ਟੂਰਿਸਟ ਨੇ CM ਭਗਵੰਤ ਮਾਨ ਨੂੰ ਪੁਲਿਸ ਮੁਲਾਜ਼ਮ ਦੀ ਕੀਤੀ ਸ਼ਿਕਾਇਤ: ਕਿਹਾ ਮਦਦ ਕਰਨ ਦੀ ਥਾਂ ਕੀਤਾ ਤੰਗ-ਪ੍ਰੇਸ਼ਾਨ

ਅੰਮ੍ਰਿਤਸਰ, 11 ਅਪ੍ਰੈਲ 2022 – ਮੁੱਖ ਮੰਤਰੀ ਭਗਵੰਤ ਮਾਨ ਵਿਦੇਸ਼ੀ ਸੈਲਾਨੀਆਂ ਲਈ ਸੁਨਹਿਰੀ ਪੰਜਾਬ ਬਣਾਉਣ ਦੀ ਗੱਲ ਕਰ ਰਹੇ ਹਨ ਪਰ ਹਾਲਾਤ ਇੰਨੇ ਮਾੜੇ ਹੋ ਗਏ ਹਨ ਕਿ ਬਹੁਤ ਸਾਰੇ ਭਾਰਤੀ ਸੈਲਾਨੀ ਵੀ ਇੱਥੇ ਵਾਪਸ ਆਉਣਾ ਨਹੀਂ ਚਾਹੁੰਦੇ। ਦਿੱਲੀ ਦੇ ਰਹਿਣ ਵਾਲੇ ਅਮਿਤ ਕੁਮਾਰ ਨੇ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਸ਼ਿਕਾਇਤ ਕਰਦੇ ਹੋਏ ਕਿਹਾ ਕਿ ਮੇਰੇ ਨਾਲ ਅਜਿਹਾ ਵਿਵਹਾਰ ਕੀਤਾ ਗਿਆ ਹੈ ਕਿ ਮੇਰੇ ਦਿਲ ‘ਚ ਪੰਜਾਬ ਪੁਲਸ ਪ੍ਰਤੀ ਸਤਿਕਾਰ ਖਤਮ ਹੋ ਗਿਆ ਹੈ।

ਦਿੱਲੀ ‘ਚ ਕੰਮ ਕਰਨ ਵਾਲੇ ਅਮਿਤ ਕੁਮਾਰ ਨੇ ਦੱਸਿਆ ਕਿ ਉਹ 9 ਅਪ੍ਰੈਲ ਨੂੰ ਆਪਣੇ ਭਰਾ ਨਾਲ ਅੰਮ੍ਰਿਤਸਰ ਪਹੁੰਚਿਆ ਸੀ। ਉਸ ਕੋਲ ਵਾਪਸ ਜਾਣ ਲਈ 10 ਮਾਰਚ ਨੂੰ ਰਾਤ 11.55 ਵਜੇ ਅੰਮ੍ਰਿਤਸਰ-ਵਿਸ਼ਾਖਾਪਟਨਮ ਰੇਲਗੱਡੀ ਸੀ, ਪਰ ਰਾਤ ਨੂੰ ਉਸ ਨਾਲ ਪੰਜਾਬ ਪੁਲੀਸ ਨੇ ਅਜਿਹਾ ਵਿਵਹਾਰ ਕੀਤਾ ਕਿ ਉਸ ਦਾ ਅੰਮ੍ਰਿਤਸਰ ਦੌਰਾ ਬੁਰੀਆਂ ਯਾਦਾਂ ਵਿੱਚ ਬਦਲ ਗਿਆ। ਅਮਿਤ ਨੇ ਇੱਕ ਵੀਡੀਓ ਰਾਹੀਂ ਟਵਿੱਟਰ ‘ਤੇ ਘਟਨਾ ਦਾ ਵੇਰਵਾ ਸਾਂਝਾ ਕੀਤਾ ਅਤੇ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਅਜਿਹੇ ਪੁਲਿਸ ਵਾਲਿਆਂ ਨੂੰ ਸਬਕ ਸਿਖਾਉਣ ਦੀ ਅਪੀਲ ਕੀਤੀ।

