ਨਵੀਂ ਦਿੱਲੀ, 27 ਸਤੰਬਰ 2025 – ਬੋਲੀਵੀਆਈ ਸੰਗੀਤ ਜਗਤ ਲਈ ਇਕ ਵੱਡੀ ਦੁਖਦਾਈ ਖ਼ਬਰ ਸਾਹਮਣੇ ਆਈ ਹੈ। ਪੇਰੂ ਦੇ ਮੋਕੇਗੁਆ ਅਤੇ ਪੁਨੋ ਦਰਮਿਆਨ ਨੈਸ਼ਨਲ ਹਾਈਵੇ ’ਤੇ ਇੱਕ ਭਿਆਨਕ ਸੜਕ ਹਾਦਸੇ ਵਿੱਚ ਘੱਟੋ-ਘੱਟ 14 ਲੋਕਾਂ ਦੀ ਮੌਤ ਹੋ ਗਈ। ਮਾਰੇ ਗਏ ਲੋਕਾਂ ਵਿੱਚ ਮਸ਼ਹੂਰ ਗਾਇਕਾ ਫ਼ੇਲੀਸਾ ਇਸਾਬੇਲ ਮੇਂਡੋਜ਼ਾ, ਜੋ ਕਲਾਤਮਕ ਤੌਰ ’ਤੇ ਮੁਨੈਕੀਤਾ ਫ਼ਲੋਰ ਦੇ ਨਾਮ ਨਾਲ ਜਾਣੀ ਜਾਂਦੀ ਸੀ, ਅਤੇ ਉਸਦੀ ਮਾਂ ਇਸਾਬੇਲ ਅਰੂਕਿਪਾ ਲੋਜ਼ਾ ਵੀ ਸ਼ਾਮਲ ਹਨ। ਉਹ ਆਪਣੇ ਸਾਥੀ ਸੰਗੀਤਕਾਰਾਂ ਨਾਲ ਪੇਰੂ ਵਿੱਚ ਇੱਕ ਪ੍ਰੋਗਰਾਮ ਲਈ ਜਾ ਰਹੇ ਸਨ।
ਗਾਇਕਾ ਦੀ ਭੈਣ ਨੇ ਮੀਡੀਆ ਨਾਲ ਗੱਲਬਾਤ ਦੌਰਾਨ ਪੁਸ਼ਟੀ ਕੀਤੀ ਕਿ ਉਸਦੀ ਭੈਣ ਅਤੇ ਮਾਂ ਦੋਵੇਂ ਹੀ ਹਾਦਸੇ ਵਿੱਚ ਮਾਰੇ ਗਏ ਹਨ। ਉਸਨੇ ਅਧਿਕਾਰੀਆਂ ਨੂੰ ਅਪੀਲ ਕੀਤੀ ਕਿ ਉਹਨਾਂ ਦੀਆਂ ਲਾਸ਼ਾਂ ਨੂੰ ਬੋਲੀਵੀਆ ਵਾਪਸ ਲਿਆਂਦਾ ਜਾਵੇ। ਉਸਨੇ ਦੱਸਿਆ ਕਿ ਆਮ ਤੌਰ ’ਤੇ ਉਹ ਆਪਣੀ ਭੈਣ ਦੇ ਨਾਲ ਯਾਤਰਾ ’ਤੇ ਜਾਂਦੀ ਸੀ, ਪਰ ਇਸ ਵਾਰ ਉਸਦੀ ਮਾਂ ਨਾਲ ਗਈ ਸੀ। ਸਿਰਫ 23 ਸਾਲ ਦੀ ਉਮਰ ਵਿੱਚ ਹੀ ਮੁਨੈਕੀਤਾ ਫ਼ਲੋਰ ਨੇ ਸੰਗੀਤ ਜਗਤ ਵਿੱਚ ਖਾਸ ਨਾਮ ਕਮਾਇਆ ਸੀ। ਉਹ ਯੂਨੀਵਰਸਿਟੀ ਦੀ ਪੜ੍ਹਾਈ ਪੂਰੀ ਕਰਨ ਵਾਲੀ ਸੀ ਅਤੇ ਆਪਣੇ ਖਰਚੇ ਪੂਰੇ ਕਰਨ ਲਈ ਵੱਧ ਪ੍ਰੋਗਰਾਮ ਕਰ ਰਹੀ ਸੀ। ਉਸਦੀ ਫੇਸਬੁੱਕ ਪੇਜ ’ਤੇ ਬੋਲੀਵੀਆ ਦੇ ਕਈ ਸ਼ਹਿਰਾਂ ਵਿੱਚ ਹੋਣ ਵਾਲੇ ਉਸਦੇ ਪ੍ਰੋਗਰਾਮਾਂ ਦੇ ਪੋਸਟਰ ਹਨ।
ਇਸ ਹਾਦਸੇ ਵਿੱਚ ਗਰੁੱਪ ਦੀ ਮੁੱਖ ਗਾਇਕਾ ਲੌਰਾ ਮਮਾਨੀ ਅਪਾਜ਼ਾ (26) ਅਤੇ ਸਟੇਜ ਮੈਨੇਜਰ ਐਲੈਕਸ ਲਿਓਨ ਟਿਕੋਨਾ ਕੋਈਲਾ ਦੀ ਵੀ ਮੌਤ ਹੋ ਗਈ। ਇਸ ਤੋਂ ਇਲਾਵਾ ਡੋਮਿੰਗੋ ਕੀਰੋ ਕਲਸੀਨਾ (54) ਅਤੇ ਯੋਨੀ ਐਲੈਕਸ ਮਮਾਨੀ ਚੇਕਾਸਾਕਾ (22) ਵੀ ਮਾਰੇ ਗਏ ਲੋਕਾਂ ਵਿੱਚ ਸ਼ਾਮਲ ਹਨ। ਅਧਿਕਾਰੀਆਂ ਨੇ ਅਜੇ ਤੱਕ ਹੋਰ ਮ੍ਰਿਤਕਾਂ ਬਾਰੇ ਜਾਣਕਾਰੀ ਨਹੀਂ ਦਿੱਤੀ ਹੈ।
