- ਤੀਜੇ ਅਤੇ ਆਖਰੀ ਟੈਸਟ ਮੈਚ ‘ਚ ਇੰਗਲੈਂਡ ਨੇ 8 ਵਿਕਟਾਂ ਨਾਲ ਜਿੱਤ ਕੀਤੀ ਦਰਜ
ਕਰਾਚੀ, 20 ਦਸੰਬਰ 2022 – ਇੰਗਲੈਂਡ ਨੇ ਕਰਾਚੀ ਟੈਸਟ ਮੈਚ ‘ਚ ਪਾਕਿਸਤਾਨ ਨੂੰ ਹਰਾ ਕੇ ਇਤਿਹਾਸ ਰਚ ਦਿੱਤਾ ਹੈ। ਪਾਕਿਸਤਾਨ ‘ਚ ਖੇਡੀ ਗਈ 3 ਮੈਚਾਂ ਦੀ ਟੈਸਟ ਸੀਰੀਜ਼ ‘ਚ ਇੰਗਲੈਂਡ ਨੇ 3-0 ਨਾਲ ਜਿੱਤ ਦਰਜ ਕਰਕੇ ਪਾਕਿਸਤਾਨ ਦਾ ਸਫ਼ਾਇਆ ਕਰ ਦਿੱਤਾ ਹੈ। ਸੀਰੀਜ਼ ਦੇ ਤੀਜੇ ਅਤੇ ਆਖਰੀ ਟੈਸਟ ‘ਚ ਇੰਗਲੈਂਡ ਨੇ 8 ਵਿਕਟਾਂ ਨਾਲ ਜਿੱਤ ਦਰਜ ਕੀਤੀ।
ਇੰਗਲੈਂਡ ਦੀ ਟੀਮ ਪਾਕਿਸਤਾਨ ਖਿਲਾਫ ਪੂਰੀ ਤਰ੍ਹਾਂ ਹਮਲਾਵਰ ਹੋ ਕੇ ਖੇਡੀ। ਇਸ ਟੈਸਟ ਮੈਚ ਵਿੱਚ ਪਾਕਿਸਤਾਨ ਨੇ ਪਹਿਲੀ ਪਾਰੀ ਵਿੱਚ 306 ਦੌੜਾਂ ਬਣਾਈਆਂ ਸਨ ਜਦਕਿ ਇੰਗਲੈਂਡ ਨੇ ਪਹਿਲੀ ਪਾਰੀ ਵਿੱਚ 354 ਦੌੜਾਂ ਬਣਾਈਆਂ ਸਨ।
ਦੂਜੀ ਪਾਰੀ ‘ਚ ਪਾਕਿਸਤਾਨ ਦੀ ਟੀਮ 216 ਦੌੜਾਂ ‘ਤੇ ਆਲ ਆਊਟ ਹੋ ਗਈ ਅਤੇ ਫਿਰ ਬਾਅਦ ‘ਚ ਇੰਗਲੈਂਡ ਨੇ 170 ਦੌੜਾਂ ਦਾ ਟੀਚਾ ਸਿਰਫ 2 ਵਿਕਟਾਂ ਗੁਆ ਕੇ ਹਾਸਲ ਕਰ ਲਿਆ ਅਤੇ ਸੀਰੀਜ਼ ‘ਚ ਕਲੀਨ ਸਵੀਪ ਕਰ ਲਿਆ। 18 ਸਾਲਾ ਰੇਹਾਨ ਅਹਿਮਦ ਕਰਾਚੀ ਟੈਸਟ ‘ਚ ਇੰਗਲੈਂਡ ਲਈ ਹੀਰੋ ਸਾਬਤ ਹੋਇਆ, ਜਿਸ ਨੇ ਆਪਣੇ ਟੈਸਟ ਡੈਬਿਊ ‘ਤੇ ਪੰਜ ਵਿਕਟਾਂ ਲਈਆਂ।
ਰੇਹਾਨ ਅਹਿਮਦ ਟੈਸਟ ਕ੍ਰਿਕਟ ‘ਚ ਆਪਣੇ ਡੈਬਿਊ ‘ਤੇ 5 ਵਿਕਟਾਂ ਲੈਣ ਵਾਲੇ ਸਭ ਤੋਂ ਘੱਟ ਉਮਰ ਦੇ ਖਿਡਾਰੀ ਵੀ ਬਣ ਗਏ ਹਨ, ਉਨ੍ਹਾਂ ਨੇ ਇਹ ਕਾਰਨਾਮਾ 18 ਸਾਲ 128 ਦਿਨ ਦੀ ਉਮਰ ‘ਚ ਕੀਤਾ ਸੀ। ਰੇਹਾਨ ਅਹਿਮਦ ਨੇ ਪਹਿਲੀ ਪਾਰੀ ‘ਚ 2, ਦੂਜੀ ਪਾਰੀ ‘ਚ 5 ਵਿਕਟਾਂ ਲਈਆਂ।
