ਚੇਨਈ, 18 ਮਈ 2024 – ਇੰਡੀਅਨ ਪ੍ਰੀਮੀਅਰ ਲੀਗ (IPL 2024) ਦੇ ਗਰੁੱਪ ਪੜਾਅ ਦੇ 67 ਮੈਚ ਖਤਮ ਹੋ ਗਏ ਹਨ। ਸ਼ੁੱਕਰਵਾਰ ਨੂੰ ਲਖਨਊ ਸੁਪਰ ਜਾਇੰਟਸ ਨੇ ਮੁੰਬਈ ਇੰਡੀਅਨਜ਼ ਨੂੰ 18 ਦੌੜਾਂ ਨਾਲ ਹਰਾਇਆ। ਇਸ ਨਤੀਜੇ ਵਿੱਚ ਲਖਨਊ 14 ਅੰਕਾਂ ਨਾਲ ਸਮਾਪਤ ਹੋਣ ਦੇ ਬਾਵਜੂਦ ਪਲੇਆਫ ਵਿੱਚ ਥਾਂ ਨਹੀਂ ਬਣਾ ਸਕਿਆ। ਟੀਮ ਨੇ 14 ਮੈਚਾਂ ਵਿੱਚ 14 ਅੰਕ ਹਾਸਲ ਕੀਤੇ, ਪਰ ਨੈੱਟ ਰਨ ਰੇਟ -0.667 ਸੀ, ਜੋ ਕਿ 14 ਅੰਕਾਂ ਨਾਲ ਦੂਜੀਆਂ ਟੀਮਾਂ ਨਾਲੋਂ ਬਿਹਤਰ ਨਹੀਂ ਸੀ। ਇਸ ਹਾਰ ਤੋਂ ਬਾਅਦ ਮੁੰਬਈ 8 ਅੰਕਾਂ ਨਾਲ ਸਭ ਤੋਂ ਹੇਠਲੇ ਸਥਾਨ ‘ਤੇ ਰਹੀ।
ਅੱਜ ਦੇ ਮੈਚ ਵਿੱਚ CSK ਅਤੇ RCB ਕੋਲ ਪਲੇਆਫ ਵਿੱਚ ਪਹੁੰਚਣ ਦਾ ਮੌਕਾ ਹੈ। ਫਿਲਹਾਲ CSK ਦੇ 14 ਅੰਕ ਹਨ ਅਤੇ RCB ਦੇ 12 ਅੰਕ ਹਨ।
ਅੱਜ ਚੇਨਈ ਦਾ ਸਾਹਮਣਾ ਬੈਂਗਲੁਰੂ ਨਾਲ ਹੈ। ਜੇਕਰ ਟੀਮ ਜਿੱਤ ਜਾਂਦੀ ਹੈ ਤਾਂ ਉਹ 16 ਅੰਕਾਂ ਨਾਲ ਪਲੇਆਫ ਲਈ ਕੁਆਲੀਫਾਈ ਕਰ ਲਵੇਗੀ ਅਤੇ ਨੰਬਰ-2 ‘ਤੇ ਵੀ ਪਹੁੰਚ ਜਾਵੇਗੀ। ਰਾਜਸਥਾਨ ਵੀ 16 ਅੰਕਾਂ ਨਾਲ ਦੂਜੇ ਨੰਬਰ ‘ਤੇ ਬਰਕਰਾਰ ਹੈ। ਟੀਮ ਦਾ ਇੱਕ ਮੈਚ ਬਾਕੀ ਹੈ। ਜੇਕਰ ਰਾਜਸਥਾਨ ਆਪਣਾ ਅਗਲਾ ਮੈਚ ਕੇਕੇਆਰ ਤੋਂ ਹਾਰਦਾ ਹੈ ਤਾਂ ਚੇਨਈ ਦੂਜੇ ਸਥਾਨ ‘ਤੇ ਰਹੇਗਾ। ਉਸ ਨੂੰ ਫਾਈਨਲ ਵਿੱਚ ਜਾਣ ਦੇ ਦੋ ਮੌਕੇ ਮਿਲਣਗੇ। ਹਾਲਾਂਕਿ ਜੇਕਰ ਰਾਜਸਥਾਨ ਜਿੱਤਦਾ ਹੈ ਤਾਂ ਚੇਨਈ ਚੌਥੇ ਸਥਾਨ ‘ਤੇ ਆ ਜਾਵੇਗੀ। ਉਸ ਨੂੰ ਫਾਈਨਲ ਵਿੱਚ ਪਹੁੰਚਣ ਲਈ ਲਗਾਤਾਰ 2 ਮੈਚ ਖੇਡਣੇ ਹੋਣਗੇ।
ਰਾਇਲ ਚੈਲੰਜਰਜ਼ ਬੰਗਲੌਰ ਦੇ ਲੀਗ ਪੜਾਅ ਦੇ ਆਖਰੀ ਲੀਗ ਮੈਚ ਤੋਂ ਪਹਿਲਾਂ 12 ਅੰਕ ਹਨ। ਜੇਕਰ RCB ਟੀਮ ਚੇਨਈ ਨੂੰ ਹਰਾਉਂਦੀ ਹੈ ਤਾਂ ਵੀ ਟਾਪ-4 ‘ਚ ਪਹੁੰਚਣ ਦੀ ਗਾਰੰਟੀ ਨਹੀਂ ਹੈ। ਜੇਕਰ ਸੀਐਸਕੇ ਪਹਿਲਾਂ ਬੱਲੇਬਾਜ਼ੀ ਕਰਦਾ ਹੈ ਅਤੇ 200 ਦੌੜਾਂ ਬਣਾਉਂਦਾ ਹੈ ਤਾਂ ਆਰਸੀਬੀ ਨੂੰ ਘੱਟੋ-ਘੱਟ 18 ਦੌੜਾਂ ਨਾਲ ਜਿੱਤਣਾ ਪਵੇਗਾ। ਜੇਕਰ RCB 17 ਦੌੜਾਂ ਜਾਂ ਇਸ ਤੋਂ ਘੱਟ ਦੌੜਾਂ ਨਾਲ ਜਿੱਤਦਾ ਹੈ, ਤਾਂ ਘੱਟ ਨੈੱਟ ਰਨ ਰੇਟ ਦੇ ਆਧਾਰ ‘ਤੇ ਬਾਹਰ ਹੋ ਜਾਵੇਗਾ।
ਜੇਕਰ ਆਰਸੀਬੀ 200 ਤੋਂ ਵੱਧ ਦੌੜਾਂ ਦੇ ਸਕੋਰ ਦਾ ਪਿੱਛਾ ਕਰਦੀ ਹੈ ਤਾਂ ਟੀਮ ਨੂੰ 11 ਗੇਂਦਾਂ ਬਾਕੀ ਰਹਿ ਕੇ ਟੀਚਾ ਹਾਸਲ ਕਰਨਾ ਹੋਵੇਗਾ। ਹਾਲਾਂਕਿ, ਜੇਕਰ ਮੈਚ ਮੀਂਹ ਕਾਰਨ ਰੱਦ ਹੋ ਜਾਂਦਾ ਹੈ, ਤਾਂ CSK ਕੁਆਲੀਫਾਈ ਕਰ ਲਵੇਗਾ।
