ਨਵੀਂ ਦਿੱਲੀ, 6 ਅਕਤੂਬਰ 2025 – ਪਿਛਲੇ ਹਫ਼ਤੇ ਇੰਡੋਨੇਸ਼ੀਆ ਵਿੱਚ ਇੱਕ ਇਸਲਾਮੀ ਬੋਰਡਿੰਗ ਸਕੂਲ ਢਹਿ ਜਾਣ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ 49 ਹੋ ਗਈ ਹੈ। ਬਚਾਅ ਕਰਮਚਾਰੀਆਂ ਨੇ ਸ਼ਨੀਵਾਰ ਅਤੇ ਐਤਵਾਰ ਨੂੰ ਮਲਬੇ ਵਿੱਚੋਂ 35 ਹੋਰ ਲਾਸ਼ਾਂ ਕੱਢੀਆਂ। ਚੌਦਾਂ ਵਿਦਿਆਰਥੀ ਅਜੇ ਵੀ ਲਾਪਤਾ ਹਨ।
ਇਹ ਹਾਦਸਾ 29 ਸਤੰਬਰ ਨੂੰ ਜਾਵਾ ਟਾਪੂ ਦੇ ਸਿਦੋਆਰਜੋ ਵਿੱਚ 100 ਸਾਲ ਪੁਰਾਣੇ ਸਕੂਲ ਵਿੱਚ ਵਾਪਰਿਆ। ਇਮਾਰਤ ਢਹਿਣ ਵੇਲੇ ਸੈਂਕੜੇ ਵਿਦਿਆਰਥੀ ਅੰਦਰ ਸਨ। ਜ਼ਿਆਦਾਤਰ ਵਿਦਿਆਰਥੀ 12 ਤੋਂ 19 ਸਾਲ ਦੇ ਵਿਚਕਾਰ ਸਨ। ਇਸ ਹਾਦਸੇ ‘ਚੋਂ ਸਿਰਫ਼ ਇੱਕ ਵਿਦਿਆਰਥੀ ਬਿਨਾਂ ਕਿਸੇ ਸੱਟ ਦੇ ਬਚਿਆ।
97 ਵਿਦਿਆਰਥੀਆਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਅਤੇ ਉਨ੍ਹਾਂ ਨੂੰ ਇਲਾਜ ਤੋਂ ਬਾਅਦ ਛੁੱਟੀ ਦੇ ਦਿੱਤੀ ਗਈ, ਜਦੋਂ ਕਿ ਛੇ ਗੰਭੀਰ ਜ਼ਖਮੀ ਹਨ ਅਤੇ ਹਸਪਤਾਲ ਵਿੱਚ ਦਾਖਲ ਹਨ। ਪੁਲਿਸ ਦੇ ਅਨੁਸਾਰ, ਸਕੂਲ ਦੀਆਂ ਦੋ ਮੰਜ਼ਿਲਾਂ ਬਿਨਾਂ ਇਜਾਜ਼ਤ ਦੇ ਬਣਾਈਆਂ ਜਾ ਰਹੀਆਂ ਸਨ, ਜਿਸ ਨਾਲ ਢਾਂਚਾ ਕਮਜ਼ੋਰ ਹੋ ਗਿਆ ਅਤੇ ਢਹਿ ਗਿਆ।
ਨਿਰਮਾਣ ਮਾਹਰ ਮੁਜੀ ਇਰਮਾਵਨ ਨੇ ਦੱਸਿਆ ਕਿ ਇਮਾਰਤ ਦਾ ਢਾਂਚਾ ਕੰਕਰੀਟ ਪਾਉਣ ਦੀ ਪ੍ਰਕਿਰਿਆ ਦੇ ਭਾਰ ਨੂੰ ਸਹਿਣ ਨਹੀਂ ਕਰ ਸਕਿਆ ਕਿਉਂਕਿ ਉਸਾਰੀ ਦੇ ਮਿਆਰਾਂ ਦੀ ਪਾਲਣਾ ਨਹੀਂ ਕੀਤੀ ਗਈ ਸੀ। ਉਨ੍ਹਾਂ ਇਹ ਵੀ ਕਿਹਾ ਕਿ ਨਿਰਮਾਣ ਦੌਰਾਨ ਵਿਦਿਆਰਥੀਆਂ ਨੂੰ ਇਮਾਰਤ ਵਿੱਚ ਨਹੀਂ ਹੋਣਾ ਚਾਹੀਦਾ ਸੀ।
ਸਿਦੋਆਰਜੋ ਜ਼ਿਲ੍ਹਾ ਮੁਖੀ ਸੁਬਾਂਧੀ ਨੇ ਵੀ ਪੁਸ਼ਟੀ ਕੀਤੀ ਕਿ ਸਕੂਲ ਪ੍ਰਸ਼ਾਸਨ ਨੇ ਉਸਾਰੀ ਲਈ ਕੋਈ ਇਜਾਜ਼ਤ ਨਹੀਂ ਲਈ ਸੀ। ਇਸ ਸਮੇਂ ਸਕੂਲ ਪ੍ਰਸ਼ਾਸਨ ਵੱਲੋਂ ਕੋਈ ਅਧਿਕਾਰਤ ਬਿਆਨ ਨਹੀਂ ਆਇਆ ਹੈ।
