਾਤ ਲੈ ਕੇ ਆਇਆ ਹਾਂ ਪਰ ਲੜਕੀ ਨੇ ਮੇਰੇ ਨਾਲ ਧੋਖਾ ਕੀਤਾ ਅਤੇ ਮੇਰੇ ਪਰਿਵਾਰ ਨੂੰ ਜ਼ਲੀਲ ਕੀਤਾ।
ਦੀਪਕ ਪਿਛਲੇ 6 ਸਾਲਾਂ ਤੋਂ ਦੁਬਈ ‘ਚ ਰਹਿ ਰਿਹਾ ਸੀ। ਦੁਬਈ ‘ਚ ਰਹਿੰਦੇ ਹੋਏ ਉਸ ਦੀ ਮੁਲਾਕਾਤ ਕਰੀਬ 4 ਸਾਲ ਪਹਿਲਾਂ ਇੰਸਟਾਗ੍ਰਾਮ ‘ਤੇ ਲੜਕੀ ਮਨਪ੍ਰੀਤ ਨਾਲ ਹੋਈ ਸੀ। ਲੜਕੀ ਨੇ ਦੱਸਿਆ ਸੀ ਕਿ ਉਹ ਮੋਗਾ ਵਿੱਚ ਵਕੀਲ ਹੈ। ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦੀਪਕ ਨੇ ਦੱਸਿਆ ਕਿ ਉਹ ਵਿਦੇਸ਼ ‘ਚ ਹੋਣ ਕਾਰਨ ਲੜਕੀ ਨੂੰ ਕਦੇ ਨਹੀਂ ਮਿਲਿਆ। ਜਦੋਂ ਵਿਆਹ ਦੀ ਗੱਲ ਆਈ ਤਾਂ ਲੜਕੀ ਦੇ ਪਰਿਵਾਰ ਵਾਲਿਆਂ ਨੇ ਉਸ ਦੇ ਪਰਿਵਾਰਕ ਮੈਂਬਰਾਂ ਨਾਲ ਵੀ ਗੱਲ ਕੀਤੀ।
ਪੀੜਤ ਲਾੜੇ ਨੇ ਪੁਲਸ ਤੋਂ ਲੜਕੀ ਖਿਲਾਫ ਕਾਰਵਾਈ ਦੀ ਮੰਗ ਕੀਤੀ ਹੈ। ਇਸ ਮਾਮਲੇ ਸਬੰਧੀ ਥਾਣਾ ਸਾਊਥ ਸਿਟੀ ਦੇ ਥਾਣੇਦਾਰ ਸਰਦਾਰਾ ਸਿੰਘ ਨੇ ਦੱਸਿਆ ਕਿ ਲਾੜੇ ਦੀਪਕ ਨੇ ਸਾਨੂੰ ਸ਼ਿਕਾਇਤ ਦਿੱਤੀ ਹੈ। ਉਹ ਪਿੰਡ ਮੜਿਆਲਾ ਜ਼ਿਲ੍ਹਾ ਜਲੰਧਰ ਦਾ ਰਹਿਣ ਵਾਲਾ ਹੈ। ਅਸੀਂ ਮਾਮਲਾ ਦਰਜ ਕਰਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
