ਨਵੀਂ ਦਿੱਲੀ, 22 ਦਸੰਬਰ 2024 – ਭਾਰਤੀ ਟੀਮ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਅੰਡਰ-19 ਮਹਿਲਾ ਏਸ਼ੀਆ ਕੱਪ 2024 ਦਾ ਖਿਤਾਬ ਜਿੱਤ ਲਿਆ ਹੈ। ਐਤਵਾਰ (22 ਦਸੰਬਰ) ਨੂੰ ਕੁਆਲਾਲੰਪੁਰ ਦੇ ਬਿਊਮਾਸ ਓਵਲ ਵਿੱਚ ਖੇਡੇ ਗਏ ਫਾਈਨਲ ਮੈਚ ਵਿੱਚ ਭਾਰਤ ਨੇ ਬੰਗਲਾਦੇਸ਼ ਨੂੰ 41 ਦੌੜਾਂ ਨਾਲ ਹਰਾਇਆ। ਫਾਈਨਲ ਮੈਚ ‘ਚ ਬੰਗਲਾਦੇਸ਼ ਦੀ ਟੀਮ ਨੂੰ ਜਿੱਤ ਲਈ 118 ਦੌੜਾਂ ਦਾ ਟੀਚਾ ਮਿਲਿਆ ਸੀ, ਜਿਸ ਦਾ ਉਹ ਪਿੱਛਾ ਨਹੀਂ ਕਰ ਸਕੀ। ਬੰਗਲਾਦੇਸ਼ ਦੀ ਟੀਮ ਸਿਰਫ਼ 76 ਦੌੜਾਂ ‘ਤੇ ਹੀ ਢਹਿ ਢੇਰੀ ਹੋ ਗਈ। ਇਹ ਟੂਰਨਾਮੈਂਟ ਪਹਿਲੀ ਵਾਰ ਕਰਵਾਇਆ ਗਿਆ ਹੈ। ਅਜਿਹੇ ‘ਚ ਭਾਰਤੀ ਟੀਮ ਨੇ ਖਿਤਾਬ ਜਿੱਤ ਕੇ ਇਤਿਹਾਸਕ ਪ੍ਰਾਪਤੀ ਹਾਸਲ ਕੀਤੀ।
ਟਾਸ ਹਾਰ ਕੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਭਾਰਤੀ ਟੀਮ ਨੇ 7 ਵਿਕਟਾਂ ‘ਤੇ 117 ਦੌੜਾਂ ਬਣਾਈਆਂ। ਭਾਰਤ ਲਈ ਸਲਾਮੀ ਬੱਲੇਬਾਜ਼ ਗੋਂਗਾੜੀ ਤ੍ਰਿਸ਼ਾ ਨੇ 47 ਗੇਂਦਾਂ ਵਿੱਚ ਸਭ ਤੋਂ ਵੱਧ 52 ਦੌੜਾਂ ਬਣਾਈਆਂ। ਮਿਥਿਲਾ ਵਿਨੋਦ (17 ਦੌੜਾਂ), ਕਪਤਾਨ ਨਿੱਕੀ ਪ੍ਰਸਾਦ (12 ਦੌੜਾਂ) ਅਤੇ ਆਯੂਸ਼ੀ ਸ਼ੁਕਲਾ (10 ਦੌੜਾਂ) ਵੀ ਦੋਹਰੇ ਅੰਕ ਤੱਕ ਪਹੁੰਚਣ ਵਿੱਚ ਕਾਮਯਾਬ ਰਹੀਆਂ। ਬੰਗਲਾਦੇਸ਼ ਲਈ ਫਰਜ਼ਾਨਾ ਇਸਮੀਨ ਨੇ ਸਭ ਤੋਂ ਵੱਧ ਚਾਰ ਵਿਕਟਾਂ ਲਈਆਂ। ਜਦੋਂ ਕਿ ਨਿਸ਼ੀਤਾ ਅਖ਼ਤਰ ਅਤੇ ਨਿਸ਼ੀ ਨੂੰ ਦੋ ਅਤੇ ਹਬੀਬਾ ਇਸਲਾਮ ਨੂੰ ਇੱਕ ਸਫਲਤਾ ਮਿਲੀ।
ਜਵਾਬ ‘ਚ ਬੰਗਲਾਦੇਸ਼ ਦੀ ਟੀਮ 18.3 ਓਵਰਾਂ ‘ਚ ਸਿਰਫ 76 ਦੌੜਾਂ ‘ਤੇ ਹੀ ਢੇਰ ਹੋ ਗਈ। ਵਿਕਟਕੀਪਰ ਜ਼ੁਰੀਆ ਫਿਰਦੌਸ ਨੇ 30 ਗੇਂਦਾਂ ਵਿੱਚ ਸਭ ਤੋਂ ਵੱਧ 22 ਦੌੜਾਂ ਬਣਾਈਆਂ, ਜਿਸ ਵਿੱਚ ਤਿੰਨ ਚੌਕੇ ਸ਼ਾਮਲ ਸਨ। ਜਦਕਿ ਸਲਾਮੀ ਬੱਲੇਬਾਜ਼ ਫਹੋਮਿਦਾ ਚੋਆ ਨੇ 18 ਦੌੜਾਂ ਬਣਾਈਆਂ। ਇਨ੍ਹਾਂ ਦੋਵਾਂ ਤੋਂ ਇਲਾਵਾ ਹੋਰ ਬੰਗਲਾਦੇਸ਼ੀ ਬੱਲੇਬਾਜ਼ ਦੋਹਰੇ ਅੰਕ ਤੱਕ ਨਹੀਂ ਪਹੁੰਚ ਸਕੇ। ਭਾਰਤੀ ਟੀਮ ਲਈ ਲੈਫਟ ਆਰਮ ਸਪਿਨਰ ਆਯੂਸ਼ੀ ਸ਼ੁਕਲਾ ਨੇ ਸਭ ਤੋਂ ਵੱਧ ਤਿੰਨ ਵਿਕਟਾਂ ਲਈਆਂ। ਸਪਿਨ ਗੇਂਦਬਾਜ਼ਾਂ ਸੋਨਮ ਯਾਦਵ ਅਤੇ ਪਾਰੁਣਿਕਾ ਸਿਸੋਦੀਆ ਨੂੰ ਵੀ ਦੋ-ਦੋ ਸਫ਼ਲਤਾ ਮਿਲੀ। ਵੀਜੇ ਜੋਸ਼ੀਤਾ ਨੂੰ ਵੀ ਇੱਕ ਵਿਕਟ ਮਿਲੀ।
