- ਮੰਗਲਵਾਰ ਸਵੇਰ ਤੋਂ 6 ਸਕੂਲੀ ਬੱਚੇ ਅਤੇ 2 ਅਧਿਆਪਕ ਫਸੇ ਹੋਏ ਸਨ,
- ਸਾਰੇ ਲੋਕ ਰੋਜ਼ਾਨਾ ਦੀ ਤਰ੍ਹਾਂ ਸਕੂਲ ਜਾ ਰਹੇ ਸਨ
ਨਵੀਂ ਦਿੱਲੀ, 23 ਅਗਸਤ 2023 – ਪਾਕਿਸਤਾਨ ‘ਚ 900 ਫੁੱਟ ਦੀ ਉਚਾਈ ‘ਤੇ ਕੇਬਲ ਕਾਰ ‘ਚ ਫਸੇ ਸਾਰੇ ਅੱਠ ਲੋਕਾਂ ਨੂੰ ਬਚਾ ਲਿਆ ਗਿਆ ਹੈ। ਬਚਾਅ ਕਾਰਜ 14 ਘੰਟੇ ਤੱਕ ਚੱਲਿਆ। ਕੇਬਲ ਕਾਰ ਵਿੱਚ ਛੇ ਸਕੂਲੀ ਬੱਚੇ ਅਤੇ ਦੋ ਅਧਿਆਪਕ ਫਸ ਗਏ ਸਨ। ਇਹ ਸਾਰੇ ਲੋਕ ਰੋਜ਼ਾਨਾ ਦੀ ਤਰ੍ਹਾਂ ਸਕੂਲ ਜਾ ਰਹੇ ਸਨ। ਹੇਠਾਂ ਇੱਕ ਡੂੰਘੀ ਨਦੀ ਸੀ, ਜੋ ਬਾਰਿਸ਼ ਕਾਰਨ ਆਪਣੇ ਪੂਰੇ ਜੋਸ਼ ‘ਚ ਵਹਿ ਰਹੀ ਹੈ।
ਇਨ੍ਹਾਂ ਵਿੱਚੋਂ ਦੋ ਲੋਕਾਂ ਨੂੰ ਮੰਗਲਵਾਰ ਦੇਰ ਰਾਤ ਬਚਾ ਲਿਆ ਗਿਆ ਸੀ। ਪਰ ਭਾਰੀ ਬਰਸਾਤ ਅਤੇ ਹਨੇਰੇ ਕਾਰਨ ਰਾਤ ਨੂੰ ਬਚਾਉਣ ਦਾ ਕਾਰਜ ਰੋਕ ਦਿੱਤਾ ਗਿਆ ਸੀ। ਬਚਾਅ ਕਾਰਜ ਬੁੱਧਵਾਰ ਤੜਕੇ ਮੁੜ ਸ਼ੁਰੂ ਕੀਤਾ ਗਿਆ। ਪਾਕਿਸਤਾਨ ਦੇ ਕਾਰਜਵਾਹਕ ਪ੍ਰਧਾਨ ਮੰਤਰੀ ਅਨਵਰ-ਉਲ-ਹੱਕ ਕੱਕੜ ਨੇ ਖੈਬਰ ਸਰਕਾਰ ਅਤੇ ਫੌਜ ਨੂੰ ਰਾਹਤ ਕਾਰਜ ਜਲਦੀ ਕਰਨ ਦੇ ਹੁਕਮ ਦਿੱਤੇ ਹਨ।
‘ਜੀਓ ਨਿਊਜ਼’ ਮੁਤਾਬਕ- ਇਕ ਹੋਰ ਛੋਟੀ ਕਾਰ ਕੇਬਲ ਨਾਲ ਜੁੜੀ ਹੋਈ ਸੀ, ਜਿਸ ‘ਤੇ ਮੰਗਲਵਾਰ ਸਵੇਰ ਤੋਂ ਕਾਰ ਫਸੀ ਹੋਈ ਸੀ। ਇਸ ਕਾਰਨ ਫਸੇ ਲੋਕਾਂ ਲਈ ਭੋਜਨ ਅਤੇ ਪਾਣੀ ਭੇਜਿਆ ਗਿਆ। ਇਸ ਤੋਂ ਬਾਅਦ ਦੋਨਾਂ ਲੋਕਾਂ ਨੂੰ ਇੱਕ-ਇੱਕ ਕਰਕੇ ਦੋਵਾਂ ਕੇਬਲਾਂ ਨੂੰ ਬਹੁਤ ਨੇੜੇ ਲਿਆ ਕੇ ਬਾਹਰ ਕੱਢਿਆ ਗਿਆ। ਹਾਲਾਂਕਿ, ਮਾਹਰਾਂ ਨੇ ਇਸ ਨੂੰ ਬਹੁਤ ਖਤਰਨਾਕ ਅਤੇ ਉੱਚ ਜੋਖਮ ਵਾਲਾ ਤਰੀਕਾ ਦੱਸਿਆ ਹੈ।
ਇਸ ਦਾ ਕਾਰਨ ਇਹ ਹੈ ਕਿ ਇਹ ਕੇਬਲ ਪਹਿਲਾਂ ਹੀ ਖਰਾਬ ਹੈ ਅਤੇ ਜੇਕਰ ਇਸ ‘ਤੇ ਹੋਰ ਲੋਡ ਪਾ ਦਿੱਤਾ ਗਿਆ ਤਾਂ ਬਾਕੀ ਤਾਰਾਂ ਵੀ ਟੁੱਟ ਸਕਦੀਆਂ ਸਨ। ਬਚਾਅ ਦਲ ਨੇ ਕਿਹਾ ਕਿ ਬਾਕੀ ਸਾਰੇ ਤਰੀਕੇ ਹੁਣ ਤੱਕ ਫ਼ੇਲ੍ਹ ਹੋ ਗਏ ਸਨ ਅਤੇ ਫਿਲਹਾਲ ਕੋਈ ਹੋਰ ਤਰੀਕਾ ਨਹੀਂ ਸੀ।
