- ਸੱਟ ਲੱਗਣ ਦੇ ਬਾਵਜੂਦ ਲੁਟੇਰੇ ਨੂੰ ਕੀਤਾ ਸੀ ਕਾਬੂ
ਜਲੰਧਰ, 26 ਜਨਵਰੀ 2023 – ਜਲੰਧਰ ਦੀ ਕੁਸੁਮ, ਜਿਸ ਨੇ ਗੁੱਟ ‘ਤੇ ਸੱਟ ਲੱਗਣ ਤੋਂ ਬਾਅਦ ਵੀ ਉਸ ਦਾ ਮੋਬਾਈਲ ਖੋਹ ਕੇ ਭੱਜ ਰਹੇ ਲੁਟੇਰਿਆਂ ਨਾਲ ਮੁਕਾਬਲਾ ਕੀਤਾ, ਅਤੇ ਲੁਟੇਰੇ ਨੂੰ ਵੀ ਕਾਬੂ ਕੀਤਾ, ਨੂੰ ਭਾਰਤ ਸਰਕਾਰ ਵੱਲੋਂ ਅੱਜ ਬਹਾਦਰੀ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਜਾਵੇਗਾ। 17 ਸਾਲਾ ਕੁਸੁਮ ਨੂੰ ਰਾਸ਼ਟਰੀ ਬਹਾਦਰੀ ਪੁਰਸਕਾਰ ਮਿਲੇਗਾ। ਇਸ ਵਾਰ ਕੋਰੋਨਾ ਕਾਰਨ 2020 ਤੋਂ 2022 ਤੱਕ ਤਿੰਨ ਸਾਲਾਂ ਲਈ ਬਹਾਦਰੀ ਪੁਰਸਕਾਰ ਦਿੱਤੇ ਜਾ ਰਹੇ ਹਨ। ਕੁਸੁਮ ਨੂੰ ਇੰਡੀਅਨ ਕੌਂਸਲ ਫਾਰ ਚਾਈਲਡ ਵੈਲਫੇਅਰ (ICCW) ਵੱਲੋਂ ਇਸ ਪੁਰਸਕਾਰ ਲਈ ਚੁਣਿਆ ਗਿਆ ਸੀ।
ਨਿੰਬੂ ਵਾਲੀ ਗਲੀ, ਫਤਿਹਪੁਰੀ ਮੁਹੱਲਾ, ਜਲੰਧਰ ਦੀ ਰਹਿਣ ਵਾਲੀ ਕੁਸੁਮ ਜਦੋਂ ਆਪਣੀ ਟਿਊਸ਼ਨ ਕਲਾਸ ਤੋਂ ਵਾਪਸ ਆ ਰਹੀ ਸੀ ਤਾਂ ਅਚਾਨਕ ਦੋ ਮੋਟਰਸਾਈਕਲ ਸਵਾਰ ਲੁਟੇਰਿਆਂ ਨੇ ਉਸ ਦਾ ਮੋਬਾਈਲ ਖੋਹ ਲਿਆ। ਕੋਰੋਨਾ ਮਹਾਮਾਰੀ ਦੌਰਾਨ ਇਹ ਮੋਬਾਈਲ ਉਸ ਨੂੰ ਉਸ ਦੇ ਭਰਾ ਨੇ ਆਨਲਾਈਨ ਪੜ੍ਹਾਈ ਲਈ ਦਿੱਤਾ ਸੀ। ਕੁਸੁਮ ਇੱਕ ਤਾਈਕਵਾਂਡੋ ਖਿਡਾਰਨ ਅਤੇ ਐਨਸੀਸੀ ਕੈਡੇਟ ਵੀ ਹੈ, ਬਿਨਾਂ ਕਿਸੇ ਡਰ ਦੇ ਉਸਨੇ ਲੁਟੇਰਿਆਂ ਦਾ ਸਾਹਮਣਾ ਕੀਤਾ। ਤੇਜ਼ਧਾਰ ਹਥਿਆਰਾਂ ਨਾਲ ਇੱਕ ਲੁਟੇਰੇ ਨੇ ਉਸ ‘ਤੇ ਹਮਲਾ ਕਰ ਦਿੱਤਾ ਅਤੇ ਕੁਸੁਮ ਦੇ ਗੁੱਟ ‘ਤੇ ਕੱਟ ਲੱਗ ਗਿਆ। ਪਰ ਕੁਸੁਮ ਨੇ ਹਿੰਮਤ ਨਹੀਂ ਹਾਰੀ ਅਤੇ ਉਸਨੇ ਲੁਟੇਰੇ ਨਾਲ ਲੜਾਈ ਕੀਤੀ ਅਤੇ ਉਸਨੂੰ ਕਾਬੂ ਕਰ ਲਿਆ।
