- ਹੁਣ ਤੱਕ 24 ਲੋਕਾਂ ਦੀ ਜਾਨ ਜਾ ਚੁੱਕੀ
ਨਵੀਂ ਦਿੱਲੀ, 15 ਜਨਵਰੀ 2025 – ਅਮਰੀਕਾ ਦੇ ਲਾਸ ਏਂਜਲਸ ਦੇ ਜੰਗਲਾਂ ਵਿੱਚ ਬੁੱਧਵਾਰ ਨੂੰ ਫਿਰ ਅੱਗ ਲੱਗਣ ਦੀ ਚੇਤਾਵਨੀ ਜਾਰੀ ਕੀਤੀ ਗਈ। ਅਮਰੀਕੀ ਰਾਸ਼ਟਰੀ ਵੈਦਰ ਸਰਵਿਸ ਦੇ ਅਨੁਸਾਰ, ਲਾਸ ਏਂਜਲਸ ਵਿੱਚ ਇਸ ਸਮੇਂ 45 ਤੋਂ 50 ਕਿਲੋਮੀਟਰ ਦੀ ਰਫ਼ਤਾਰ ਨਾਲ ਹਵਾਵਾਂ ਚੱਲ ਰਹੀਆਂ ਹਨ, ਜੋ ਕਿ ਅੱਜ ਬੁੱਧਵਾਰ ਨੂੰ 120 ਕਿਲੋਮੀਟਰ ਪ੍ਰਤੀ ਘੰਟਾ ਤੱਕ ਪਹੁੰਚ ਸਕਦੀਆਂ ਹਨ।
ਇਹ ਲਾਸ ਏਂਜਲਸ ਦੇ ਦੱਖਣ-ਪੱਛਮੀ ਜੰਗਲਾਂ ਨੂੰ ਪ੍ਰਭਾਵਿਤ ਕਰੇਗਾ। ਇਸ ਤੋਂ ਪਹਿਲਾਂ, 7 ਜਨਵਰੀ ਨੂੰ, ਲਾਸ ਏਂਜਲਸ ਦੇ ਆਲੇ-ਦੁਆਲੇ ਦੱਖਣੀ ਜੰਗਲਾਂ ਵਿੱਚ ਅੱਗ ਲੱਗ ਗਈ ਸੀ। ਇਸ ਵਿੱਚ ਹੁਣ ਤੱਕ 24 ਲੋਕਾਂ ਦੀ ਜਾਨ ਜਾ ਚੁੱਕੀ ਹੈ। ਇੱਕ ਹਫ਼ਤੇ ਬਾਅਦ ਵੀ ਇਸ ਨੂੰ ਪੂਰੀ ਤਰ੍ਹਾਂ ਕਾਬੂ ਨਹੀਂ ਕੀਤਾ ਜਾ ਸਕਿਆ।
ਸੈਂਟਾ ਮੋਨਿਕਾ ਅਤੇ ਸੈਂਟਾ ਸੁਸਾਨਾ ਵਧੇਰੇ ਖ਼ਤਰੇ ਵਿੱਚ ਹਨ। ਨਿਊਜ਼ ਏਜੰਸੀ ਏਪੀ ਦੇ ਅਨੁਸਾਰ, ਲਾਸ ਏਂਜਲਸ ਦੇ ਨੇੜੇ ਦੱਖਣ-ਪੱਛਮੀ ਏਂਜਲਸ ਦਾ ਇੱਕ ਵੱਡਾ ਹਿੱਸਾ ਭਿਆਨਕ ਅੱਗ ਦੇ ਖ਼ਤਰੇ ਵਿੱਚ ਹੈ। ਇੱਥੇ ਮੌਜੂਦ ਸੈਂਟਾ ਮੋਨਿਕਾ ਅਤੇ ਸੈਂਟਾ ਸੁਸਾਨਾ ਲਈ ਇੱਕ ਵਿਸ਼ੇਸ਼ ਚੇਤਾਵਨੀ ਜਾਰੀ ਕੀਤੀ ਗਈ ਸੀ। ਇਸ ਤੋਂ ਪਹਿਲਾਂ, ਅੱਗ ਲਾਸ ਏਂਜਲਸ ਦੇ ਪੈਲੀਸੇਡਸ, ਈਟਨ, ਹਰਸਟ, ਲਿਡੀਆ ਅਤੇ ਕੇਨੇਥ ਖੇਤਰਾਂ ਵਿੱਚ ਲਗਭਗ 155 ਵਰਗ ਕਿਲੋਮੀਟਰ ਵਿੱਚ ਫੈਲ ਗਈ ਸੀ। ਇੱਥੇ ਲਗਭਗ 1 ਲੱਖ ਲੋਕ ਬੇਘਰ ਹੋ ਗਏ ਹਨ।
ਦੂਜੇ ਪਾਸੇ, ਮੀਡੀਆ ਰਿਪੋਰਟਾਂ ਅਨੁਸਾਰ, ਡੋਨਾਲਡ ਟਰੰਪ 20 ਜਨਵਰੀ ਨੂੰ ਰਾਸ਼ਟਰਪਤੀ ਵਜੋਂ ਸਹੁੰ ਚੁੱਕਣ ਤੋਂ ਬਾਅਦ ਪ੍ਰਭਾਵਿਤ ਇਲਾਕਿਆਂ ਦਾ ਦੌਰਾ ਕਰ ਸਕਦੇ ਹਨ। ਇਸ ਦੌਰਾਨ, ਅਮਰੀਕੀ ਸੰਸਦ ਦੇ ਹੇਠਲੇ ਸਦਨ ਦੇ ਸਪੀਕਰ ਮਾਈਕ ਜੌਹਨਸਨ ਦਾ ਕਹਿਣਾ ਹੈ ਕਿ ਕੈਲੀਫੋਰਨੀਆ ਵਿੱਚ ਪਾਣੀ ਦਾ ਕੁਪ੍ਰਬੰਧ ਹੋਇਆ ਹੈ। ਉੱਥੋਂ ਦੇ ਸਥਾਨਕ ਆਗੂ ਅੱਗ ਪ੍ਰਤੀ ਲਾਪਰਵਾਹ ਸਨ।