ਇੰਗਲੈਂਡ-ਪਾਕਿਸਤਾਨ ਟੈਸਟ ਸੀਰੀਜ਼
• ਪਹਿਲਾ ਟੈਸਟ (ਰਾਵਲਪਿੰਡੀ)- ਇੰਗਲੈਂਡ 74 ਦੌੜਾਂ ਨਾਲ ਜਿੱਤਿਆ
• ਦੂਜਾ ਟੈਸਟ (ਮੁਲਤਾਨ)- ਇੰਗਲੈਂਡ 26 ਦੌੜਾਂ ਨਾਲ ਜਿੱਤਿਆ
• ਤੀਜਾ ਟੈਸਟ (ਕਰਾਚੀ)- ਇੰਗਲੈਂਡ 8 ਵਿਕਟਾਂ ਨਾਲ ਜਿੱਤਿਆ
ਇਹ ਹਾਰ ਪਾਕਿਸਤਾਨ ਲਈ ਬਹੁਤ ਬੁਰੀ ਹੈ, ਕਿਉਂਕਿ ਟੈਸਟ ਕ੍ਰਿਕਟ ਦੇ ਇਤਿਹਾਸ ਵਿੱਚ ਪਹਿਲੀ ਵਾਰ ਪਾਕਿਸਤਾਨ ਨੂੰ ਘਰ ਵਿੱਚ ਕਲੀਨ ਸਵੀਪ ਦਾ ਸਾਹਮਣਾ ਕਰਨਾ ਪਿਆ ਹੈ। ਇਸ ਦੇ ਨਾਲ ਹੀ ਉਹ ਘਰੇਲੂ ਮੈਦਾਨ ‘ਤੇ ਲਗਾਤਾਰ ਦੂਜੀ ਸੀਰੀਜ਼ ਹਾਰ ਗਿਆ ਹੈ, ਇਸ ਤੋਂ ਪਹਿਲਾਂ ਇੰਗਲੈਂਡ, ਆਸਟ੍ਰੇਲੀਆ ਨੇ ਵੀ ਉਸ ਨੂੰ ਘਰ ‘ਚ 1-0 ਨਾਲ ਹਰਾਇਆ ਸੀ। ਪਾਕਿਸਤਾਨ ਨੇ ਪਹਿਲੀ ਵਾਰ 1954/55 ਵਿੱਚ ਘਰ ਵਿੱਚ ਟੈਸਟ ਸੀਰੀਜ਼ ਖੇਡੀ ਸੀ, ਜਦੋਂ ਭਾਰਤ ਉੱਥੇ ਗਿਆ ਸੀ। ਪੰਜ ਟੈਸਟਾਂ ਦੀ ਇਹ ਲੜੀ 0-0 ਨਾਲ ਡਰਾਅ ਰਹੀ ਸੀ।
ਇੰਗਲੈਂਡ ਨੇ ਲਗਭਗ 22 ਸਾਲਾਂ ਬਾਅਦ ਪਾਕਿਸਤਾਨ ‘ਚ ਟੈਸਟ ਸੀਰੀਜ਼ ਜਿੱਤੀ ਹੈ। ਇਸ ਤੋਂ ਪਹਿਲਾਂ ਜਦੋਂ ਇੰਗਲੈਂਡ ਨੇ 2000/01 ‘ਚ ਪਾਕਿਸਤਾਨ ਦਾ ਦੌਰਾ ਕੀਤਾ ਸੀ ਤਾਂ ਉਸ ਨੇ ਸੀਰੀਜ਼ 1-0 ਨਾਲ ਜਿੱਤੀ ਸੀ। ਪਾਕਿਸਤਾਨ ਦੀ ਧਰਤੀ ‘ਤੇ ਇੰਗਲੈਂਡ ਦੀ ਇਹ ਕੁੱਲ ਤੀਜੀ ਟੈਸਟ ਸੀਰੀਜ਼ ਜਿੱਤ ਹੈ।