ਕੁਸੁਮ ਦੇ ਪਿਤਾ ਸਾਧੂਰਾਮ ਟਾਂਡਾ ਰੋਡ ‘ਤੇ ਪੱਲੇਦਾਰੀ ਦਾ ਕੰਮ ਕਰਦੇ ਹਨ। ਕੁਸੁਮ ਦੀਆਂ ਦੋ ਭੈਣਾਂ ਅਤੇ ਇੱਕ ਭਰਾ ਹੈ। ਭਰਾ ਵੀ ਗੱਡੀ ਚਲਾਉਂਦਾ ਹੈ ਅਤੇ ਉਸ ਨੇ ਹੀ ਕੁਸੁਮ ਨੂੰ ਪੜ੍ਹਾਈ ਲਈ ਮੋਬਾਈਲ ਦਿੱਤਾ ਸੀ। ਇਸ ਤੋਂ ਪਹਿਲਾਂ ਕੁਸੁਮ ਦੀ ਬਹਾਦਰੀ ਨੂੰ ਦੇਖਦਿਆਂ ਪੰਜਾਬ ਸਰਕਾਰ ਵੀ ਉਸ ਨੂੰ ਸਨਮਾਨਿਤ ਕਰ ਚੁੱਕੀ ਹੈ। ਤਤਕਾਲੀ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਕੁਸੁਮ ਨੂੰ ਇੱਕ ਲੱਖ ਦਾ ਇਨਾਮ ਦਿੱਤਾ ਸੀ।
ਇਹ ਚੈੱਕ ਤਤਕਾਲੀ ਡੀਸੀ ਜਲੰਧਰ ਘਨਸ਼ਿਆਮ ਥੋਰੀ ਨੇ ਕੁਸੁਮ ਨੂੰ ਸੌਂਪਿਆ ਸੀ। ਇਸ ਤੋਂ ਇਲਾਵਾ ਤਤਕਾਲੀ ਪੁਲਿਸ ਕਮਿਸ਼ਨਰ ਗੁਰਪ੍ਰੀਤ ਭੁੱਲਰ ਨੇ ਵੀ ਕੁਸੁਮ ਨੂੰ 50,000 ਰੁਪਏ ਦਾ ਨਕਦ ਇਨਾਮ ਅਤੇ ਇੱਕ ਨਵਾਂ ਮੋਬਾਈਲ ਦਿੱਤਾ ਸੀ।
ਕੁਸੁਮ ਵੱਲੋਂ ਫੜਿਆ ਗਿਆ ਲੁਟੇਰਾ ਅਵਿਨਾਸ਼ ਕੁਮਾਰ ਉਰਫ਼ ਆਸ਼ੂ ਪੇਸ਼ੇਵਰ ਅਪਰਾਧੀ ਹੈ। ਉਸ ਖ਼ਿਲਾਫ਼ ਪਹਿਲਾਂ ਵੀ ਲੁੱਟ-ਖੋਹ ਦੇ ਕਈ ਮਾਮਲੇ ਦਰਜ ਹਨ। ਬਸਤੀ ਦਾਨਿਸ਼ਮੰਡਾ ਦੇ ਸ਼ਿਵਾਜੀ ਨਗਰ ਦੇ ਰਹਿਣ ਵਾਲੇ ਲੁਟੇਰੇ ਨੇ ਖੁਦ ਕਿਹਾ ਸੀ ਕਿ ਉਸਨੇ ਅਜਿਹੀ ਦਲੇਰ ਕੁੜੀ ਕਦੇ ਨਹੀਂ ਦੇਖੀ ਸੀ। ਤੇਜ਼ਧਾਰ ਹਥਿਆਰਾਂ ਨੂੰ ਦੇਖ ਕੇ ਲੋਕ ਭੱਜ ਜਾਂਦੇ ਹਨ ਪਰ ਦਾਤ ਦੇ ਨਾਲ ਸੱਟ ਲੱਗ ਜਾਣ ਦੇ ਬਾਵਜੂਦ ਕੁਸੁਮ ਲੜਦੀ ਰਹੀ।