ਅਮਿਤ ਨੇ ਦੱਸਿਆ ਕਿ ਉਹ ਟਰੇਨ ਫੜਨ ਤੋਂ ਪਹਿਲਾਂ ਹੀ ਅੰਮ੍ਰਿਤਸਰ ਰੇਲਵੇ ਸਟੇਸ਼ਨ ‘ਤੇ ਪਹੁੰਚ ਗਿਆ ਸੀ। ਜਦੋਂ ਟਰੇਨ ਦੇ ਰਵਾਨਾ ਹੋਣ ਦਾ ਸਮਾਂ ਹੋਇਆ ਤਾਂ ਉਹ ਵੇਟਿੰਗ ਏਰੀਏ ਵਿੱਚ ਬੈਠ ਗਿਆ। ਸਾਹਮਣੇ ਚਾਰਜਿੰਗ ਪਲੱਗ ਦੇਖ ਕੇ ਉਸ ਨੇ ਆਪਣਾ ਮੋਬਾਈਲ ਉੱਥੇ ਰੱਖ ਦਿੱਤਾ, ਪਰ ਕੰਧ ਟੁੱਟਣ ਕਾਰਨ ਉਸ ਦਾ ਸੈਮਸੰਗ ਮੋਬਾਈਲ ਵਿਚਕਾਰ ਬਣੇ ਗੈਪ ਵਿੱਚ ਜਾ ਡਿੱਗਿਆ। ਕਈ ਵਾਰ ਫੋਨ ਕੱਢਣ ਦੀ ਕੋਸ਼ਿਸ਼ ਨਾਕਾਮ ਹੋਣ ‘ਤੇ ਉਸ ਨੇ ਪੁਲਸ ਮੁਲਾਜ਼ਮ ਨੂੰ ਬਾਹਰ ਦੇਖਿਆ ਅਤੇ ਮਦਦ ਲਈ ਬੁਲਾਇਆ ਪਰ ਉਸ ਪੁਲਸ ਵਾਲੇ ਨੇ ਮਦਦ ਕਰਨੀ ਤਾਂ ਦੂਰ, ਉਸ ਨੂੰ ਬਲੈਕਮੇਲ ਕਰਨਾ ਸ਼ੁਰੂ ਕਰ ਦਿੱਤਾ।

ਅਮਿਤ ਨੇ ਦੱਸਿਆ ਕਿ ਪੁਲਸ ਮੁਲਾਜ਼ਮ ਨੇ ਮਦਦ ਕਰਨ ਤੋਂ ਇਨਕਾਰ ਕਰ ਦਿੱਤਾ ਅਤੇ ਕਿਹਾ ਕਿ ਹੁਣ ਮੋਬਾਇਲ ਨਹੀਂ ਨਿਕਲੇਗਾ ਪਰ ਕੁਝ ਸਮੇਂ ਬਾਅਦ ਅਮਿਤ ਨੇ ਖੁਦ ਹੀ ਮੋਬਾਇਲ ਕੱਢ ਲਿਆ। ਇਸ ਤੋਂ ਬਾਅਦ ਪੁਲਿਸ ਮੁਲਾਜ਼ਮ ਨੇ ਮੋਬਾਈਲ ਖੋਹ ਲਿਆ ਅਤੇ ਦੋਵਾਂ ਭਰਾਵਾਂ ‘ਤੇ ਦੋਸ਼ ਲਗਾਉਣ ਲੱਗੇ ਕਿ ਇਹ ਤੁਹਾਡਾ ਮੋਬਾਈਲ ਨਹੀਂ ਹੈ।

ਅਮਿਤ ਨੇ ਦੱਸਿਆ ਕਿ ਇੱਥੇ ਪੁਲਸ ਮੁਲਾਜ਼ਮ ਨੇ ਉਸ ਨੂੰ ਤੰਗ-ਪ੍ਰੇਸ਼ਾਨ ਕਰਨਾ ਸ਼ੁਰੂ ਕਰ ਦਿੱਤਾ। ਅਮਿਤ ਨੇ ਵੀ ਉਂਗਲ ਨਾਲ ਮੋਬਾਈਲ ਖੋਲ੍ਹ ਕੇ ਦੱਸਿਆ, ਪਰ ਪੁਲਿਸ ਵਾਲੇ ਨੇ ਕਿਹਾ ਕਿ ਉਹ ਮੋਬਾਈਲ ਨਹੀਂ ਦੇ ਸਕਦਾ। 500 ਰੁਪਏ ਦਿਓ ਜਾਂ ਮੋਬਾਈਲ ਜਮਾ ਹੋ ਜਾਵੇਗਾ, ਸਵੇਰੇ ਆ ਕੇ ਲੈ ਜਾਓ। ਇੰਨਾ ਹੀ ਨਹੀਂ ਪੁਲਸ ਮੁਲਾਜ਼ਮ ਨੇ ਉਸ ਦਾ ਪਰਸ ਵੀ ਖੋਹ ਲਿਆ।

ਅਮਿਤ ਨੇ ਦੱਸਿਆ ਕਿ ਉਸ ਨੇ ਪੁਲਸ ਵਾਲਿਆਂ ਦੀ ਮਿੰਨਤ ਕੀਤੀ। ਵਾਰ-ਵਾਰ ਕਹਿਣ ਤੋਂ ਬਾਅਦ ਜਦੋਂ ਉਸ ਨੇ ਦੇਖਿਆ ਕਿ ਪਰਸ ਅਤੇ ਜੇਬ ਵਿਚ ਪੈਸੇ ਨਹੀਂ ਹਨ ਤਾਂ ਪੁਲਸ ਵਾਲੇ ਨੇ ਉਸ ਨੂੰ ਜਾਣ ਦਿੱਤਾ ਪਰ ਅਮਿਤ ਨੇ ਇਸ ਦੀ ਟਵਿੱਟਰ ‘ਤੇ ਵੀਡੀਓ ਪਾ ਦਿੱਤੀ ਅਤੇ ਸੀਐੱਮ ਭਗਵੰਤ ਮਾਨ ਨੂੰ ਟੈਗ ਕਰ ਦਿੱਤਾ।