ਨਵੀਂ ਦਿੱਲੀ, 18 ਦਸੰਬਰ, 2024 – ਅਮਰੀਕੀ ਸਟੇਟ ਉਟਾਹ ਦੇ ਇੱਕ ਘਰ ਵਿੱਚ 3 ਬੱਚਿਆਂ ਸਮੇਤ ਪਰਿਵਾਰ ਦੇ 5 ਮੈਂਬਰ ਮ੍ਰਿਤਕ ਪਾਏ ਗਏ ਹਨ ਅਤੇ ਇੱਕ 17 ਸਾਲਾ ਮੁੰਡੇ ਨੂੰ ਗੋਲੀ ਲੱਗਣ ਕਾਰਨ ਹਸਪਤਾਲ ਲਿਜਾਇਆ ਗਿਆ ਹੈ। ਸਥਾਨਕ ਪੁਲਸ ਨੇ ਇਹ ਜਾਣਕਾਰੀ ਦਿੱਤੀ। ਵੈਸਟ ਵੈਲੀ ਸਿਟੀ ਪੁਲਸ ਵਿਭਾਗ ਦੇ ਬੁਲਾਰੇ ਰੌਕਸੇਨ ਵੈਨੁਕੂ ਅਨੁਸਾਰ ਮ੍ਰਿਤਕਾਂ ਵਿਚ 2 ਬਾਲਗ, ਇੱਕ 11 ਸਾਲ ਦਾ ਲੜਕਾ ਅਤੇ 9 ਅਤੇ 2 ਸਾਲ ਦੀਆਂ 2 ਲੜਕੀਆਂ ਸ਼ਾਮਲ ਹਨ। ਇਹ ਤੁਰੰਤ ਸਪੱਸ਼ਟ ਨਹੀਂ ਹੋ ਸਕਿਆ ਕਿ ਉਨ੍ਹਾਂ ਦੀ ਮੌਤ ਕਿਵੇਂ ਹੋਈ। ਇਹ ਲਾਸ਼ਾਂ ਸਾਲਟ ਲੇਕ ਸਿਟੀ ਤੋਂ ਲਗਭਗ 9 ਮੀਲ ਦੱਖਣ-ਪੱਛਮ ਵਿੱਚ ਵੈਸਟ ਵੈਲੀ ਸਿਟੀ ਦੇ ਘਰ ਵਿੱਚੋ ਮਿਲੀਆਂ। ਉਥੇ ਹੀ ਜ਼ਖਮੀ ਨੌਜਵਾਨ ਗੈਰੇਜ ਵਿਚ ਮਿਲਿਆ।
ਵੈਨੁਕੂ ਨੇ ਰਾਤ ਦੇ ਸਮੇਂ ਇਕ ਨਿਊਜ਼ ਕਾਨਫਰੰਸ ਵਿੱਚ ਕਿਹਾ ਕਿ ਇਹ ਬਿਲਕੁਲ ਭਿਆਨਕ ਹੈ। ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਗੋਲੀਬਾਰੀ ਦੀ ਘਟਨਾ ਇਸ ਘਰ ਤੱਕ ਹੀ ਸੀਮਤ ਸੀ। ਜ਼ਖਮੀ ਮੁੰਡੇ ਦਾ ਹਸਪਤਾਲ ਵਿਚ ਇਲਾਜ ਚੱਲ ਰਿਹਾ ਹੈ। ਇਸ ਲਈ ਉਸ ਨਾਲ ਗੱਲ ਕਰਨ ਅਤੇ ਵਧੇਰੇ ਜਾਣਕਾਰੀ ਪ੍ਰਾਪਤ ਕਰਨ ਵਿਚ ਕੁੱਝ ਚੁਣੌਤੀਆਂ ਹਨ। ਪੁਲਸ ਘਰ ਦੇ ਅੰਦਰ ਦੀ ਹਾਲਾਤਾਂ ਦੀ ਜਾਂਚ ਕਰ ਰਹੀ ਹੈ ਅਤੇ ਗੁਆਂਢੀਆਂ ਨਾਲ ਵੀ ਗੱਲ ਕਰ ਰਹੀ ਹੈ। ਇਸ ਤੋਂ ਇਲਾਵਾ ਡੋਰਬੈੱਲ ਕੈਮਰੇ ਵਰਗੀਆਂ ਚੀਜ਼ਾਂ ਤੋਂ ਸਬੂਤ ਤਲਾਸ਼ ਰਹੀ ਹੈ।
